అడ్వెంట్  4           సిరీస్ B  (పాత నిబంధన ప్రసంగము)

పాత నిబంధన పాఠము: 2 సమూయేలు 7:8-11,16; పత్రిక పాఠము: రోమా 16:25-27; సువార్త పాఠము: లూకా 1:26-38,19-28; కీర్తన 89.

సిద్ధపరచిన వారు: రెవ. కూరపాటి విజయ్ కుమార్ గారు
ప్రసంగ పాఠము: 2 సమూయేలు 7:8-11,16

మెస్సయ్యకు సంబంధించిన ప్రవచనాలను జ్ఞాపకం చేసుకొనేటప్పుడు, కీర్తనలు, యెషయా, యిర్మీయా, జెకర్యా వంటి వాటిని గుర్తుచేసుకొంటాం తప్ప సమూయేలు గ్రంధాన్ని గూర్చి అసలు ఆలోచించం. కాని మన పాఠములో మెస్సయ్యను గూర్చి ఆయన రాజ్యాన్ని గూర్చి ఒక గొప్ప ప్రవచనముంది. ఈ విషయం మీలో కొందరికి ఆశ్చర్యాన్ని కలిగించొచ్చు. ఆదరణను కలిగించు ఆ ప్రవచనమేంటో ఆలకిధ్ధాం.

2 సమూయేలు 7:8-11,16 వచనములను చదువుకుందాం: ⁸కాబట్టి నీవు నా సేవకుడగు దావీదుతో ఈలాగు చెప్పుము– సైన్యములకధిపతియగు యెహోవా నీకు సెలవిచ్చునదేమనగా– గొఱ్ఱెల కాపులోనున్న నిన్ను గొఱ్ఱెల దొడ్డిలో నుండి తీసి ఇశ్రాయేలీయులను నా జనులమీద అధిపతిగా నియమించితిని. ⁹నీవు పోవు చోట్లనెల్లను నీకు తోడుగా నుండి నీ శత్రువులనందరిని నీ యెదుట నిలువకుండ నిర్మూలము చేసి, లోకములోని ఘనులైన వారికి కలుగు పేరు నీకు కలుగజేసియున్నాను. ¹⁰మరియు ఇశ్రాయేలీయులను నా జనులు ఇకను కదిలింపబడకుండ తమ స్వస్థలమందు నివసించునట్లు దానియందు వారిని నాటి, పూర్వము ఇశ్రాయేలీయులను నా జనులమీద నేను న్యాయాధిపతులను నియమించిన తరువాత జరుగుచు వచ్చినట్లు దుర్బుద్ధిగల జనులు ఇకను వారిని కష్టపెట్టకయుండునట్లుగా చేసి ¹¹నీ శత్రువుల మీద నీకు జయమిచ్చి నీకు నెమ్మది కలుగజేసియున్నాను. మరియు యెహోవానగు నేను నీకు తెలియజేయునదేమనగా –నేను నీకు సంతానము కలుగజేయుదును. ¹⁶నీ మట్టుకు నీ సంతానమును నీ రాజ్యమును నిత్యము స్థిరమగును, నీ సింహాసనము నిత్యము స్థిరపరచబడును అనెను.

ఇది దేవుని కుమారుడైన మెస్సయ్యకు సంబంధించిన గొప్ప వాగ్దానము. చదువుకొన్న వచనాలలో, ఇశ్రాయేలీయులను నా జనులు ఇకను కదిలింపబడకుండ తమ స్వస్థలమందు నివసించునట్లు దాని యందు వారిని నాటి, నీ మట్టుకు నీ సంతానమును నీ రాజ్యమును నిత్యము స్థిరమగును, నీ సింహాసనము నిత్యము స్థిరపరచబడును అను మాటలే మెస్సయ్యకు చెందిన ప్రవచనము. ఈ వాగ్దానాన్ని ఆధారము చేసుకొని, మనము చదువుకొన్న వచనాలలోని దేవుని ఉద్దేశ్యాన్ని అర్ధం చేసుకోవడానికి ప్రయత్నిస్తే_ దేవుడు తన ప్రజల పట్ల ఎలా వ్యవహరిస్తాడో అర్ధమవుతుంది. అది ఎంతో ఆదరణను కలుగజేస్తుంది.

దేవుడు మీతో ఎలా వ్యవహరించుచున్నాడో తెలుసుకోండి

1. ఆయన అపాత్రులకు కనికరయుతుడై ఉన్నాడు 8
2. ఆయన స్వంతమని అనుకొనిన మిమల్ని సంరక్షించుచున్నాడు 9-11
3. ఆయన నిత్య రాజ్యమును మీకు అనుగ్రహించబోతున్నాడు 16

1

Background: యెహోవా దావీదుకు నలుదిక్కుల అతని శత్రువుల మీద అతనికి విజయమిచ్చి అతనికి నెమ్మది కలుగజేసిన తరువాత, దావీదు రిలాక్స్ అయ్యి, తన అందమైన కొత్త ప్యాలెస్‌ని ఆస్వాదిస్తున్నప్పుడు, అతనికి ఒక విషయం తప్పుగా అనిపించింది. ప్రభువు మందసము గుడారంలో ఉండగా, తాను అందమైన  రాజ భవనంలో ఇంత వైభవంగా జీవించడం అతనికి సరైనదిగా అనిపించలేదు. 1 దినవృత్తాంతములు 28:2, యెహోవా నిబంధన మందసమునకును మన దేవుని పాదపీఠమునకును విశ్రమస్థానముగా ఉండుటకు ఒక మందిరము కట్టించ వలెనని నేను నా హృదయమందు నిశ్చయము చేసికొని సమస్తము సిద్ధపరచితిని. ఈ ఆలోచనలో స్వార్థం ఏమీ లేదు. అతడు తనకంటూ ఒక పేరు తెచ్చుకోవడానికి ప్రయత్నించటం లేదు. అతడు దేవుణ్ణి మహిమపరచాలని మాత్రమే కోరుకున్నాడు.

వెంటనే దావీదు తనకు మంచి స్నేహితుడు సలహాదారు పాస్టర్ గారిగా ఉన్నటువంటి నాతానును పిలువనంపించి, తనకు వచ్చిన ఆలోచనను అతనితో పంచుకున్నాడు. దావీదు ప్రతిపాదనకు నాతాను కూడా చాలా ఉత్సాహంగా స్పందిస్తూ,  –యెహోవా నీకు తోడుగా నున్నాడు, నీకు తోచినట్లు చెయ్యమని చెప్పి వెళ్ళిపోయాడు. నాతాను ఆ విషయములో దేవునిని సంప్రదించకుండా దానిని త్వరగా ఆమోదించాడు. ఆ విషయంలో దావీదుకూడా మొదటగా దేవునిని సంప్రదించలేదు.

దావీదు ఆలోచనలో ఎలాంటి తప్పు లేదు. వారు దేవుని ఉద్ధేశ్యానికి విరోధముగా వెళ్లకుండా దేవుడు తన నిర్ణయాన్ని తెలియజేస్తూ, 2 సమూయేలు 7:4-8, ఆ రాత్రి యెహోవా వాక్కు నాతానునకు ప్రత్యక్షమై సెలవిచ్చిన దేమనగా నీవు పోయి నా సేవకుడగు దావీదుతో ఇట్లనుము– యెహోవా నీకాజ్ఞ ఇచ్చునదేమనగా– నాకు నివాసముగా ఒక మందిరమును కట్టింతువా? ఐగుప్తులో నుండి నేను ఇశ్రాయేలీయులను రప్పించిన నాటనుండి నేటి వరకు మందిరములో నివసింపక డేరాలోను గుడారములోను నివసించుచు సంచరించితిని. ఇశ్రాయేలీయు లతో కూడ నేను సంచరించిన కాలమంతయు నా జనులను పోషించుడని నేను ఆజ్ఞాపించిన ఇశ్రాయేలీయుల గోత్రములలో ఎవరితోనైనను దేవదారుమయమైన మందిరమొకటి మీరు నాకు కట్టింపక పోతిరే అని నేనెన్నడైనను అని యుంటినా? ఆ ఆలోచన మంచిదే; అయినను నీవు మందిరమును కట్టించకూడదు (1 రాజులు 8:18,19); దేవుని మందిరము విషయములో దేవుని జవాబు నో, ఎందుకంటే, నీవు విస్తారముగా రక్తము ఒలికించి గొప్ప యుద్ధములు జరిగించిన వాడవు, నీవు నా నామమునకు మందిరమును కట్టించకూడదు, నా సన్నిధిని నీవు విస్తారముగా రక్తము నేలమీదికి ఓడ్చితివి (1 దినవృత్తాంత ములు 22:7,8).

దావీదు దేవుని మందిరమును కడదాం అని అన్నప్పుడు దేవుని ఆలోచన ఏమిటో తెలుసుకోకుండా నాతాను యెహోవా నీకు తోడుగా నున్నాడు, నీకు తోచినట్లు చెయ్యమని చెప్పటం దుడుకుతనం.

ఎవరితోనైనను మందిరమొకటి మీరు నాకు కట్టింపక పోతిరే అని నేనెన్నడైనను అన్నానా? ఈ మాటలు దేవుడు తన ప్రజల మధ్య గుడారములో ఉండటం ఆయనకు సంతృప్తిగానే ఉందనే విషయాన్ని ప్రస్తుతమైతే మందిరాన్ని కట్టమని నేను అడగటం లేదు కోరుకోవడం లేదనే విషయాన్ని తెలియజేస్తున్నాయి. మరైతే దావీదు పట్ల దేవుని ఆలోచన ఏమిటి?

దేవుడు నో చెప్పడానికి కారణాలు_ 1. దావీదు గొప్ప యుద్ధములు జరిగించి విస్తారముగా రక్తము ఒలికించటం.  ⁸కాబట్టి నీవు నా సేవకుడగు దావీదుతో ఈలాగు చెప్పుము–సైన్యముల కధిపతియగు యెహోవా నీకు సెలవిచ్చున దేమనగా– గొఱ్ఱెల కాపులోనున్న నిన్ను గొఱ్ఱెలదొడ్డిలో నుండి తీసి ఇశ్రాయేలీయులను నా జనులమీద అధిపతిగా నియమించితిని.

దావీదు సైన్యములకధిపతియగు యెహోవా నీకు సెలవిచ్చునదేమనగా అను మాటలకు_ దేవుని మహా సర్వ శక్తివంతమైన సైన్యములకు అధిపతిని + ప్రజలకు కనికరమును చూపుటయందును విడుదల కలుగచేయుట యందును ప్రధానముగా ఆనందించు వాడనైన యెహోవా అను నేను_నీతో చెప్పేదేమిటంటే_ అని అర్ధం.

గొఱ్ఱెల కాపులోనున్న నిన్ను గొఱ్ఱెల దొడ్డిలో నుండి తీసి ఇశ్రాయేలీయులను నా జనుల మీద అధిపతిగా నియమించితిని. మొదటిగా గొఱ్ఱెల కాపులోనున్న నిన్ను గొఱ్ఱెల దొడ్డిలో నుండి తీసి_ అనే మాటలు దావీదు మొదటి స్థితిని (మొదట దావీదు గొర్రెల కాపరిగా ఉండటాన్ని) జ్ఞాపకం చేస్తున్నాయి.

ఇప్పుడు గొర్రెల కాపరియైన దావీదు, దేవుని ప్రజలకు రాజుగా ఉండుట గొప్ప భాగ్యం_ధన్యత. ఆ ధన్యతకు దేవుడే దావీదును ఎన్నుకున్నాడు తప్ప ఈ గౌరవానికి అర్హతకు దావీదు ఏమీ చేయలేదు. దావీదు, గొఱ్ఱెల కాపులోనున్న నీకు సింహాసనం ఇవ్వడం నా నిర్ణయం (ఉద్దేశ్యంతో కూడిన నా నిర్ణయం) ఆ ఉదేశ్యాన్ని నెరవేర్చుకునే క్రమములో చొరవ నాదే, చర్య నాదే. దేవుని కృప మాత్రమే దావీదుకు ఈ ధన్యత ఇచ్చిందనేది స్పష్టం. దేవుడు ఎన్నుకొనిన ప్రజలను నడుపుటకు ఎన్నుకోబడుట ప్రాముఖ్యము గౌరవముతో కూడిన ధన్యతగా ఉంది.

ఇక్కడ మరొక విషయాన్ని  గమనించాల్సి ఉన్నాం_ అదేంటంటే_ సర్వశక్తిగల సైన్యానికి అధిపతి అయిన దేవుడు, తన మాటను జవదాటని సైన్యాన్ని, తనను నిత్యము సేవించుచున్న సైన్యాన్ని కాదని దావీదును పట్టించుకోవడం ధన్యతను ఇవ్వడం గొప్ప విషయం. అసలు దావీదును దేవుడు పట్టించుకోవలసిన అవసరం లేదు. కాని తన గొప్ప ప్రేమలో కృపలో దావీదును పైకిలేవనెత్తడం, విలువను కలుగజేయడం గొప్ప విషయం.

దేవుడు దావీదును ప్రేమించుచున్నాడని దావీదు పట్ల కృపను చూపించుచున్నాడనే విషయాన్ని “యెహోవా నీకు తోడుగానున్నాడు” అనే ప్రవక్త మాటలు “యెహోవా నలుదిక్కుల అతని శత్రువుల మీద అతనికి విజయమిచ్చి అతనికి నెమ్మది కలుగజేసాడు” (1) అనే మాటలు తెలియజేస్తున్నాయి. దేవుని కృప మాత్రమే దావీదుకు సంపూర్ణ విజయము ఇచ్చిందనేది స్పష్టము. దేవుని కృప దావీదు పట్ల లేకపోతే దావీదు ఏదో ఒక యుధ్ధములో మరణించి ఉండేవాడు.

దావీదు ఆలయాన్ని నిర్మించడం దేవుని ప్రణాళిక కాదు. దేవుడు దావీదును ఎందుకని ఎన్నుకొన్నాడో ఆ ఉద్దేశ్యములో దావీదు చేయవలసిన ఇతర పనులు దేవునికి ఉన్నాయి. దేవుని ప్రత్యేకమైన ప్రజలను పాలించడానికి ఒకనిని దేవుడు గొర్రెల దొడ్డి నుండి తెచ్చి రాజును చేసాడు. ఆయనే వానిని విజయవంతునిగా చేసాడు. ఇది తన ప్రజల పట్ల అప్పటి ప్రస్తుత పరిస్థితులలో/వారి భవిష్యత్తులో వారికీ ఏది ప్రాముఖ్యమో వాటి విషయములో దేవుని ఉద్దేశ్యాన్ని తెలియజేస్తుంది.

ఆయనకు మందిరాన్ని ఎవరు కట్టాలో కూడా దేవుడు దావీదుకు తెలియజేశాడు. 1 దినవృత్తాంతములు 22:9,10, నీకు పుట్టబోవు ఒక కుమారుడు సమాధానకర్తగా నుండును; చుట్టు ఉండు అతని శత్రువులనందరిని నేను తోలివేసి అతనికి సమాధానము కలుగ జేతును; అందువలన అతనికి సొలొమోను అను పేరు పెట్టబడును; అతని దినములలో ఇశ్రాయేలీయులకు సమాధానమును విశ్రాంతియు దయచేయుదును. అతడు నా నామమునకు ఒక మందిరమును కట్టించును, అతడు నాకు కుమారుడైయుండును, నేనతనికి తండ్రినై యుందును, ఇశ్రాయేలీయుల మీద అతని రాజ్యసింహాసనమును నిత్యము స్థిరపరచుదును.

సమాధానకర్తగా సమాధానము కలిగిన వ్యక్తి ఆలయాన్ని నిర్మించాలనే ఆలయం యొక్క నిజమైన ఉద్దేశ్యాన్ని ఇది చాలా స్పష్టంగా చూపిస్తుంది. ఆలయంలో దేవుడు తనకు మరియు తన ప్రజలకు మధ్య సమాధానాన్ని తిరిగి నెలకొల్పుతాడు. ఆలయంలో దయగల దేవుడు తన ప్రజల ప్రార్థనలను విని తన సమాధానముతో వారిని ఆశీర్వదిస్తాడు. ఇది కేవలం యుద్ధం లేకపోవడం మాత్రమే కాదు, దేవుడు పరలోకంలో ఉన్నప్పుడు మరియు అతనికి మరియు ప్రపంచానికి మధ్య అంతా సరిగ్గా ఉన్నప్పుడు తీసుకువచ్చే సానుకూల శ్రేయస్సు స్థితిని గురించి తెలియజేస్తుంది.

సొలొమోను, యేసు పరిపూర్ణంగా తెచ్చిన సమాధానాన్ని తాత్కాలికంగా మాత్రమే తీసుకురాగలడు. కాని ప్రతి మానవ హృదయం కోరుకునే సమాధానం పరిపూర్ణంగా యేసు మాత్రమే ఇవ్వగలడు. ఆయన సమాధానికి అధిపతి మరియు గొప్ప విశ్రాంతిని ఇచ్చేవాడు. ప్రయాసపడి భారము మోసికొనుచున్న సమస్త జనులారా, నా యొద్దకు రండి; నేను మీకు విశ్రాంతి కలుగజేతునని ఆయన వాగ్దానం చేసాడు, మత్తయి 11:28. ఇది పాప క్షమాపణ మరియు దేవునితో మన సంబంధాన్ని పునరుద్ధరించడంతో ప్రారంభమవుతుంది.

అన్వయము: దేవుడు మనలను  ప్రేమించుచున్నాడనేది, మనపట్ల కృపను చూపించుచున్నాడనేది బహు స్పష్టం. దేవుడు మన పట్ల ఎలా వ్యవహరించాడో/ వ్యవహరిస్తున్నాడో ఒక్కసారి జ్ఞాపకము చేసుకోండి. మనము ఒక్కప్పుడు ఎలాంటి పరిస్థితులలో ఉండేవారం?

ఆత్మీయమైన విషయములో_ మన అపవిత్రతను బట్టి దేవుని సన్నిధానము నుండి వెలివేయబడిన వారముగా ఉన్న మనలను, మన పాపములను బట్టి దేవునికి అసహ్యులముగా ఉన్న మనలను, మన అవిధేయతను బట్టి దేవుని ఉగ్రతకు పాత్రులముగా ఉన్న మనలను, మన దోషములను బట్టి శిక్షార్హులముగా ఉన్న మనలను, మన అతిక్రమములను బట్టి దేవుని దృష్టికి అనర్హులముగా ఉన్న మనలను, మన అపరాధములను బట్టి పనికిరాని వారముగా ఉన్న మనలను, మన స్వనీతిని బట్టి ఆయన దృష్టికి మురికి గుడ్డలు ధరించుకొని తిరుగుబాటు ధారులుగా ఉన్న మనలను, దేవుడు తన కృపలో ఎన్నుకున్నాడు.

లోకరీతిగా_ ఒకప్పుడు మనమేమైయున్నామో ఎలా ఉండేవారేమో, ఏమి ఉండేదో, ఏమిలేదో మనకు తెలుసు. మరోలా చెప్పాలంటే_ కొన్నిసార్లు_ బంధువులకు దూరముగా, స్నేహితులు లేక, కుటుంబ సభ్యుల చేయూత లేక కన్నీటితో ఒంటరిగా బ్రతికిన రోజులు లేవా? విలువలేనివాడవుగా, గుర్తించబడని వాడవుగా ఇతరులు నీ పట్ల వ్యవహరిస్తూ ఉంటే నిస్సహాయులుగా బాధతో బ్రతికిన రోజులు లేవా? నీ పేదరికాన్ని బట్టి, ప్రజలు నీ పట్ల కఠినముగా వ్యవహరించిన రోజులు లేవా? నిష్ప్రయోజకున్ని అనుకొన్న నిన్ను దేవుడు ప్రేమించుచు తన కృపలో నిన్ను ఎన్నుకొని యున్నాడనేది స్పష్టం. అందుకు ఆయన ప్రేమ కృపలే కారణం.

సర్వశక్తిమంతుడు మరియు ప్రజలకు కనికరాన్ని చూపుటయందును విడుదల కలుగచేయుట యందును ప్రధానముగా ఆనందించు దేవుడు తన కుమారుని ద్వారా తన కుటుంబము లోనికి ఈ రోజు నిన్ను చేర్చు కోవాలను కొన్నది నిన్నుతన కుటుంబంలోకి ఆహ్వానించాలనేది ఆయన నిర్ణయం. అందుకు మనం చేసినది ఏమి లేదు, చొరవ దేవునిదే, చర్య దేవునిదే. ఆయనే క్రీస్తు ద్వారా మన స్థితిని మార్చి మనకు గొప్ప ధన్యతను సమాధానాన్ని కలుగచేసియున్నాడు. ఈ విషయం ఏమి తెలియజేస్తుందో తెలుసా? ఆయన అపాత్రుల పట్ల కనికరయుతుడై యున్నాడు అని తెలియజేస్తూవుంది.

2

⁹నీవు పోవు చోట్లనెల్లను నీకు తోడుగానుండి నీ శత్రువులనందరిని నీ యెదుట నిలువకుండ నిర్మూలముచేసి, లోకములోని ఘనులైన వారికి కలుగు పేరు నీకు కలుగజేసియున్నాను. ¹⁰మరియు ఇశ్రాయేలీయులను నా జనులు ఇకను కదిలింపబడకుండ తమ స్వస్థలమందు నివసించునట్లు దానియందు వారిని నాటి, పూర్వము ఇశ్రాయేలీయులను నా జనుల మీద నేను న్యాయాధిపతులను నియమించిన తరువాత జరుగుచు వచ్చినట్లు దుర్బుద్ధిగల జనులు ఇకను వారిని కష్టపెట్టకయుండునట్లుగా చేసి ¹¹నీ శత్రువుల మీద నీకు జయమిచ్చి నీకు నెమ్మది కలుగజేసియున్నాను మరియు యెహోవానగు నేను నీకు తెలియజేయునదేమనగా –నేను నీకు సంతానము కలుగ జేయుదును.

యెహోవా తన నిర్ణయం, చొరవ, చర్యలో దావీదును యెట్లు ఆశీర్వదించియున్నాడో చెప్తూ, ⁹నీవు పోవు చోట్లనెల్లను నీకు తోడుగా నుండి నీ శత్రువులనందరిని నీ యెదుట నిలువకుండ నిర్మూలము చేసి లోకము లోని ఘనులైన వారికి కలుగు పేరు నీకు కలుగజేసియున్నాను.

పోవు చోట్లనెల్లను తోడుగా నుండి (always/every place)_ ఒక్క చోటుకు, కొన్ని క్షణాలు, లేదా కొన్ని పరిస్థితులకు మాత్రమే పరిమితమని దీని అర్ధం కాదు. రాజైన దావీదు జీవితాన్ని పరిశీలిస్తే, దేవుడు దావీదుకు ఎలా తోడుగా ఉన్నాడో మనం చూడొచ్చు. దావీదు జీవితం నుండి ఒక విషయాన్ని మీకు గుర్తుచేయాలను కొంటున్నాను_ మొదటిగా, దేవుని నిర్ణయాన్ని బట్టి దావీదు రాజుగా అభిషేకింపబడ్డాడు. సౌలు దావీదుకు రాజ్యాన్ని వెంటనే ఇవ్వలేదు, 13 సంవత్సరాలు సౌలు దావీదును చంపడానికి ప్రయత్నించాడు. దావీదు తన ప్రాణం చేతపట్టుకొని పరిగెడుతూనే ఉన్నాడు. దావీదు ఎప్పుడు దీని విషయమై దేవునికి ఫిర్యాదు చెయ్యలేదు. నిర్ణయం దేవునిదే, చొరవ దేవునిదే, చర్య దేవునిదే అని దావీదు నమ్మాడు. సౌలు దావీదును చంపలేక పోయాడు. దావీదు యెరూషలేమును తన రాజధానిగా చేసుకున్నప్పుడు ఆ ప్రాంతములో నివసించుచున్న బలవంతులైన యెబూసీయులు తమ ప్రాంతము నుండి దావీదును దూరముగా ఉంచడానికి చాలా ప్రయత్నించారు, కాని దావీదును గెలవలేకపోయారు. దావీదు పాలస్తీనాను పాలిస్తున్నప్పుడు, ఫిలిష్తీయులు మాటిమాటికి దావీదు మీద దాడి చేసినప్పటికిని దావీదును గెలవలేకపోయారు.

ఫిలిష్తీయుల పై చేసిన యుద్దాలలో (1 సమూయేలు 18:6–7; 2 సమూయేలు 5:17–25; 8:1), మోయాబీయుల పై చేసిన యుద్దాలలో, (2 సమూయేలు 8:2), సిరియన్లు/ అరామీయులపై చేసిన యుద్దాలలో, (2 సమూయేలు 8:3–6, 10–12; 10:6–19) ఎదోమీయులపై చేసిన యుద్దాలలో (2 సమూయేలు 8:13–14; 1 దినవృత్తాంత ములు 18:12–13), అమ్మోనీయులపై చేసిన యుద్దాలలో (2 సమూయేలు 10:1–19; 12:26–31), అమాలేకీయుల పై చేసిన యుద్దాలలో (1 సమూయేలు 30:1–20) ఆయన దావీదుకు తోడుగా ఉన్నాడు.

సౌలు ఇంటిపై ఇష్బోషెతు కుటుంబంపై, సౌలు కుమారుడి మద్దతుదారులుపై (2 సమూయేలు 2–4), కీర్తనలలో పేర్కొనబడిన వివిధ శత్రువులు పై (కీర్తన 18, 21, 144) సాధించిన విజయములో ఆయన దావీదుకు తోడుగా ఉన్నాడు.

నీ శత్రువులనందరిని నీ యెదుట నిలువకుండ నిర్మూలముచేసి, నిర్మూలము చేయటం అనే మాటకు అర్ధం, ఒక కలుపు మొక్కను తీసివేసి దానిని నశింపజేయటం.

ఆయన నీ శత్రువులనందరిని నీ యెదుట నిలువకుండ అంటే (కలుపు మొక్కను పెరికి పారవేసినట్లుగా) ఆయన వారిని నిర్మూలము చేస్తూవున్నాడు. కాని మన అవిశ్వాసంను బట్టి ప్రతిరోజు ఎందరో శత్రువులను మన జీవితంలోనికి ఆహ్వానిస్తూ ఉన్నాం. దేవుని మాటలను విని వాటి ప్రకారము చేస్తూ, జీవించవలసియున్న మనం అవిశ్వాసమును దాని స్వభావమును బట్టి, మనము మన జీవితములో ప్రతి రోజు కలుపు మొక్కలను నాటుకొంటుంటే, నీ దేవుని పని వాటిని పీకి పారవేయడమా? విశ్వాసి అనుకొంటున్న అవిశ్వాసి, మారవా? నువ్వు నీ జీవితము లోనికి ఆహ్వానించిన నీ శత్రువులైన నీ స్నేహితులు నిన్ను దేవునికి దూరం చేస్తున్నారు, చూసుకొ, సరిచేసుకో. యేసుకు శత్రువు స్నేహితుడు అయిన యూదా ఇస్కరియోతు యేసు జీవితములో కూడా ఉన్నాడు. యేసయ్య వానికి స్నేహితునిగా ఉండటానికి  వానిని పిలిచాడు. వాడు యేసును మరణానికి అప్పగించాడు. నువ్వు స్నేహించి నీ జీవితము లోనికి ఆహ్వానించిన నీ శత్రువులు నువ్వు దేవుని దీవెనలో ఉండకుండా తప్పించడానికి ప్రయత్నిస్తున్నారు, గుర్తిస్తున్నారా?

లోకములోని ఘనులైన వారికి కలుగు పేరు నీకు కలుగజేసియున్నాను, దేవుడు దావీదుకు లోకములోని ఘనులైన వారికి కలుగు పేరును కలుగజేశాడు. దావీదు సంతానమైన మెస్సయ్యకు, దేవుని కుమారుడైన క్రీస్తుకు పరలోకమందున్న వారిలో గాని, భూమిమీద ఉన్నవారిలో గాని, భూమి క్రింద ఉన్నవారిలో గాని, ప్రతివాని మోకాలును యేసునామమున వంగునట్లును, ప్రతివాని నాలుకయు తండ్రియైన దేవుని మహిమార్థమై యేసుక్రీస్తు ప్రభువని ఒప్పుకొనునట్లును, దేవుడు ఆయనను అధికముగా హెచ్చించి, ప్రతి నామమునకు పైనామమును ఆయనకు కలుగజేసి యున్నాడు.

నేడు మనకును కలుగజేశాడు_ కొడుకులు కూతుళ్లు అని అనిపించుకొనుట కంటె శ్రేష్ఠమైన కొట్టివేయబడని నిత్యమైన పేరు మీకు పెట్టియున్నాడు. మీ పేరులు పరలోకమందు వ్రాయబడియున్నవి, మీరు ఏర్పరచబడిన వంశమును, రాజులైన యాజక సమూహమును, పరిశుద్ధ జనమును, దేవుని సొత్తయిన ప్రజలునై యున్నారు.

ఇశ్రాయేలీయులను నా జనులు ఇకను కదిలింపబడకుండ తమ స్వస్థలమందు నివసించునట్లు దాని యందు వారిని నాటుదును అను మాటలకు, ఆనాడు ఇశ్రాయేలీయులు చుట్టూ అనేకమైన జాతులు రాజ్యాలున్నాయి. వాళ్ళు తన ప్రజలను నాశనము చేయకుండా కాపాడుదునని దేవుడు వాగ్దానము చేస్తున్నాడు. ఎందుకంటె ఇశ్రాయేలీయులను ఎన్నుకొనిన నిర్ణయం దేవునిదే చొరవ దేవునిదే చర్య దేవునిదే. ఇప్పటి వరకు ఆ వాగ్దానాన్ని మనము చూస్తునే ఉన్నాం.

ఈ వాగ్దానము 3000 సంవత్సరాల క్రిందటిదైనను ఈ వాగ్దానము మనకు కూడా వర్తిస్తుంది. దేవుని కనికరము దావీదుకు గొప్ప స్థితిని కలుగజేసింది. దేవుని ప్రేమకు దావీదు అర్హుడు కానప్పటికిని దేవుడు ఆతని యెడల చూపించిన అపారమైన ప్రేమే దావీదును గొప్ప స్థితిలో నిలిపింది. ఈ రోజు మీరు కూడా దేవుని కుమారుడైన క్రీస్తును బట్టి దేవునికి అమూల్యమైన వారుగానే ఉన్నారు. ఎందుకంటె మిమ్మల్ని ఎన్నుకొనిన నిర్ణయం దేవునిదే, చొరవ దేవునిదే, చర్య దేవునిదే కాబట్టి. ఆయన ప్రేమ కృపలే ఇందుకు కారణం కాబట్టి. ఆయనను బట్టి కాపాడబడుతూనే ఉన్నారు.

యెహోవానగు నేను నీకు తెలియజేయున దేమనగా–నేను నీకు సంతానము కలుగజేయుదును. దావీదుకు ఒక విషయంలో దేవుడు ఇచ్చిన “నో”ను ఆయన జీవితంలోని ప్రతి ఇతర ప్రాంతంలోనూ “నో”గా పరిగణించకూడదు. దేవుడు కొన్నిసార్లు ఒక తలుపును మూసివేస్తాడు, తద్వారా మనకు మరింత అనుకూలంగా ఉండే మరొక తలుపును తెరుస్తాడు.

దావీదు దేవుని మందిరాన్ని నిర్మించడానికి ఉపయోగించబడతాడని ప్రభువు హామీ ఇచ్చాడు, కానీ అతను ఊహించినట్లుగా కాదు. నీ దినములు సంపూర్ణములగునప్పుడు నీవు నీ పితరులతోకూడ నిద్రించిన తరువాత నీ గర్భములో నుండి వచ్చిన నీ సంతతిని హెచ్చించి, రాజ్యమును అతనికి స్థిరపరచెదను. అతడు నా నామ ఘనత కొరకు ఒక మందిరమును కట్టించును; అతని రాజ్యసింహాసనమును నేను నిత్యముగా స్థిరపరచెదను. ఆ మాటల తక్షణ నెరవేర్పు ఏమిటంటే, దావీదు కుమారుడైన సొలొమోను ఆలయ నిర్మాణాన్ని పర్యవేక్షిస్తాడు. ఈ వాగ్దానంలో మరొక గొప్ప వాగ్దానం కూడా ఉంది. నీ రాజ్యసింహాసనమును నేను నిత్యముగా స్థిరపరచెదను, అంటే “నీ ఇల్లు నీ రాజ్యం నా ముందు శాశ్వతంగా ఉంటాయి; నీ సింహాసనం శాశ్వతంగా స్థిరపరచబడుతుంది.” దావీదు, రక్షకుడు నీ కుటుంబం నుండి వస్తాడు, మరియు అతనిలో నీ సింహాసనం శాశ్వతంగా స్థిరపరచబడుతుంది. ఇది మొదలుకొని మితిలేకుండ దానికి వృద్ధియు క్షేమమును కలుగునట్లు సర్వకాలము దావీదు సింహాసనమును రాజ్యమును నియమించును. న్యాయమువలనను నీతివలనను రాజ్యమును స్థిరపరచుటకు అతడు సింహాసనాసీనుడై రాజ్య పరిపాలన చేయును. సైన్యములకధిపతియగు యెహోవా ఆసక్తికలిగి దీనిని నెరవేర్చును (యెషయా 9:7) అని యెషయా తెలియజేశాడు. ఇక్కడ సొలొమోను కంటే గొప్ప వ్యక్తిని ఉద్దేశించి ఈ మాటలు చెప్పబడ్డాయి. అది మరెవరో కాదు యేసుక్రీస్తు. యేసేపు మరియ ఇద్దరూ దావీదు వంశానికి చెందిన వారే. కాబట్టే తన పరిచర్య దినాల్లో, యేసు, ఇదిగో సొలొమోనుకంటె గొప్పవాడు ఇక్కడ ఉన్నాడు (మత్తయి 12:42) అని చెప్తూ ఈ విషయాన్ని స్పష్టం చేశాడు.

ఈ రోజు ఆయన నీకును తోడుగా ఉన్నాడు. ఇదిగో కన్యక గర్భవతియై కుమారుని కనును. ఆయనకు ఇమ్మాను -యేలు అను పేరు పెట్టుదువు ఇమ్మానుయేలు అను మాటకు దేవుడు మనకు తోడు అని అర్ధం. నీవు పోవు చోటెల్లా నీకు తోడుగా ఉండుటకే ఆయన వచ్చాడు. అందుకు మనమేమి చెయ్యలేదు, ఆయన ప్రేమ కృపలే కారణం.

ఆయన నీతో ఉన్నాడు. ప్రతివిషయములో నిన్ను భయపెడుతూ ఇబ్బందులకు గురిచేస్తూవున్న నీ శత్రువుల నుండి నిన్ను తప్పించడానికి, నీవు నమ్మదగినవానిగా, నీకు స్నేహితునిగా, సన్నిహితునిగా, నీ పక్షమందుండు వానిగా, నీకు ఆలోచనకర్తగా, నిన్ను సరియైన దిశలో నడిపించు వానిగా, నీ పక్షమందుండి యుద్ధము చేయు వానిగా, నీ మంచి చెడ్డలను పట్టించుకొను వానిగా, ఆఖరికి నీవు మరణం లోనికి దిగిననూ నీకు తోడుగా ఉండుటకు ఆయన నీతో ఉన్నాడు, నమ్ము.

గుర్తిపులేని గొర్రెల కాపరిని దేవుడు ఎన్నుకొని అతని శత్రువులు అతనిని ఎన్నడూ జయించకుండా ఉండేటట్లు దేవుడే చేసాడు. దేవుని చేత ఎన్నుకోబడిన మనమందరం కూడా శత్రువుల చేత జయింపబడకుండునట్లు ఈ వాగ్దానము మనకు కూడా వర్తిస్తుంది. ఈ మాటలు ఏమి తెలియజేస్తున్నాయంటే, ఆయన తన స్వంతమైన వారి పట్ల తాను పిలుచుకొనిన వారి పట్ల ఆయన కనికరమును చూపుచున్నాడు అని తెలియజేస్తున్నాయి.

3

¹⁶నీ మట్టుకు నీ సంతానమును నీ రాజ్యమును నిత్యము స్థిరమగును, నీ సింహాసనము నిత్యము స్థిరపరచ బడును. దావీదూ, నీ కుమారుని బట్టి నీ రాజ్యమునకు అంతం ఉండదని నీ రాజ్యము శాశ్వతమని దేవుడు తెలియజేస్తున్నాడు. దురదృష్టవశాత్తు ఇశ్రాయేలీయులు ఈ మాటలను ఈ లోకరీతిగా ఈ లోకసంబంధమైన రాజ్యానికి అన్వయించుకొంటున్నారు. మన పాఠము ఈ లోకసంబంధమైన రాజ్యమును గురించి మాట్లాడటం లేదు.

ఇక్కడ దావీదు సంతానమైన మెస్సయ్య ద్వారా తాను స్థాపింపబోవుచున్న రాజ్యమును గూర్చి దేవుడు మాట్లాడుతున్నాడు. దావీదు కుమారుడైన మెస్సయ్య యేసే. ఆయన వచ్చాడు, మహిమయుక్తమైన కృపా రాజ్యమును స్థాపించాడు. దేవుడు ప్రేమతో ప్రజల హృదయాలను పాలిస్తున్నాడు. ఆ రాజ్యము శాశ్వతమైన రాజ్యముగా విశ్వవ్యాప్తితమై అందరికి సంబంధించిన రాజ్యమైయున్నది.

ఇశ్రాయేలును దావీదు తరువాత అసీరీయులు, బబులోనీయులు నాశనము చేసినట్లుగా, యేసు తరువాత రోమీయులు నాశనము చేసినట్లుగా, ఇశ్రాయేలు మరొకసారి వారి శత్రువుల చేత నాశనము చెయ్యబడొచ్చు. కాని దావీదు సంతానము ద్వారా దేవుడు స్థాపించిన ఆయన రాజ్యములో అలా జరగదు. ప్రపంచము ఉన్నంత కాలము ఆయన రాజ్యము కొనసాగుతూనే ఉంటుంది, అభివృద్ధి చెందుతూనే ఉంటుంది. ఈ ప్రపంచము ముగిసినప్పుడు ఆ రాజ్యము ఇంకా మహిమయుక్తమైన రాజ్యముగా ఉంటుంది. ఆయన రాజ్యములో నివసించేవాళ్ళు శాశ్వత కాలము జీవిస్తారు.

ముగింపు: మన తండ్రియైన దేవుడు మన పట్ల ఎలా వ్యవహరించాడో జ్ఞాపకం చేసుకున్నాం. నిష్ప్రయోజకులం అనుకొన్న మనలను దేవుడు ప్రేమించుచు కృపలో ఎన్నుకొని యున్నాడనేది స్పష్టం అని అందుకు ఆయన ప్రేమ కృపలే కారణం అని తెలుసుకున్నాం. సర్వశక్తిమంతుడు మరియు ప్రజలకు కనికరమును చూపుట యందును, విడుదల కలుగచేయుట యందును ప్రధానముగా ఆనందించు దేవుడని తన కుమారుని ద్వారా తన కుటుంబము లోనికి ఈ రోజు నిన్ను చేర్చుకోవాలనుకొన్నది మనలను తన కుటుంబంలోకి  ఆహ్వానించాలనేది  ఆయన నిర్ణయం అని, చొరవ చర్య దేవునిదేనని తెలుసుకున్నాం. అపాత్రులమైన మన స్థితిని మార్చి మనకు గొప్ప ధన్యతను కలుగచేసియున్న దేవునికి కృతజ్ఞతను తెలియజేస్తూ జీవిధ్ధాం.

మనలను దేవుని ప్రేమకు కృపకు పాత్రులుగా ఎంచిన మన దేవుడు నిజముగా ప్రజలకు కనికరమును చూపుటయందును విడుదల కలుగచేయుట యందును ప్రధానముగా ఆనందించువాడనే విషయాన్ని మరచి పోకుందాం. ఆయన మనకు తోడుగా ఉన్నాడని నమ్ముదాం. మనలను మన దేవునికి దూరము చేసే శత్రువులను గుర్తించి దేవుని సహాయమును వేడుకొందాం. దేవుడు మనకిచ్చిన గుర్తిపును పోగొట్టుకోకుండా ఉందాం. మనము దేవుని శాశ్వతమైన రాజ్యములో సభ్యులమని మరచి పొకుందాం. అట్లే మనలను విశ్వాసమునందు బలపరచుట ద్వారా మన హృదయాలలో క్రీస్తు పాలనను ఆయనే వ్యాపింపజేయాలని కోరుకొందాం. క్రీస్తు రాజ్యము తన మహిమ నంతటిని కనపరచుచుండగా సాతాను రాజ్యములన్ని ఒక పాతకాలపు జ్ఞాపకం వలె కనుమరుగవును గాక, ఆమేన్. .

దేవుని వాక్యాన్ని దాని స్వచ్చతలో భవిషత్ తరాలకు అందించాలనే ఉద్దేశ్యంలో దానిని భద్రపర్చాలనే ఈ చిన్న ప్రయత్నాన్ని ప్రోత్సహించండి. ఇది శ్రమతో ఖర్చుతో కూడుకొన్నది కాబట్టి ఈ ప్రయత్నంలో భాగస్వాములు కండి, చేయూతనివ్వండి, దేవుడు మిమ్మును దీవించును గాక. – రెవ. కూరపాటి విజయ్ కుమార్. ఫోన్ పే యూపీఐ ఐడి – 9848365150-2@ybl

KURAPATI VIJAY KUMAR,
HDFC BANK, Account no 50200096563465,
IFSC code. HDFC0005872,
Swift code HDFCINBB,
JKC College Road Branch, GUNTUR 522006,
ANDHRA PRADESH, INDIA.
The phone pay UPI Id : 9848365150-2@ybl