బైబులు ఎటువంటి నిశ్చయతను కలుగచేస్తుంది??

ప్రశ్న: బైబులు దేవుని వాక్యమైయున్నది అనే సత్యము మనకు ఎటువంటి నిశ్చయతను కలుగచేస్తుంది?

* సంఖ్యాకాండము 23:19 దేవుడు అబద్ధమాడుటకు ఆయన మానవుడు కాడు. కొన్నిసార్లు మనుష్యులు తమ ఆలోచనలను, ఉద్దేశ్యాలను అమలు చేయలేక వాటిని మార్చుకొంటుంటారు. లేదా వారికి ఇంకా మంచి ఆప్షన్స్ ఉంటే గనుక వాటిని మార్చుకొంటారు. లేదా వారి మనస్సులు ఏదైనా అనుకోని సంఘటనల ద్వారా లేదా వారి కోరికల ద్వారా మార్చబడినప్పుడు వాటిని మార్చుకొంటారు. ఆదికాండము 6:5 నరుల చెడుతనము భూమి మీద గొప్పదనియు, వారి హృదయము యొక్క తలంపులలోని ఊహ అంతయు ఎల్లప్పుడు కేవలము చెడ్డదనియు యెహోవా చూచి. మనుష్యులందరు పూర్తిగా పాప నియంత్రణలో ఉన్నారు. చెడుతనము అంటే ఇది శరీరానికి సంబంధించినది. మనిషి యొక్క స్థితిని గురించి తెలియజేస్తుంది. వారి హృదయము యొక్క తలంపులలోని ఊహ అంటే ఆలోచన, మనస్సు యొక్క వైఖరి, రూపం. హృదయము యొక్క తలంపులలోని ఊహ అంటే మనుష్యుల సమస్త ఆలోచనలు ఉద్దేశ్యాలు స్వభావసిద్ధముగా పతనమైన శరీరముచే నియంత్రించబడుతూ ఉంటాయి. కాబట్టే, రోమా 3:11, నీతిమంతుడు లేడు, ఒక్కడును లేడు అని చెప్తూవుంది.

* రోమా 3:4, ప్రతి మనుష్యుడును అబద్ధికుడగును గాని దేవుడు సత్యవంతుడు కాక తీరడు. అట్లే మనుష్యులందరూ పాపదోషాన్ని బట్టి అబద్ధికులుగా ఉన్నారు.

భౌతిక లాభం కోసం వారి తపనలో ఆయన చిత్తాన్ని విస్మరించినట్లు నటించే వ్యక్తులు కూడా అబద్ధికులే. సంఖ్యాకాండము 22:19 కాబట్టి మీరు దయచేసి యీ రాత్రి ఇక్కడ నుండుడి; యెహోవా నాతోనికనేమి చెప్పునో నేను తెలిసికొందునని బాలాకు సేవకులకు ఉత్తరమిచ్చెను. బిలాము సేవలకు ఎక్కువ ప్రతిఫలం ఇవ్వాలనే ప్రతిపాదన అతనిని “ప్రభువు ఆజ్ఞ” ఏమిటో తెలియనట్లు నటించేలా చేసింది (18). బిలాముకు పాఠం నేర్పించడానికి, ఆ రాత్రి దేవుడు బిలాము నొద్దకు వచ్చి–ఆ మనుష్యులు నిన్ను పిలువ వచ్చిన యెడల నీవు లేచి వారితో వెళ్లుము. అయితే నేను నీతో చెప్పిన మాట చొప్పుననే నీవు చేయవలెనని అతనికి సెలవిచ్చాడు. కాని బిలాము కుయుక్తిగా ప్రవర్తించాడు కాబట్టే, 2 పేతురు 2:16 ఆ బిలాము దుర్నీతి వలన కలుగు బహుమానమును ప్రేమించెనని చెప్తూవుంది. భౌతిక లాభం కోసం తపనలో ఆయన చిత్తాన్ని విస్మరించినట్లు నటించిన వ్యక్తులలో ఇతడు ఒక ఉదాహరణ. ఆయన అతడి అపేక్షిత లక్ష్యాన్ని సాధించడానికి అతనిని అనుమతించాడు. అదే టైములో అతడి తిరుగుబాటు స్వీయ సంకల్పాన్ని విచ్ఛిన్నం చేయడం కోసం ఆయన దీనిని ఒక సాధనంగా వాడుకున్నాడు.

ఆపేక్ష సత్యవంతుడైన దేవునిని, దేవుని కార్యములను మరచిపోయేటట్లు విస్మరించేటట్లు నటింపజేయటమే కాకుండా తిరుగుబాటుకు ప్రేరేపిస్తుంది. కీర్తనలు 106:13-15 అయినను వారు ఆయన కార్యములను వెంటనే మరచిపోయిరి. ఆయన ఆలోచన కొరకు కనిపెట్టుకొనక పోయిరి. అరణ్యములో వారు బహుగా ఆశించిరి, ఎడారిలో దేవుని శోధించిరి.

ఎందుకంటే, భౌతిక లాభం (ఆపేక్ష) దేవుని ఉదేశ్యాన్ని అర్ధం చేసుకోనివ్వక మనిషి దానిని చూసి గర్వపడేటట్లు చేస్తూ తుదకు దేవునిని తృణీకరించేటట్లు దూషించేటట్లు చేస్తుంది, దారితప్పిస్తుంది. చరిత్రపై దేవుడు నియంత్రణలో ఉన్నాడు అనే విషయాన్ని మరచిపోయేటట్లు చేస్తుంది. ఉదాహరణకు, చరిత్రలో దేవుడు తన ప్రజలకు క్రమశిక్షణను నేర్పించుటకు, వారిని ప్రక్షాళన చేయడానికి ఆయన అష్షూరును ఒక సాధనంగా ఎంచుకున్నాడు. అష్షూరు, ప్రభువు లక్ష్యాలను నెరవేర్చింది. నిజమే, కాని దేవుని ఉదేశ్యాన్ని అష్షూరు అర్ధం చేసుకోలేదు. అష్షూరు విజయాలు పెరిగేకొద్దీ, అష్షూరు ప్రభావం పెరిగింది, అష్షూరు భూభాగం విస్తరించింది. ప్రతి విజయంతో, అష్షూరు గర్వంగా అతిశయపడుతూ దేవునిని ధిక్కరించే స్థాయికి ఎదిగింది. అష్షూరు రాజు తన శత్రువులనే కాకుండా చివరకు యెహోవాను కూడా దూషించాడు. అటువంటి ధిక్కరించే శక్తివంతమైన దేశం కూడా క్రమశిక్షణతో ఉండాలి. దేవుని శిక్షను తన స్వభావమును బట్టి అది చివరకు అనుభవించింది, యెషయా 10:12, కావున సీయోను కొండ మీదను యెరూషలేము మీదను ప్రభువు తన కార్యమంతయు నెరవేర్చిన తరువాత నేను అష్షూరు రాజు యొక్క హృదయ గర్వము వలని ఫలమును బట్టియు అతని కన్నుల అహంకారపు చూపులను బట్టియు అతని శిక్షింతును.

* యోహాను 10: 35 లేఖనము నిరర్థకము కానేరదు గదా, (అని యేసు చెప్పెను). లేఖనాల్లోని ప్రతి పదం దేవుని పదమే, అవి సత్యమే. లేఖనాలు దేవుని యొక్క శాశ్వతమైన సత్యాలు. అవి ఎన్నటికీ రద్దు చేయబడవు, అవి విచ్ఛిన్నం చేయబడవు, వాటిని పక్కన పెట్టలేము, అవి ఎప్పుడూ సవాలు చేయలేనివి. దేవుని మాటలకున్న అధికారాన్ని, శక్తిని ఎన్నటికీ ప్రశ్నించలేం.

ఆదికాండము 2:7, దేవుడైన యెహోవా నేలమంటితో నరుని నిర్మించి వాని నాసికా రంధ్రములలో జీవవాయువును ఊదగా నరుడు జీవాత్మ ఆయెను. కీర్తనలు 33:6, యెహోవా వాక్కు చేత ఆకాశములు కలిగెను. ఆయన నోటి ఊపిరిచేత వాటి సర్వసమూహము కలిగెను. దేవుని మాట సమస్త సృష్టిని ఉనికిలోనికి తెచ్చింది దానిని సంరక్షిస్తూ నడిపిస్తూవుంది. మాటలు నోటి ఊపిరి ద్వారా ఏర్పడతాయి. మరి దేవుని నోటి ఊపిరి (మాట) అనేది జీవానికి పర్యాయపదంగా ఉంది. 2 తిమోతికి 3:16 దైవావేశము వలన ప్రతి లేఖనము కలిగియున్నదని చెప్తూవుంది. అంటే, బైబిలులోని ప్రతి మాట దేవుని నుండే కలిగిందని (వచ్చిందని) ఈ వచనము చెప్తూవుంది. ఆయన మాటలు విశ్వాసులను సృష్టిస్తున్నాయి, వారిని బలపరుస్తున్నాయి. పరిశుద్ధాత్మ ద్వారా రక్షింపబడు విశ్వాసానికై మనుష్యులలో పనిచేస్తున్నాయి.

* యోహాను 17:17 సత్యమందు వారిని ప్రతిష్ఠ చేయుము; నీ వాక్యమే సత్యము. యోహాను 17:15-19, శిష్యులను సురక్షితంగా ఉంచమని యేసు దేవుణ్ణి ప్రార్థించలేదు. యేసు నిష్క్రమణ తరువాత వారు దేవుని కొరకు చెయ్యవలసిన పనిని కలిగి ఉన్నారు. దుష్టుని నుండి వాని మార్గాల నుండి దేవుడు వారిని కాపాడాలని ఆయన ప్రార్థించాడు (1 యోహాను 5:19). తమ మిషన్‌ను కొనసాగించడంలో శిష్యులు తీవ్రమైన, నరకప్రాయమైన వ్యతిరేకతను ఎదుర్కొంటారు. ఈ లోకంలో ఉన్నప్పుడు, యేసు ఎదుర్కొన్న దానికంటే తక్కువ వ్యతిరేకతను వారు ఆశించలేరు. వారికి యేసు ప్రార్థన అవసరం.

శిష్యులు ఆయన పనిని చేయడానికి వారిని అంకితం చేయుమని యేసు తండ్రిని కోరాడు. “ప్రతిష్ఠ చేయుము” అనే పదానికి అర్థం అదే. దీనిని “పవిత్రపరచు” అని కూడా అనువదించొచ్చు. ఆయన పరిచర్య కోసం వారిని ప్రతిష్ఠించమని యేసు దేవుణ్ణి ప్రార్ధించాడు. దేవుని వాక్యమైన దేవుని సత్యంలో శిష్యులను ప్రత్యేకముగా నిలిపి ఉంచుమని ఆయన ప్రార్ధించాడు, (యోహాను 8:31, 32). పరిశుద్ధతకు, శక్తికి, రక్షించే విశ్వాసానికి మూలం దేవుని వాక్యం. దేవుని వాక్యము దేవుని సత్యము.

యేసు దేవుని వాక్యమైయున్నాడు సత్యమైయున్నాడు. యేసు తండ్రికి ఎలా ఉన్నాడో, శిష్యులు కూడా యేసుకు అలానే ఉన్నారు. తండ్రి కుమారుడిని లోకానికి పంపాడు. ఇప్పుడు కుమారుడు తన శిష్యులను తన అపొస్తలులుగా లోకము లోనికి పంపాడు. ఆయన చేత పంపబడియున్న వారి ద్వారా సత్యమైయున్న ఆయన వాక్యం మనం రక్షింపబడులాగున మనలను చేరుకొంటూ ఉంది. మనలను చేరుకొంటున్న దేవుని వాక్యం క్రీస్తునందలి విశ్వాసమూలముగా నీతిమంతులుగా జీవించుమని పిలుస్తూవుంది, క్రీస్తు నందు విశ్వాసముంచిన వారిని నీతిమంతులుగా ప్రకటిస్తూ ఉంది. లేఖనాలను ఆలకించండి, నమ్మండి, నిత్యజీవాన్ని పొందండి.

జవాబు: బైబులు దేవుని వాక్యమైయున్నదను సత్యము బైబిల్ యొక్క ప్రతి మాట దేవుని మాటేలేనని, బైబిలునందు తప్పులు లేవని అది చెప్పే ప్రతి విషయము సత్యమైయున్నదనే నిశ్చయతను మనకు ఇస్తూఉంది.

* కీర్తనలు 119:114,116, నాకు మరుగుచోటు నా కేడెము నీవే నేను నీ వాక్యము మీద ఆశపెట్టుకొనియున్నాను. నేను బ్రదుకునట్లు నీ మాట చొప్పున నన్ను ఆదుకొనుము, నా ఆశ భంగమై నేను సిగ్గునొందక యుందును గాక.

మరుగుచోటు అంటే మహాదుర్గమైన (కీర్తనలు 9:9) దేవుని రక్షణలో క్షేమంగా ఉండడమనే దృఢమైన ఆలోచన, (శత్రువు నుండి దాచబడడం). ఇక్కడ తక్షణ రిఫరెన్స్ పాపము దాని ఫలితాలు. ఆపత్కాలములలో దేవుని దగ్గరకు పారిపోవడం ద్వారా పాపం మానవులపైకి తెచ్చే అన్ని కీడుల నుండి అతడు సురక్షితంగా ఉంటాడనే ఉద్దేశ్యం, (కీర్తనలు 27:5).

నీ వాక్యము మీద ఆశపెట్టుకొనియున్నాను అంటే దేవుని పక్షముగా మాట్లాడలేని పరిస్థితికి, ఆత్మ సంబంధమైన దుస్థితికి తనను దిగజారనీయ వద్దని కీర్తనాకారుడు ఇక్కడ ప్రార్దిస్తున్నాడు. ఇలా దావీదుకు జరిగింది (కీర్తన 51:12-15). నా శరీరము నా హృదయము నా బలం క్షీణించిపోయినను బలహీనుడనై శక్తిహీనుడనైనను నీ రక్షణ కొరకై నా ప్రాణము సొమ్మసిల్లుచున్నది. అంటే, దేవుని మీద ప్రేమ, ఆయన అనుగ్రహం కొరకైన ఆశ, పరలోకము కోరకైన వాంఛ అతడి ప్రాణాన్ని ఆయన ఇచ్చు రక్షణ కొరకై సొమ్మసిల్ల చేస్తూవుంది అని అర్ధం, కీర్తనలు 73:26 నా శరీరము నా హృదయము క్షీణించిపోయినను దేవుడు నిత్యము నా హృదయమునకు ఆశ్రయ దుర్గమును స్వాస్థ్యమునై యున్నాడు. కాబట్టే కీర్తనలు 119:81, నీ రక్షణ కొరకు నా ప్రాణము సొమ్మసిల్లుచున్నది. నేను నీ వాక్యము మీద ఆశపెట్టు కొనియున్నాను. నీ వాగ్దానాలను విశ్వసిస్తున్నాను, వాటిని బట్టి సంరక్షింపబడుతున్నాను, పూర్తిగా విఫలమయ్యే నా శక్తులు నీ మాటల ద్వారా ఆదరింపబడుతున్నాయి కాబట్టి నీ మాటల మీద నేను ఆశపెట్టు కొనియున్నాను (కీర్తనలు 119:147). నా నోట నుండి సత్యవాక్యమును ఏమాత్రమును తీసివేయకుము, నీ న్యాయవిధుల మీద నా ఆశ నిలిపియున్నాను (119:43). నా ఆశ భంగమై నేను సిగ్గునొందక యుందును గాక.

* సంఖ్యాకాండము 23:19 దేవుడు అబద్ధమాడుటకు ఆయన మానవుడు కాడు పశ్చాత్తాపపడుటకు ఆయన నరపుత్రుడు కాడు ఆయన చెప్పి చేయకుండునా? ఆయన మాట యిచ్చి స్థాపింపకుండునా?

ఆయన మాట యిచ్చి స్థాపింపకుండునా? ఎందుకంటే ఆయన మనస్సులో ఎటువంటి వైవిధ్యం ఉండదు. ఆయన మాట యిచ్చి వెనుకకు పోడు. ఆయన తన మాటను ఎప్పటికీ మరచిపోడు. ఆయన అన్ని సంఘటనలను ముందుగానే చూస్తాడు. ఆయన అన్నింటిని నిర్వహించగలడు. ఆయన పెదవుల నుండి వచ్చినది ఎప్పటికీ మార్చబడదు అది ఖచ్చితంగా నెరవేరుతుంది, కీర్తన 89:34 నా నిబంధనను నేను రద్దుపరచను, నా పెదవులగుండ బయలువెళ్లిన మాటను మార్చను; యెషయా 14:24 సైన్యములకధిపతియగు యెహోవా ప్రమాణపూర్వకముగా ఈలాగు సెలవిచ్చుచున్నాడు –నేను ఉద్దేశించినట్లు నిశ్చయముగా జరుగును నేను యోచించినట్లు స్థిరపడును.

* 1 కొరింథీయులకు 2:4,5 మీ విశ్వాసము మనుష్యుల జ్ఞానమును ఆధారము చేసికొనక, దేవుని శక్తిని ఆధారము చేసికొని యుండవలెనని, నేను మాటలాడినను సువార్త ప్రకటించినను, జ్ఞానయుక్తమైన తియ్యని మాటలను వినియోగింపక, పరిశుద్ధాత్మయు దేవుని శక్తియు కనుపరచు దృష్టాంతములనే వినియోగించితిని.

విశ్వాసం మనుష్యుల జ్ఞానంపై కాదు, దేవుని శక్తిపై ఆధారపడి ఉంటుంది. మనుష్యుల జ్ఞానం విశ్వాసులను చేయదు. దేవుని జ్ఞానం, ఆయన శక్తి మాత్రమే విశ్వాసులను చేయగలదు. దేవుని సత్యం బోధకుని మాటలను వినే వారి హృదయాలను ఒప్పిస్తుంది కాబట్టి దేవుని సత్యం దేవుని శక్తిపై ఆధారపడి ఉంటుంది.

జవాబు: బైబులు దేవుని వాక్యమైయున్నదను సత్యము బైబిలులోని సమస్త వాగ్దానాల్ని దేవుడు నెరవేరుస్తాడను నిశ్చయతను మనకు కలుగజేస్తూవుంది.

దేవుని వాక్యాన్ని దాని స్వచ్చతలో భవిష్యత్ తరాలకు అందించాలనే ఉద్దేశ్యములో దానిని వ్యాఖ్యాన రూపములో భద్రపర్చాలనే ఈ చిన్న ప్రయత్నంలో భాగస్వాములు కండి. ఇది ఎంతో శ్రమతో ఖర్చుతో కూడుకొన్నది కాబట్టి ప్రోత్సహించండి, చేయూతనివ్వండి, దేవుడు మిమ్మును దీవించును గాక. – రెవ. కూరపాటి విజయ్ కుమార్. ఫోన్ పే యూపీఐ ఐడి – 9848365150-2@ybl

KURAPATI VIJAY KUMAR,
HDFC BANK, Account no 50200096563465,
IFSC code. HDFC0005872,
Swift code HDFCINBB,
JKC College Road Branch, GUNTUR 522006,
ANDHRA PRADESH, INDIA.
The phone pay UPI Id : 9848365150-2@ybl