పరదైసు అంటే ఏమిటి?

మనం చనిపోయినప్పుడు, పరలోకంలోకి ప్రవేశించే ముందు, క్రీస్తు రెండవ రాకడ వరకు వేచి ఉండటానికి విశ్వాసులు పరదైసుకు వెళతారా? పరదైసు అంటే ఏమిటి?

పరదైసు అనే ఈ గ్రీకు పదం παράδεισος కొత్త నిబంధనలో మూడు సార్లు కనిపిస్తుంది :
లూకా 23:43 – నేడు నీవు నాతోకూడ పరదైసులో ఉందువని నిశ్చయముగా నీతో చెప్పుచున్నాననెను.
2 కొరింథీ 12:2-4 – క్రీస్తునందున్న యొక మనుష్యుని నేనెరుగుదును. అతడు పదునాలుగు సంవత్సరముల క్రిందట మూడవ ఆకాశమునకు కొనిపోబడెను; అతడు శరీరముతో కొనిపోబడెనో నేనెరుగను, శరీరములేక కొనిపోబడెనో నేనెరుగను, అది దేవునికే తెలియును. అట్టి మనుష్యుని నేనెరుగుదును. అతడు పరదైసు లోనికి కొనిపోబడి, వచింప శక్యము కాని మాటలు వినెను; ఆ మాటలు మనుష్యుడు పలుకకూడదు. అతడు శరీరముతో కొనిపోబడెనో శరీరములేక కొనిపోబడెనో నేనెరుగను, అది దేవునికే తెలియును.
ప్రకటన 2:7, జయించు వానికి దేవుని పరదైసులో ఉన్న జీవవృక్ష ఫలములు భుజింప నిత్తును. ఆదికాండము 2:8 లో ప్రస్తావించబడిన జీవ వృక్షాన్ని సూచిస్తుంది.

ఈ రోజుల్లో వ్యాఖ్యానాలు మరియు పిడివాదాలలో పరదైసు అనే పదం యొక్క అర్థంపై క్రైస్తవుల మధ్య చాలా చర్చ జరుగుతోంది. అందులో చాలా వరకు విలువలేనివి, ఎందుకంటే ఎటువంటి లేఖనాధార ఆధారం లేకుండా అవి పూర్తిగా వ్యక్తిగత అభిప్రాయాలుగా వ్యక్తీకరించబడటమే అందుకు కారణమని చెప్పొచ్చు.

సిలువపై పశ్చాత్తాపపడిన దొంగకు యేసు వాగ్దానం చేసిన దాని గురించి ఆలోచించండి, “నేడు నీవు నాతోకూడ పరదైసులో ఉందువని నిశ్చయముగా నీతో చెప్పుచున్నాననెను.” (లూకా 23:43). గుడ్ ఫ్రైడే రోజున యేసు మరియు దొంగ మరణించినప్పుడు, వారి శరీరాలు మరియు ఆత్మలు విడిపోయాయి, వారి శరీరాలు భూమిపైనే ఉన్నాయి వారి ఆత్మలు ఎక్కడికి వెళ్ళాయి? పరదైసుకా లేకా పరలోకానికా? ప్రసంగి 12:7 మన్నయినది వెనుకటివలెనే మరల భూమికి చేరును, ఆత్మ దాని దయచేసిన దేవుని యొద్దకు మరల పోవును; హెబ్రీయులు 9:27 మనుష్యులొక్కసారే మృతిపొందవలెనని నియమింపబడెను; ఆ తరువాత తీర్పు జరుగును; లూకా 16:22-24, ఆ దరిద్రుడు చనిపోయి దేవదూతల చేత అబ్రాహాము రొమ్మున (ఆనుకొనుటకు) కొనిపోబడెను. ధనవంతుడు కూడ చనిపోయి పాతిపెట్టబడెను. అప్పుడతడు పాతాళములో బాధపడుచు, కన్నులెత్తి దూరమునుండి అబ్రాహామును అతని రొమ్మున (ఆనుకొనియున్న) లాజరును చూచి –తండ్రివైన అబ్రాహామా, నాయందు కనికరపడి, తన వ్రేలికొనను–నీళ్లలోముంచి నా నాలుకను చల్లార్చుటకు లాజరును పంపుము; నేను ఈ అగ్నిజ్వాలలో యాతనపడుచున్నానని కేకలువేసి చెప్పెను.

లాజరు మరణించి పరదైసుకు వెళ్లాడా? లేదా పరలోకానికి వెళ్లాడా? ధనవంతుడు మరణించి పాతాళానికి వెళ్లాడా? నరకానికి వెళ్లాడా?

ఆదికాండములో, “పరదైసు” అనేది గతములో ఏదెను తోటను సూచిస్తుంది – దేవుడు మొదట ఆదాము హవ్వలను ఉంచిన ప్రదేశం. శాంతి మరియు దేవునితో ప్రత్యక్ష సహవాసం యొక్క స్థితిని సూచిస్తుంది. పరదైసు అనే మాట గురించి పెద్దగా ఏమి తెలియదు కాని కొందరు ఈ పదాన్ని పర్షియన్ బాషా నుండి తీసుకొన్నారని మరికొందరు ఆరామిక్ బాషా నుండి తీసుకొన్నారని చెప్తున్నారు. కాని సెప్టువాజింట్‌లో ఈడెన్ కోసం ఉపయోగించిన గ్రీకు పదం పారడైసోస్ (παράδεισος), “చుట్టూ గోడలు ఉన్న ఒక తోట” అనే అర్థం వచ్చే పర్షియన్ పదం నుండి వచ్చింది. కాబట్టి ఈ కోణంలో, స్వర్గం అనేది పాపం కారణంగా కోల్పోయిన పరిపూర్ణత యొక్క అసలు భూసంబంధమైన స్థితి.

సెయింట్ ఇరేనియస్ (క్రీ.శ. 2), పరదైసు అనేది ఒక నిజమైన ప్రదేశమని, ఏదెను తోటయని, ఇది భూమిపై ఎక్కడో ఉంది కాని ఇప్పుడు చేరుకోలేనిదని, నీతిమంతులు పునరుత్థానం వరకు తాత్కాలిక విశ్రాంతి కోసం ఇక్కడికి వెళ్తారని బోధించాడు.

అలెగ్జాండ్రియాకు చెందిన సెయింట్ క్లెమెంట్ (క్రీ.శ. 2–3) పరదైసు అనేది మరణానంతరం ఆత్మకు ఆధ్యాత్మిక విద్య మరియు పురోగతికి సంబందించిన ఒక ప్రదేశం అని – నీతిమంతులకు ఒక “పాఠశాల” అని బోధించాడు.

ఆరిజెన్ (క్రీ.శ 3) పరదైసు అనేది భౌతికమైనది కాదని, ఆధ్యాత్మిక ప్రపంచం అని, ఇక్కడ ఆత్మలు మరణం తర్వాత తాత్కాలికంగా నివసిస్తాయని, దేవునితో తుది ఐక్యతకు సిద్ధమవుతాయని బోధించాడు.

సెయింట్ సిప్రియన్ (క్రీ.శ.3) మరణం తర్వాత నీతిమంతులు పరదైసుకు వెళతారని, దానిని అతడు దేవుని సన్నిధిలో విశ్రాంతి మరియు శాంతి స్థలంగా చూశాడు.

సెయింట్ అథనాసియస్ (క్రీ.శ. 4) క్రీస్తు తన పునరుత్థానం ద్వారా మానవాళికి పరదైసును తిరిగి తెరిచాడని ఇప్పుడు మరణానంతరం విశ్వాసులకు అది అందుబాటులో ఉందని బోధించాడు.

సెయింట్ బాసిల్ ది గ్రేట్ (క్రీ.శ. 4) పరదైసు అనేది మరణించిన నీతిమంతులకు విశ్రాంతి స్థలమని, ఇది అంతిమ పునరుత్థానానికి భిన్నంగా ఆనందంగా మరియు ప్రశాంతంగా ఉండే స్థలమని బోధించాడు.

రోమన్ కాథోలిక్స్, ఒకడు విశ్వాసిగా మరణించినపుడు, దేవుని దయలో, మరణం తర్వాత ఆత్మ “పరదైసు”లోకి ప్రవేశిస్తుందని, దీనిని పరలోకము యొక్క ముందస్తు రుచిగా అర్థం చేసుకుంటారు – చివరి పునరుత్థానానికి ముందు. అయితే, కొన్ని ఆత్మలు పూర్తిగా పరదైసులోకి ప్రవేశించే ముందు పర్గేటోరి ప్రక్షాళనలో శుద్ధి చెందవల్సి ఉంటుందని నమ్ముతారు. ప్రక్షాళన అనేది “మూడవ స్థలం” కాదు, కాని కృపలో మరణించి ఇంకా ప్రక్షాళన అవసరమైన వారికి శుద్ధి చేసే ప్రక్రియ. ప్రక్షాళన తర్వాత, ఆత్మ పరదైసు/పరలోకములోకి ప్రవేశిస్తుంది.

లూథర్ పరదైసు అంటే మరణం తర్వాత విశ్వాసి ఆత్మ క్రీస్తుతో ఉండే ఆశీర్వాద స్థితి అని బోధించాడు. కాబట్టి లూథర్ విషయానికొస్తే, పరదైసు అంటే క్రీస్తుతో ఉండటం. ఇది తాత్కాలిక “వేచి ఉండే స్థలం” కాదు, కాని అంతిమ పునరుత్థానానికి ముందు కూడా రక్షకుని ఆనందకరమైన ఉనికి. లూథర్ ప్రక్షాళన సిద్ధాంతాన్ని బైబిల్‌కు విరుద్ధమని తిరస్కరించాడు. విశ్వాసుల ఆత్మలు నేరుగా క్రీస్తుతో ఉండటానికి వెళ్తాయని మరియు మరింత శుద్ధి కోసం నిర్బంధించబడవని అతను నమ్మాడు. విశ్వాసం మాత్రమే ఒక వ్యక్తిని నీతిమంతుడిగా మరియు పరలోకానికి సిద్ధంగా ఉంచుతుందని ఆయన బోధించాడు – మరణించిన తరువాత ఆత్మకు మరింత శుద్ధి అవసరం లేదు. మరణం తర్వాత ఆత్మ క్రీస్తును ఆస్వాదిస్తుందని లూథర్ నమ్మాడు, కానీ పరదైసు యొక్క చివరి నెరవేర్పు చివరి రోజున శరీరం యొక్క పునరుత్థానంతో వస్తుంది. అతడు కొన్నిసార్లు చనిపోయిన వారిని “నిద్రపోతున్నట్లుగా” మాట్లాడాడు – వారు అపస్మారక స్థితిలో ఉన్నందున కాదు, వారు విశ్రాంతిలో ఉండి, పునరుత్థానం కోసం ఎదురు చూస్తున్నారు కాబట్టి. ఆత్మ నిద్రపోదు, కాని మేల్కొని ఉంటుంది మరియు క్రీస్తుతో నివసిస్తుంది, అయితే శరీరం పునరుత్థానం వరకు నిద్రపోతుంది. కాబట్టి పరదైసు నిజమైనది మరియు ప్రస్తుతం ఉంది, కాని ఇంకా తుది పరిపూర్ణతతో కాదు – అది పునరుత్థానం మరియు కొత్త సృష్టితో వస్తుంది.

లూకా 23:43, నేడు నీవు నాతోకూడ పరదైసులో ఉందువని నిశ్చయముగా నీతో చెప్పుచున్నాననెను. ఆ రోజు క్రీస్తు ఎక్కడ ఉన్నాడు? దొంగ తనతో పాటు పరదైసులో ఉంటాడని యేసు స్పష్టంగా చెప్పాడు. క్రీస్తు ఆ రోజు మరణించాడు. దాని అర్థం ఆయన శరీరం మరియు ఆత్మ వేరయ్యాయి. యేసు శరీరం సమాధిలో ఉంచబడింది. యేసు ఆత్మ పాతాళానికి వెళ్ళింది. ఇది దైవ దూషణ అని మీలో కొందరు అనుకోవచ్చు, వివరిస్తాను. అపొ. కార్య. 2:27, 31, నీవు నా ఆత్మను పాతాళములో విడిచిపెట్టవు నీ పరిశుద్ధుని కుళ్లుపట్ట నియ్యవు. క్రీస్తు పాతాళములో విడువబడలేదనియు, ఆయన శరీరము కుళ్లిపోలేదనియు దావీదు ముందుగా తెలిసికొని ఆయన పునరుత్థానమునుగూర్చి చెప్పెను. నిజానికి కొత్త నిబంధనలో పాతాళం అనేది నరకం అని ఎక్కడ చెప్పబడలేదు. పునరుత్థాన రోజున శరీరంతో తిరిగి కలిసే వరకు మరణం తర్వాత ఆత్మను ఉంచే శక్తి ఇది. ఈ శక్తి దానికదే మంచిది కాదు లేదా చెడ్డది కాదు. మరో మాటలో చెప్పాలంటే, పాతాళం శిక్ష స్థితిని లేదా ఆనంద స్థితిని సూచించదు. అబ్రహం, ఇస్సాకు, యాకోబులు మరియు సౌలు, అహాబు మరియు ఇతర భక్తిహీనులతో పాటు పాతాళంలోకి వెళ్ళారు. ఇక్కడ యేసు పాతాళంలోకి వెళ్ళడం అంటే పరదైసులో (పరలోకములో) ఉందని మనం విన్నాము, మరో మాటలో చెప్పాలంటే, పాతాళంలో అతని ఆత్మ బాధలో లేదు, కాని పరిపూర్ణ ఆనందంలో ఉంది. ధనవంతుడు, లూకా 16:19ff. అతడు కూడా పాతాళంలో ఉన్నాడని చెప్పబడింది, కాని బాధలో ఉన్నాడు. పాతాళం మరణ భాగస్వామి, విశ్వాసి మరియు అవిశ్వాసి ఇద్దరూ ఆత్మను పట్టుకునే శక్తి. అయితే మరణం అనేది విశ్వాసి మరియు అవిశ్వాసి ఇద్దరి శరీరాన్ని పట్టుకునే శక్తి.

“పరదైసు” అనేది మనిషి యొక్క అసలు నివాసమైన స్థలం, ఆనందకరమైన ప్రదేశం, దేవుని స్వరూపంలో మనిషి పరిపూర్ణ నీతి మరియు పవిత్రతతో నివసించే ప్రదేశం. కాబట్టి యేసుతో పరదైసులోకి ప్రవేశించడం అంటే దేవుని అసలు ప్రతిరూపాన్ని పునరుద్ధరించడం, నీతి మరియు నిజమైన పవిత్రత యొక్క స్థితి, పాపం ద్వారా కలుషితం కాని స్థితి, గొప్ప ఆనందం మరియు దీవెనకరమైన స్థితి.

అంత్య దినాన్న, ఆ క్రైస్తవులు యేసు ఈ ప్రపంచానికి ప్రత్యక్షంగా తిరిగి వస్తున్నప్పుడు ఆయనతో పాటు వస్తారు (1 థెస్సలొనీకయులు 4:14 యేసు మృతి పొంది తిరిగి లేచెనని మనము నమ్మినయెడల, అదే ప్రకారము యేసు నందు నిద్రించిన వారిని దేవుడాయనతో కూడ వెంటబెట్టుకొని వచ్చును). మరణ సమయంలో వారు పొందిన తీర్పు బహిరంగపరచ బడుతుంది మరియు యేసు తిరిగి వచ్చినప్పుడు భూమిపై జీవించి ఉన్నవారందరూ-మరియు మరణాన్ని అనుభవించని వారు-ఆ సమయంలో తీర్పు తీర్చబడతారు (మత్తయి 25:31-46). అనీతిమంతులు నిత్యశిక్షకును నీతిమంతులు నిత్యజీవమునకును పోవుదురు.

2 పేతురు 310-13, అయితే ప్రభువు దినము దొంగవచ్చినట్లు వచ్చును. ఆ దినమున ఆకాశములు మహా ధ్వనితో గతించి పోవును, పంచభూతములు మిక్కటమైన వేండ్రముతో లయమైపోవును, భూమియు దానిమీదనున్న కృత్యములును కాలిపోవును. ఇవన్నియు ఇట్లు లయమై పోవునవి గనుక, ఆకాశములు రవులుకొని లయమైపోవునట్టియు, పంచభూతములు మహావేండ్రముతో కరిగిపోవునట్టియు, దేవుని దినపు రాకడ కొరకు కనిపెట్టుచు, దానిని ఆశతో అపేక్షించుచు, మీరు పరిశుద్ధమైన ప్రవర్తనతోను భక్తితోను ఎంతో జాగ్రత్తగలవారై యుండవలెను. అయినను మనమాయన వాగ్దానమును బట్టి క్రొత్త ఆకాశముల కొరకును క్రొత్త భూమికొరకును కనిపెట్టుచున్నాము; వాటియందు నీతి నివసించును.

ఆపై క్రైస్తవులందరూ ఎప్పటికీ ప్రభువుతో ఉంటారు, 1 థెస్సలొనీకయులు 4:17 ఆ మీదట సజీవులమై నిలిచి యుండు మనము వారితోకూడ ఏకముగా ప్రభువును ఎదుర్కొనుటకు ఆకాశమండలమునకు మేఘములమీద కొనిపోబడుదుము. కాగా మనము సదాకాలము ప్రభువుతోకూడ ఉందుము.

దేవుని వాక్యాన్ని దాని స్వచ్చతలో భవిషత్ తరాలకు అందించాలనే ఉద్దేశ్యములో దానిని వ్యాఖ్యాన రూపములో భద్రపర్చాలనే ఈ చిన్న ప్రయత్నంలో భాగస్వాములు కండి. ఇది ఎంతో శ్రమతో ఖర్చుతో కూడుకొన్నది కాబట్టి ప్రోత్సహించండి, చేయూతనివ్వండి, దేవుడు మిమ్మును దీవించును గాక. – రెవ. కూరపాటి విజయ్ కుమార్. ఫోన్ పే యూపీఐ ఐడి – 9848365150-2@ybl

KURAPATI VIJAY KUMAR,
HDFC BANK, Account no 50200096563465,
IFSC code. HDFC0005872,
Swift code HDFCINBB,
JKC College Road Branch, GUNTUR 522006,
ANDHRA PRADESH, INDIA.
The phone pay UPI Id : 9848365150-2@ybl