కృపా సత్యములు అంటే ఏమిటి?

* యోహాను 1:16-17, ఆయన పరిపూర్ణతలో నుండి మనమందరము కృప వెంబడి కృపను పొందితిమి. ధర్మశాస్త్రము మోషే ద్వారా అనుగ్రహింపబడెను; కృపయు సత్యమును యేసుక్రీస్తు ద్వారా కలిగెను. ఎవడును ఎప్పుడైనను దేవుని చూడలేదు; తండ్రి రొమ్ముననున్న అద్వితీయ కుమారుడే ఆయనను బయలుపరచెను.

సత్యమును గురించి యోహాను తన సువార్తలో తెలియజేస్తూ, యోహాను 1:17, ధర్మశాస్త్రము మోషే ద్వారా అనుగ్రహింపబడెను; కృపయు సత్యమును యేసుక్రీస్తు ద్వారా కలిగెను అను బాప్తిస్మమిచ్చు యోహాను సాక్షాన్ని పేర్కొన్నాడు.

యేసు నిజంగా ఎవరో అర్థం చేసుకోవడం ముఖ్యం. ఆయన కృప యొక్క సంపూర్ణత నుండి మనమందరం ఒకదాని తరువాత ఒకటి ఆశీర్వాదాలను పుచ్చుకొంటున్నాం. యేసు యొక్క సంపూర్ణత ఆయనలో నివసించే దేవుని సంపూర్ణతే, దానితో ఆయన మనలను ఆశీర్వదిస్తున్నాడు. ఆ సంపూర్ణత మనకు దేవుని కృప యొక్క గొప్ప ఆశీర్వాదాలను తెస్తూవుంది. ఆ కృపను కొలవడం వర్ణించడం ఎంతో కష్టమైనా, దానిని మరింతగా అభినందించడానికి యోహాను ఇక్కడ కృప వెంబడి కృపను పొందితిమి అని చెప్తున్నాడు. మనం అనర్హులమైయున్నప్పటికీ ఆయన మనలను ప్రేమిస్తున్నాడు. ఆ దేవుని అపారమైన ప్రేమ ఎప్పటికీ అంతం కాదు. అది మన భాధలలో మనలను ఓదారుస్తుంది, మన పాపాల్ని క్షమిస్తుంది, ఉపశమనం కలిగిస్తుంది, మన భయాలలో ధైర్యాన్నిస్తుంది. ప్రతిదీ మనకు ఇస్తుంది. ఆ దేవుని ప్రేమ చాలా గొప్పది, అది మనకోసం శరీరధారియై సిలువపై తనను తాను త్యాగం చేసుకుంది.

యేసు క్రీస్తు రాకడ దేవుడు ఆజ్ఞాపించిన వాగ్దానం చేసిన ప్రతిదాన్ని నెరవేర్చింది. యేసు కాలంలోని యూదులు దేవుని నుండి నేర్చుకోవడానికి మోషే వైపు చూశారు. మోషే ద్వారా ధర్మశాస్త్రము ఇవ్వబడింది. మోషే దేవుని చిత్తాన్ని, పాపాన్ని వెల్లడించే నైతిక ధర్మశాస్త్రాన్ని ఇచ్చాడు. క్రీస్తు యొక్క విమోచన పనిని ముందే సూచించే ఆచార నియమాలను ఇచ్చాడు. రాబోయే రక్షకుడిని వాగ్దానం చేసిన ప్రవచనాలను అందించాడు. అయితే, ఇప్పుడు మోషే ధర్మశాస్త్రము కంటే మెరుగైన కృపయు సత్యమును యేసుక్రీస్తు ద్వారా కలిగెనని బాప్తిస్మమిచ్చు యోహాను చెప్తున్నాడు.

అయితే, ఇప్పుడు, రక్షకుడు వచ్చాడు. తన కృపతో ఆయన మన స్థానంలో దేవుని నైతిక ధర్మశాస్త్రాన్ని పరిపూర్ణంగా నెరవేర్చాడు. ఆయన అన్ని కాలాలకు, అన్ని పాపాలకు అవసరమైన ఏకైక బలిని అర్పించాడు. ఆయన మోషేలోని వాగ్దానాలను సజీవ వాస్తవికతగా మార్చాడు. దేవుని సత్యాన్ని శాశ్వతంగా స్థాపించాడు.

యేసు మనకు దేవుణ్ణి వెల్లడించడానికి, మనల్ని దేవుని పిల్లలుగా చేయడానికి వచ్చాడు. తండ్రిగాక యెవడును కుమారుని ఎరుగడు; కుమారుడుగాకను, కుమారుడెవనికి ఆయనను బయలుపరచనుద్దేశించునో వాడుగాకను మరి ఎవడును తండ్రిని ఎరుగడు, మత్తయి 11:27. ఎవరూ దేవుణ్ణి ఎప్పుడూ చూడలేదు, కాని తండ్రి పక్షాన ఉన్న ఏకైక దేవుడు ఆయనను గూర్చి తెలియజేసాడు.

యేసు తెలియ చేసినట్లుగా దేవుడిని ఏ మానవుడు కూడా తెలియచేయలేడు, మోషే కూడా. ఏ మానవుడు కూడా దేవుడిని తన సంపూర్ణతలో, మహిమలో చూడలేదు. యేసు “ఏకైక దేవుడు.” ఆయన తండ్రి యొక్క ఏకైక కుమారుడు, తండ్రిలాగే అదే సారాంశం లేదా ఉనికి కలిగి, శాశ్వతత్వం నుండి జన్మించాడు. ఆయన “తండ్రి ప్రక్కన ఉన్నాడు”, అక్షరాలా, “తండ్రి రొమ్మున” ఉన్నాడు. ఆయనకు తండ్రితో వ్యక్తిగత, పూర్తిగా సన్నిహిత సంబంధం ఉంది. ఆయన దేవుడిని మనకు తెలియజేసాడు. 

* యోహాను 8:32, సత్యము మిమ్మును స్వతంత్రులనుగా చేయునని చెప్పగా.

నమ్మిన వారితో యేసు మాట్లాడుతుండగా, అవిశ్వాసులైన యూదులు కూడా వింటున్నారు. ఆ కొత్త విశ్వాసుల మృదువైన విశ్వాసాన్ని బలపరచాల్సిన అవసరం ఉంది. కొత్త విశ్వాసంలో ఊగిసలాడిన కొందరు ఆయనను ఇప్పటికే విడిచిపెట్టారు (యోహాను 6:66). వారి విశ్వాసం పెరగడానికి వారు నిజంగా యేసు శిష్యులుగా ఉండటానికి, యేసు వారితో, “[తన] బోధలలో నిలిచి ఉండండి” అని చెప్పాడు.

వాక్యమైన యేసుకు దగ్గరగా ఉండటానికి, వారు అక్షరాలా ఆయన బోధలలో నిలిచి ఉండాలి. తుఫానులను ఆపడానికి యేసుకు శక్తి ఉంది. ఆయన ఆకలితో ఉన్న జనసమూహాలకు ఆహారం పెట్టాడు. అనారోగ్యాలను స్వస్థపరిచాడు. అవన్నీ ప్రభావం చూపాయి. ప్రజలు ఆయన మాటలను వినడానికి ఆకర్షించాయి. ఆయన వారికి తన గురించి బోధించాడు. ఆయన వారిని తన వాక్యం ద్వారా పట్టుకున్నాడు.

నేటికీ మనకు యేసు వాక్యం ఉంది. ఆయన వాక్యం మనల్ని ఆయన వైపుకు నడిపిస్తుంది, ఆయనతో మనల్ని ఉంచుతుంది. యేసు యొక్క నిజమైన అనుచరుల లక్షణం ఏమిటంటే వారు ఆయన వాక్యానికి కట్టుబడి ఉంటారు, అక్కడ వారు సత్యాన్ని నేర్చుకుంటారు. సత్యం వారిని స్వతంత్రులను చేస్తుంది.

యేసు నుండి మనం ఏమి నేర్చుకొంటాం? ఆయన మనల్ని పాపం నుండి రక్షించడానికి దేవుడు పంపిన దేవుడు అని మనం నేర్చుకొంటాం. యేసులో మనకు క్షమాపణ ఉందని మనం నేర్చుకొంటాం. యేసు మనల్ని మన పరలోక తండ్రి వద్దకు నడిపిస్తాడని మనం నేర్చుకొంటాం. ఆ సత్యాలు మనల్ని – పాపం యొక్క శాపం నుండి, మరణం నుండి, అపవాది యొక్క అధికారము నుండి విడిపించాయి, రక్షణను క్షమాపణను నిత్యజీవాన్ని ఇస్తున్నాయి.

లేఖనం యొక్క ఈ భాగం తరచుగా దుర్వినియోగం చేయబడుతుంది. “సత్యము మిమ్మును స్వతంత్రులనుగా చేయును” అనే పదాలు తప్పుగా అర్ధం చేసుకోబడుతున్నాయి. ఈ రోజుల్లో, “సత్యాన్ని” (అది ఏదైనా కావచ్చు) కనుగొనడంలో మనకు సహాయపడే ఏదైనా అభ్యాసం ప్రశంసించబడుతుంది. లైబ్రరీలలో మరియు కళాశాల నినాదాలుగా మనం ఆ పదాలను చూస్తున్నాం. మేధావులు రాజకీయ నాయకుల పెదవులపై మనం వాటిని వింటున్నాం. కాని ఎవరి మాటలు మనల్ని విడిపిస్తున్నాయో, ఆ సత్యాన్ని వెల్లడిస్తున్నాయో ఆ మాటలను మాత్రం మనం వినం. ఎవరి శిష్యులకు ఆ సత్యం దానితో వచ్చే స్వేచ్ఛ ఉందో మనం వినం. యేసు గురించి మనం వినం.

* యోహాను 14:6, యేసు –నేనే మార్గమును, సత్యమును, జీవమును; నా ద్వారానే తప్ప యెవడును తండ్రి యొద్దకు రాడు.

తోమా యేసు శిష్యుడై ఉన్నప్పటికీ ఇక్కడ యేసు చెప్తున్న మాటలను అర్థం చేసుకోలేక కలవరపడుతు, ప్రభువా, యెక్కడికి వెళ్లుచున్నావో మాకు తెలియదే; ఆ మార్గమేలాగు తెలియునని ఆయనను అడిగాడు. నిజమే, వారికి ఆ స్థలం తెలియనప్పుడు వారు ఆ మార్గాన్ని ఎలా తెలుసుకోగలరు?

అందుకు, యేసు తన శిష్యులకు ఓపికగా బోధిస్తూ, ఆ స్థలానికి చేరుకోవడానికి, “నేనే మార్గమును, సత్యమును, జీవమును” అని తోమాకు జవాబిచ్చాడు. దేవుడు కలిగియున్న ప్రతిదానికీ మూలం క్రీస్తులోనే ఉంది, అది క్రీస్తు ద్వారానే చేరుతుంది.

• “నేనే మార్గము”, యేసు శిష్యులకు చెప్పినట్లుగా, మనం ఆయనపై నమ్మకం ఉంచుతూనే ఉండాలి. మనం యేసు ద్వారానే తండ్రిని సమీపిస్తాము.
• “నేనే సత్యము”, నిజమైనది సత్యమైనది అంతా ఆయనలోనే కనిపిస్తుంది కాబట్టి మనం యేసును విశ్వసించొచ్చు. ఆయన వాక్యమైయున్న దేవుడు. సత్యమైయున్న ఆయన వాక్యం ద్వారా ఆయన తన రక్షణను వెల్లడిస్తున్నాడు.
• “నేనే జీవము”, యేసు భౌతిక ఆధ్యాత్మిక జీవితానికి మూలమై ఉన్నాడు. ఆయనను విశ్వసించే వారికి నిత్యజీవము ఉంటుంది (యోహాను 3:16).

ఈ బోధన ప్రత్యేకమైనది. అన్ని మతాలు దేవుణ్ణి చేరుకుంటాయని, కాని వేర్వేరు మార్గాలను అనుసరిస్తాయనే ప్రసిద్ధ బోధకు ఇది విరుద్ధం. వేరే మార్గాలు లేవని దేవుడు చెప్తున్నాడు. యేసు ద్వారా తప్ప “ఎవరూ” తండ్రి వద్దకు రారు/రాలేరు. ఒక వ్యక్తి అడవిలోగాని అరణ్యంలోగాని తప్పుడు దారిని తీసుకొంటే అది అతని పరిస్థితిని ఎంత నిరాశాజనకంగా మారుస్తుందో మనకు తెలుసు. ఆధ్యాత్మికంగా దారి తప్పిన వారి విషయంలో కూడా అంతే. భద్రతకు, మోక్షానికి దారితీసే ఒకే ఒక మార్గం – యేసే.

కుమారుడిని తెలుసుకోవడం అంటే తండ్రిని తెలుసుకోవడమే. కాని శిష్యులు తరచుగా తమ భూసంబంధమైన పరిమితులను దాటలేకపోయారు. యేసు శ్రమ, మరణం పునరుత్థానంతో, ఈ విషయం ఇప్పటికే మనకు విశిదమయ్యింది.

* 1 యోహాను 1:6 లో, ఆయనతో కూడ సహవాసముగలవారమని చెప్పుకొని చీకటిలో నడిచిన యెడల మనమబద్ధమాడుచు సత్యమును జరిగింపకుందుము.

నిజమైన విశ్వాసం ఎల్లప్పుడూ తన దేవుని చిత్తానికి లోబడటానికి విశ్వాసి యొక్క సంసిద్ధతతో కూడి ఉంటుంది. నిజమైన విశ్వాసం ఒకరి జీవితంపై దేవుని అధికారాన్ని అంగీకరిస్తుంది. నిజమైన విశ్వాసం ఎల్లప్పుడూ దేవుని చిత్తానికి విధేయతతో కూడిన మాటలు పనుల ద్వారా వ్యక్తీకరించుకొంటుంది. పౌలు చెప్పినట్లుగా, “మనల్ని బలపరచువాని యందే మనం సమస్తమును చేయగలం” (ఫిలిప్పీయులు 4:13). దేవుని వాక్యానికి మనం విధేయత చూపడం ద్వారా దేవుని ప్రేమ పరిపూర్ణం అవుతుందని యోహాను చెప్తున్నాడు.

విశ్వాసుల జీవితాలు అన్యమతస్థుల జీవితాలకు భిన్నంగా లేనప్పుడు లేదా వారి చర్యలు వారి బోధలకు విరుద్ధంగా ఉన్నప్పుడు క్రైస్తవ చర్చి ప్రతిష్టకు జరిగే నష్టాన్ని గురించి ఆలోచించండి. ఉదాహరణకు, క్రైస్తవుల విడాకుల రేటు క్రైస్తవేతరుల విడాకుల రేటుకు సమానంగా ఉన్నప్పుడు దేవునికి జరిగే అవమానం గురించి ఆలోచించండి. క్రైస్తవులమని చెప్పుకునే పెళ్లికాని జంట కలిసి జీవిస్తున్నప్పుడు, వారికి బైబిల్ ఏమి చెబుతుందో తెలియకపోవచ్చు. కానీ చర్చి వారికి చెప్పినా వారు వివాహం చేసుకోవడానికి లేదా విడిపోవడానికి నిరాకరిస్తే, వారి “విశ్వాసం” నకిలీ అవుతుంది.

* 1 యోహాను 1:8, మనము పాపములేని వారమని చెప్పుకొనిన యెడల, మనలను మనమే మోసపుచ్చుకొందుము; మరియు మనలో సత్యముండదు.

ఈ మొదటి శతాబ్దపు క్రైస్తవులను ఇబ్బంది పెడుతున్న సమస్యలు 21వ శతాబ్దపు క్రైస్తవులను ఇబ్బంది పెడుతూనే ఉన్నాయి. నేను క్రైస్తవుడిని అని నాకు ఖచ్చితంగా ఎలా తెలుస్తుంది? దేవుడు నన్ను ప్రేమిస్తున్నాడని, నన్ను క్షమించాడని నన్ను తన కుటుంబంలో చేర్చుకొన్నాడని నేను ఖచ్చితంగా ఎలా తెలుసుకోగలను?

ఆ ప్రశ్నలకు సమాధానమివ్వడానికి ముగ్గురు శక్తివంతమైన సాక్షులు ఉన్నారు. ఆ సాక్షులను మూడు కేంద్రీకృత వృత్తాలుగా అనుకోండి. యోహాను బాహ్య వలయంతో ప్రారంభించి లోపలికి వస్తున్నాడు, తార్కిక పురోగతి కొరకు, యోహాను 2:1,2లో వ్యక్తపరిచే కేంద్రం నుండి ప్రారంభిద్దాం, నా చిన్నపిల్లలారా, మీరు పాపము చేయకుండుటకై యీ సంగతులను మీకు వ్రాయుచున్నాను. ఎవ డైనను పాపము చేసిన యెడల నీతిమంతుడైన యేసుక్రీస్తు అను ఉత్తరవాది తండ్రియొద్ద మనకున్నాడు. ఆయనే మన పాపములకు శాంతికరమై యున్నాడు; మన పాపములకు మాత్రమేకాదు. సర్వలోకమునకును శాంతికరమై యున్నాడు.

ఈ బోధనను నిష్పాక్షిక సమర్థన అంటారు. సువార్త సందేశం యొక్క గుండె మరియు ప్రధాన అంశం ఏమిటంటే, దేవుడు తన స్వంత స్వచ్ఛమైన కృప మరియు దయతో, లోకాన్ని నిర్దోషిగా ప్రకటించడానికి తన స్వంత కుమారుడైన యేసుక్రీస్తును బలి ఇచ్చాడు. కుమారుడు ఇష్టపూర్వకంగా తన జీవితాన్ని ప్రాయశ్చిత్త బలిగా అర్పించాడనే సందేశం ఇది, అంటే, రెండు విడిపోయిన పార్టీలను (దేవుడు మరియు మానవ జాతి) మళ్ళీ “ఒకటిగా” చేయడానికి వ్యక్తిగత రక్త చెల్లింపు. ఈ దయ యొక్క బహుమతి నిష్పాక్షికమైనది, అంటే, ఇది పూర్తిగా దేవుని మంచితనం నుండి వస్తుంది, తప్ప మానవ విలువ లేదా ప్రయత్నం నుండి కాదు. ఇది సార్వత్రికమైనది – దేవుడు దానిని మొత్తం ప్రపంచంపై ఉచ్చరించాడు: గతం, వర్తమానం మరియు భవిష్యత్తు.

“మనం పాపులుగా ఉండగానే” ఇవ్వబడిన క్రీస్తు ప్రాయశ్చిత్త బలి (రోమా 5:8), ఒక ఒప్పందం, సాతాను నరకం తుడిచివేయలేని వాస్తవం. దేవుడు లోకమును ఎంతో ప్రేమించెను. కాగా ఆయన తన అద్వితీయకుమారునిగా పుట్టిన వానియందు విశ్వాసముంచు ప్రతివాడును నశింపక నిత్యజీవము పొందునట్లు ఆయనను అనుగ్రహించెను, యోహాను 3:16. ఆ వాక్యం యొక్క అంశాన్ని గమనించండి – ఇక్కడ దేవుడు సబ్జెక్టు లోకము డైరెక్ట్ ఆబ్జెక్ట్. మన రక్షణ దేవుని చొరవతో, కుమారుని సిలువ వేయడంతో సంభవించింది. తండ్రి యొక్క స్థిరమైన తీర్పుతో శాశ్వతంగా ముద్రించబడింది హామీ ఇవ్వబడింది. ఇప్పుడు, “ఎవరైనా పాపం చేస్తే, వారి తరపున తండ్రితో మాట్లాడేవాడు మనకు ఉన్నాడు – ఆయనే నీతిమంతుడైన యేసుక్రీస్తు.”

మూడు సాక్ష్య వలయాలలో బయటి వైపు వచ్చే తదుపరి వలయం విశ్వాస వలయం. సువార్త గురించి తెలియని వారు, లేదా దానిని విన్నప్పటికీ దానిని నమ్మని వారు దాని ఆశీర్వాదాలను అనుభవించలేరు. ప్రజలందరూ ప్రాథమికంగా మంచివారని, వారికి పశ్చాత్తాపం లేదా శిలువ అవసరం లేదని అనుకొనే వారిని ఉద్దేశించి యోహాను కఠినముగా మాట్లాడుతూ, మనము పాపములేని వారమని చెప్పుకొనిన యెడల, మనలను మనమే మోసపుచ్చుకొందుము; మరియు మనలో సత్యముండదు. మనలను మనం మోసపుచ్చుకొంటూ ఆయనను [దేవుడిని] అబద్ధాలకోరుగా చేస్తున్నాం. ఆయన మాటకు మన జీవితాల్లో స్థానం ఇవ్వకున్నాం.

* 1 యోహాను 3:19,20, చిన్నపిల్లలారా, మాటతోను నాలుకతోను కాక క్రియతోను సత్యముతోను ప్రేమింతము. ఇందువలన మనము సత్యసంబంధులమని యెరుగుదుము.