మత్తయి సువార్త 2వ అధ్యాయము

జ్ఞానులు మెస్సీయను సందర్శించుట 1-12

¹రాజైన హేరోదు దినముల యందు యూదయదేశపు బేత్లెహేములో యేసు పుట్టిన పిమ్మట ఇదిగో తూర్పు దేశపు జ్ఞానులు యెరూషలేమునకు వచ్చి ²యూదులరాజుగా పుట్టిన వాడెక్కడ నున్నాడు? తూర్పు దిక్కున మేము ఆయన నక్షత్రము చూచి, ఆయనను పూజింప వచ్చితిమని చెప్పిరి. ³హేరోదు రాజు ఈ సంగతి విన్నప్పుడు అతడును అతనితో కూడ యెరూషలేము వారందరును కలవరపడిరి.

ఆ కాలపు పరిస్థితి
ఆ రోజుల్లో రోమా సామ్రాజ్యాన్ని అగస్టస్ చక్రవర్తి పాలిస్తున్నాడు. అనేక దేశాలు రోమా ఆధీనంలో రోమన్ సామ్రాజ్యం క్రింద ఉండేవి. వివిధ దేశాల మధ్య ప్రయాణం సులభంగా సురక్షితంగా ఉండేది. చట్టవ్యవస్థ కూడా బలంగా ఉండేది. గ్రీకు భాష చాలా ప్రాంతాల్లో వాడుకలో ఉండేది. ప్రపంచం ప్రశాంతంగా ఉంది. మెస్సయ్యను పరిచయం చేయడానికి మరియు భూమిపై సువార్తను వ్యాప్తి చేయడానికి అన్ని అనుకూలమైన పరిస్థితులు ఏర్పడ్డాయి. అన్ని దేశాలలో క్రైస్తవత్వం సులభంగా ప్రబలంగా వ్యాప్తి చెందడానికి దేశాలను ఈ పద్ధతిలో అమర్చడంలో దేవుని సంరక్షణ చాల గొప్పది.

హేరోదు ఎవరు?
హేరోదు ఏశావు వంశస్థుడు, ఎదోమీయుడు, ఇశ్రాయేలీయుడు కాడు. హేరోదు యూదయ యొక్క రోమన్ ప్రొక్యూరేటర్ యైన యాంటీపేటర్ కుమారుడు. అతనికి ఇరవై ఐదు సంవత్సరాల వయస్సులో గలిలయ గవర్నర్ పదవి దక్కింది. తరువాత అతడు దక్షిణ సిరియా మరియు డెకాపోలిస్‌తో సహా లెబనాన్ మరియు యాంటీ లెబనాన్ పర్వత శ్రేణుల మధ్య సారవంతమైన లోయ అయిన కోయెల్-సిరియాకు గవర్నర్ అయ్యాడు. తరువాత రోమన్ ట్రయంవిర్ ఆంటోనీచే టెట్రార్క్‌గా నియమించబడ్డాడు. ఎల్లప్పుడూ అసురక్షితంగా ఉండే తన ప్రావిన్స్ నుండి మక్కాబియన్ ఆంటిగోనస్ చేత తరిమివేయబడి ఇతడు రోమ్‌కి పారిపోయాడు. ఆంటోనీ మరియు అగస్టస్‌ల సహాయం పొందాడు. తర్వాత రోమన్ సెనేట్ ద్వారా యూదయకు రాజుగా నియమింపబడ్డాడు. ఆయుధ బలంతో తనకు అప్పగింపబడిన ప్రాంతాన్ని గెల్చుకోవల్సి వచ్చింది. దానిని స్వాధీనం చేసుకున్న తరువాత అతడు తన అధికారాన్ని క్రూరమైన నిర్ధాక్షిణ్యమైన పద్ధతిలో తన బలసంపదలను ప్రదర్శించడానికి ఉపయోగించాడు.

యేసు జన్మించినపుడు యూదయను పాలిస్తున్న ఈ హేరోదు, హేరోదులలో మొదటివాడు. ఎంతో తెలివైన సమర్థుడైన యోధుడు, వక్త మరియు దౌత్యవేత్త. అతడు ప్రజల వినోదం కోసం థియేటర్లు మరియు రేసు ట్రాక్‌లను నిర్మించాడు. 19 బి.సిలో యెరూషలేములోని ఆలయాన్ని పునర్నిర్మించడం ప్రారంభించాడు, ఓడరేవు నగరం సిజేరియా, మరియు మసాడా కోటను కూడా నిర్మించాడు. 25 బి.సి లో వచ్చిన గొప్ప కరువు కాలములో, అతడు పేదలకు సహాయం చెయ్యడానికి తన కోటలోని కొన్ని బంగారు వస్తువులను కరిగించి వాటిని అమ్మి ప్రజలకు సహాయం చేసిన సందర్భాలు కూడా ఉన్నాయి.

హేరోదు నిజంగా యూదుల చరిత్రలో గొప్ప బిల్డర్లలో ఒకడు, కాబట్టే ఇతనిని హేరోదు ది గ్రేట్ అని పిలుస్తారు. అద్భుతమైన ఆలయాన్ని నిర్మించడం ద్వారా మతపరంగా ఎంతో ప్రభావవంతమైన పరిసయ్యుల పార్టీ మనస్సులను గెల్చుకొన్నాడు. తన రాజ్యములోని ఇతర అన్యమతస్థులను కూడా సంతోషపెట్టే క్రమములో అతడు గ్రీసియన్ ఆచారాలను ప్రవేశపెట్టడం ద్వారా రోమ్ యొక్క అభిమానాన్ని కూడా పొందాడు.

అయితే హేరోదు చాలా క్రూరుడు, అనుమాన స్వభావం గలవాడు, కనికరం లేని వాడు, అసూయపరుడు, తన ప్రత్యర్ధ్ధులను ఎందరినో నిర్దాక్షణంగా చంపించిన వాడు. హేరోదుకు 10మంది భార్యలు. అతడు తనపై కుట్ర పన్నారనే ఆరోపణతో తన 2వ భార్యయైన అస్మోనియన్ మరియమ్నేని ఉరితీశాడు. ఆమె ద్వారా తనకు కలిగిన ఇద్దరు కుమారులను, ఆమె తల్లిని, భార్య సహోదరుని చంపించాడు. యేసుని జన్మములో, బేత్లెహేములోను దాని చుట్టుప్రక్కల ప్రాంతాలలోను, రెండు సంవత్సరములు మొదలుకొని తక్కువ వయస్సుగల మగపిల్లలనందరిని నిర్దాక్షణంగా చంపించిన వాడు. ఇతని స్థిమితంలేని మనస్తత్వాన్నిబట్టి ప్రజలు ఇతనిని ఎంతగానో అసహ్యించుకొన్నారు. అతడు తన మరణానికి ముందు, యెరూషలేములోని అత్యంత విశిష్టమైన నాయకులను, అధికారులను, పౌరులను జైలులో పెట్టించి తాను మరణించిన సమయంలోనే వారిని ఉరి తీయాలని ఆదేశాలు ఇచ్చాడు. తన మరణము ప్రజలకు సంతోషాన్ని కలుగజేస్తుందని అతనికి తెలుసు. ఆ విధంగా అతడు మరణించిన టైములో ప్రజలు సంతోషపడకుండా నగరమంతటా శోకం ఉండేలా చేసాడు.

యూదయ దేశపు బేత్లెహేములో, బేత్లెహేము యెరూషలేముకు దక్షిణంగా 8 కిలోమీటర్ల దూరములో ఉన్న ఒక చిన్న గ్రామము. ఇది దావీదు రాజు యొక్క స్వగ్రామము. బేత్లెహేము దాని సారవంతమైన భూములను బట్టి చాల చాల ప్రత్యేకమైనది. బేత్లెహేముకున్న మరొక ప్రాచీనమైన పేరు ఎఫ్రాతా (ఆదికాండము 35:19; రూతు 1:19; 1 సమూయేలు 16:4; మీకా 5:2).

బేత్లెహేము ఒక చిన్న, గుర్తింపులేని గ్రామమైనప్పటికి, దేవుడు తన కుమారుడైన మెస్సీయ జన్మించే ప్రదేశంగా దానిని ఎంచుకున్నాడు. యేసు బేత్లెహేములో జన్మించడానికి యేసేపు మరియ దాదాపుగా 120 కిలోమీటర్ల ఉత్తరాన్న ఉన్న నజరేతు నుండి బేత్లెహేముకు ప్రయాణము చేసి వచ్చారు (లూకా 2:4).

యేసు పుట్టిన పిమ్మట ఇదిగో తూర్పు దేశపు జ్ఞానులు, యేసు పుట్టిన వెంటనే గొర్రెల కాపరులు ఆయనను దర్శించారు. కానీ జ్ఞానులు మాత్రం కొంతకాలం తరువాత వచ్చారు.

గొర్రెల కాపరులతో పాటు జ్ఞానులు శిశువైన యేసును ఆరాధించినట్లు ఉన్న ఫొటోస్ ని, చిత్రకారులు గీసిన చిత్రాలను మన మందరం చూసే ఉంటాం. నిజానికి, జ్ఞానులకు గొర్రెల కాపరులకు సంబంధమే లేదు. అందువల్ల గొర్రెల కాపరులు మరియు జ్ఞానులు ఒకేసారి యేసును దర్శించినట్లు చూపించే చిత్రాలు బైబిల్ వివరాలకు పూర్తిగా సరిపోవు. జ్ఞానుల పేర్లు బైబిలులో చెప్పబడలేదు. కాని 6వ శతాబ్దంలో ఇటలీలోని రావెన్నలోని చర్చిలో దొరికిన వ్రాత ప్రతులలో మొదటిసారిగా జ్ఞానుల పేర్లు కనిపించాయి. Tradition వీరి పేర్లను కాస్పర్, బాల్తాజార్ మరియు మెల్చియోర్ అని చెప్తుంది, కానీ ఇది బైబిల్ ఆధారంగా కాదు.

వారు ఎక్కడి వారు అనే విషయాన్ని కూడా బైబిల్ స్పష్టంగా చెప్పదు. కొందరు వారిని బబులోనుకు చెందినవారని, మరికొందరు పర్షియా లేదా అరేబియాకు చెందినవారని భావిస్తారు. బైబిల్ వారిని “తూర్పు దేశపు జ్ఞానులు” అని మాత్రమే చెప్తుంది. ఆ కాలంలో జ్ఞానులు అంటే రాజులకు సలహాలు ఇచ్చే విద్యావంతులు. వారు ఖగోళశాస్త్రం, నక్షత్రాల పరిశీలన వంటి విషయాలలో నిపుణులు. వీళ్ళు ఎంత మంది? ఎక్కడ నుండి వచ్చారు, ఖచ్చితంగా వాళ్ళు ఏ ప్రాంతం నుండి వచ్చారు అనేది బైబిలులో చెప్పబడలేదు. బబులోనీయులకు ఖగోళశాస్త్రంపై ఆసక్తి ఎక్కువగా ఉండేది కాబట్టి, వీరు బబులోను ప్రాంతం నుండి వచ్చి ఉండవచ్చని చాలామంది భావిస్తారు.

ఒకవేళ ఈ జ్ఞానులు బబులోను ప్రాంతం నుండి వచ్చి ఉంటే, వారికి “యూదుల రాజు” గురించి ఎలా తెలిసింది? అనే ప్రశ్న వస్తుంది. దీనికి బైబిల్ ఒక ముఖ్యమైన క్లూ ఇస్తుంది.

జ్ఞానులు యూదులు కాదు. కానీ యూదులు బబులోను చెరలో ఉన్న కాలంలో, దానియేలు అక్కడ గొప్ప అధికారిగా ఉన్నాడు. దానియేలు 2:48 ప్రకారం, రాజు దానియేలును బహుగా హెచ్చించి, అనేక గొప్ప దానము లిచ్చి, అతనిని బబులోను సంస్థానమంతటి మీద అధిపతినిగాను బబులోను జ్ఞానులందరిలో ప్రధానునిగాను నియమించాడు. అందువల్ల మెస్సీయ గురించి, దేవుని వాగ్దానాల గురించి కొంత జ్ఞానం దానియేలు ద్వారా ఆ ప్రాంత ప్రజలకు చేరి ఉండొచ్చు.

ప్రాచీన కాలంలో ఒక నక్షత్రం లేదా తోకచుక్క కనిపించడం గొప్ప సంఘటనకు సూచనగా భావించబడేది. రాజుల పుట్టుక లేదా మరణ సమయాల్లో ఇలాంటి విషయాలను చరిత్రకారులు కూడా నమోదు చేశారు.

సంఖ్యాకాండము 24:17లో, “యాకోబులో ఒక నక్షత్రము ఉదయించును” అనే ప్రవచనం ఉంది. ఇక్కడ “నక్షత్రం” అనేది నిజమైన నక్షత్రం కన్నా మెస్సీయను సూచించే ప్రతీకగా చెప్పబడింది. కానీ తరువాత యూదులలో, ఒక ప్రత్యేకమైన వెలుగు లేదా నక్షత్రం యూదయ భూభాగంలో లేదా ఇశ్రాయేలు దేశంలో కనిపిస్తే అది మెస్సీయ రాకకు సూచన అని ఒక అర్థం ఏర్పడింది. ఈ ప్రవచనం సంప్రదాయంగా రాబోయే తరాలకు అందించబడింది. ఇది జ్ఞానులకు కూడా బాగా తెలిసి ఉండొచ్చు.

కాబట్టి, ఆ జ్ఞానులు ఆ ప్రత్యేకమైన నక్షత్రాన్ని చూసినప్పుడు, యూదులకు వాగ్దానం చేయబడిన రాజు జన్మించాడని అర్థం చేసుకుని ఉండొచ్చు. ఈ జ్ఞానులు ఇశ్రాయేలు దేవుని గురించి గౌరవంతో ఆలోచించారు. లేకపోతే వారు ఎంతో దూరం, ప్రమాదకరమైన ప్రయాణం చేసి వచ్చి శిశువైన యేసును వెతికి ఆరాధించరు. వారు దేవుని వాగ్దానాలను సీరియస్‌గా తీసుకున్నారు.

అందువల్ల దేవుడు ఆ ప్రత్యేకమైన నక్షత్రం ద్వారా ఈ జ్ఞానులను యేసు దగ్గరకు నడిపించాడు. ఇది యేసు కేవలం యూదుల కొరకు మాత్రమే కాదు, అన్ని జనముల కొరకు వచ్చిన రక్షకుడు అనే ఒక గొప్ప సత్యాన్ని తెలియజేస్తుంది.

“తూర్పుదిక్కున మేము ఆయన నక్షత్రము చూచితిమి” అనే మాటకు అర్థం, జ్ఞానులు తూర్పు దేశంలో ఉన్నప్పుడు ఆ నక్షత్రాన్ని చూసారు. దీనర్ధం నక్షత్రం వారికి తూర్పున కాదు, వారు తూర్పున ఉండగా యూదయ దిశలో ఆ వెలుగును చూశారు. అందువల్ల ఆ నక్షత్రం వారికి పశ్చిమ దిశలో కనిపించి ఉండాలి. కాబట్టే వాళ్ళు హేరోదుతో, తూర్పు దిక్కున మేము ఆయన నక్షత్రము చూచితిమి అని చెప్పారు. ఈ నక్షత్రానికి ఆయన నక్షత్రము అని వాళ్ళు పేరుపెట్టారు, ఎందుకంటే అది ఒక ప్రత్యేకమైన రాజు — మెస్సీయ — జన్మాన్ని సూచించే సంకేతమని వారు అర్థం చేసుకున్నారు. ఇది ఆయన పుట్టిన సమయాన్ని మరియు పుట్టిన భూభాగాన్ని సూచించడానికి ఉద్దేశించినదిగా వాళ్ళకి తెలియజేయబడింది.

ఈ నక్షత్రం సాధారణ నక్షత్రం కంటే ఎంతో ప్రత్యేకమైన ప్రకాశవంతమైన వెలుగు అయి ఉండొచ్చు. యూదయ ప్రాంతంపై ఆ వెలుగు కనిపించడాన్ని చూసి, యూదుల రాజు జన్మించాడని జ్ఞానులు నిర్ధారించి ప్రయాణం ప్రారంభించి ఉండొచ్చు.

లూకా 2:8లో గొర్రెల కాపరులకు దూత ప్రత్యక్షమైనప్పుడు, “ప్రభువు మహిమ వారిచుట్టు ప్రకాశించెను” అని చెప్పబడింది. అందువల్ల కొందరు, జ్ఞానులు చూసిన “నక్షత్రం” కూడా దేవుని మహిమకు సంబంధించిన అద్భుతమైన వెలుగే అయి ఉండొచ్చని భావిస్తారు. దేవుడు తన కుమారుని దగ్గరకు జ్ఞానులను నడిపించడానికి ఈ ప్రత్యేకమైన వెలుగును ఉపయోగించాడు.

యూదయ భూభాగంలో నక్షత్రం కనిపించడాన్ని జ్ఞానులు మెస్సీయ పుట్టుకతో ఎలా నిర్ధారించుకొని వచ్చారో బైబిలు చెప్పటం లేదు. రక్షకుడు పుట్టాడు అనడానికి ఈ నక్షత్రాన్ని సంకేతముగా జ్ఞానులు ఎలా తీసుకొన్నారనేది ఊహించడం చాల కష్టం. దేవుడే వారికి ఈ విషయాన్ని తెలియజేశాడని మాత్రమే మనం చెప్పగలం. ఇక్కడ ముఖ్యమైన విషయం ఏమిటంటే, దేవుడు జ్ఞానులను క్రీస్తు దగ్గరకు నడిపించాడు. అలాగే ఈరోజు కూడా దేవుడు తన వాక్యము ద్వారా ప్రజలను యేసుక్రీస్తు దగ్గరకు నడిపిస్తున్నాడు.

ఆ నక్షత్రం వారిలో ఆసక్తిని మేల్కొల్పింది. సాధారణ నక్షత్రాలు చాలా పెద్ద ఖగోళ వస్తువులు. సూర్యుడు కంటే పెద్దవి. అందువల్ల వాటిలో ఒకటి ప్రత్యేకంగా జ్ఞానులకు మార్గనిర్దేశం చేయడానికి వచ్చిందని చెప్పడం సహజంగా అర్థంకాదు. అందుకే శతాబ్దాలుగా ఖగోళ శాస్త్రవేత్తలు ఈ “నక్షత్రం” ఏమై ఉండొచ్చో తెలుసుకోవడానికి ప్రయత్నిస్తున్నారు.

కొంతమంది అది బృహస్పతి మరియు శని గ్రహాల ప్రత్యేక సంయోగం అయి ఉండొచ్చని అంటారు. మరికొందరు తోకచుక్క, సూపర్నోవా, ఉల్కాపాతం లేదా మరొక ఖగోళ సంఘటన అయి ఉండొచ్చని భావిస్తారు. కానీ ఈ వివరణలలో ఏదీ పూర్తిగా సరిపోదు.

అందువల్ల చాలామంది విశ్వాసులు ఇది దేవుడు ప్రత్యేకంగా కలుగజేసిన అసాధారణమైన వెలుగు అని నమ్ముతారు. ఇది సాధారణ నక్షత్రంలా కాకుండా ప్రత్యేకమైన ఉద్దేశ్యంతో కనిపించింది — జ్ఞానులను క్రీస్తు దగ్గరకు నడిపించడానికి.

ఈ నక్షత్రం జ్ఞానులలో ఆసక్తిని మాత్రమే రేపలేదు; వారిని వెతకడానికి ప్రేరేపించింది. వారు దీని అర్థం తెలుసుకోవాలని కోరుకున్నారు. దేవుడు వారికి ఇది మెస్సీయ జననానికి సంబంధించిన సంకేతమని తెలియజేసినప్పుడు, వారు దీన్ని తేలికగా తీసుకోలేదు. వందల మైళ్ళ దూరం ప్రయాణించి, కష్టాలను ఎదుర్కొని, యేసును వెతికారు.

ఇది వారి విశ్వాసాన్ని చూపిస్తుంది. వారు కేవలం ఆకాశంలో ఒక విచిత్రమైన వెలుగును చూసి ఆశ్చర్యపడలేదు; దేవుని వాగ్దానాన్ని నమ్మి చర్య తీసుకున్నారు.

ఇక్కడ ఒక ఆధ్యాత్మిక సత్యం ఉంది: దేవుడు వారికి వెలుగు ఇచ్చాడు. వారు ఆ వెలుగును నిర్లక్ష్యం చేయలేదు. వారు క్రీస్తును వెతికారు. చివరకు ఆయనను కనుగొన్నారు.

అలాగే ఈరోజు కూడా దేవుడు తన వాక్యము ద్వారా మనుష్యులను క్రీస్తు దగ్గరకు పిలుస్తున్నాడు. నిజంగా క్రీస్తును తెలుసుకోవాలని కోరుకునే వారు, కష్టాలు వచ్చినా, అపహాస్యం వచ్చినా, ఆయనను వెతకడం ఆపరు.

ఈ జ్ఞానులు ముఖ్యమైన వ్యక్తులు కావడంతో, వారి ప్రయాణంలో సేవకులు, సహాయకులు మరియు రక్షణ కొరకు మరికొందరు కూడా వారితో కలిసి వచ్చి ఉండవచ్చు. ఎందుకంటే ఇది చిన్న ప్రయాణం కాదు — వందల మైళ్ళ దూరం, కష్టమైన మరియు ప్రమాదకరమైన ప్రయాణం.

ప్రయాణమంతా వారు తమకు తెలిసిన సమాచారాన్ని ఒకరితో ఒకరు చర్చించుకుని ఉండవచ్చు. దేవుని వాగ్దానాలు, మెస్సీయ గురించి వినిన విషయాలు, కనిపించిన నక్షత్రం — ఇవన్నీ కలిపి ఆలోచిస్తూ యెరూషలేముకు చేరుకున్నారు.

వారు నేరుగా బేత్లెహేముకు కాకుండా ముందుగా యెరూషలేముకు వచ్చారు. ఎందుకంటే అది యూదుల రాజధాని నగరం. “యూదుల రాజు” పుట్టాడంటే రాజధానిలో అందరికీ తెలిసి ఉంటుందని వారు అనుకున్నారు.

ఇక్కడ ప్రాముఖ్యమైన విషయమేమిటంటే, అన్యజనులైన జ్ఞానులకు దేవుడు నక్షత్రం ద్వారా సమాచారం ఇచ్చాడు. యూదులకు మాత్రం లేఖనాల ద్వారా మెస్సీయ జన్మస్థలం ముందుగానే తెలియజేయబడింది.

ఒకవేళ నక్షత్రం జ్ఞానులను నేరుగా బేత్లెహేముకు తీసుకెళ్లి ఉంటే, యెరూషలేములోని చాలామందికి ఈ విషయం తెలియకపోయి ఉండేది. కానీ దేవుడు ఉద్దేశ్యపూర్వకంగా జ్ఞానులను ముందుగా యెరూషలేముకు నడిపించాడు. అక్కడ వారు “పుట్టిన యూదుల రాజు ఎక్కడ ఉన్నాడు?” అని అడగడం ద్వారా నగరమంతటికీ ఈ వార్త తెలిసింది. అంటే దేవుడు జ్ఞానులను ఒక విధంగా సాక్షులుగా ఉపయోగించాడు. అన్యజనులైన వారు యూదుల మధ్యకు వచ్చి మెస్సీయ జననాన్ని ప్రకటించారు.

ఆ తరువాత నక్షత్రం కొంతసేపు కనిపించకుండా పోయింది. అప్పుడు జ్ఞానులు తమకు తెలిసిన సమాచారాన్ని, యూదుల లేఖనాలను మరియు ప్రజల జవాబులను ఆధారంగా తీసుకొని వెతకాల్సి వచ్చింది. దీని ద్వారా దేవుడు ఒక ముఖ్యమైన విషయం చూపిస్తున్నాడు: నక్షత్రం వారిని నడిపించింది, కానీ చివరకు దేవుని వాక్యమే వారికి సరైన స్థలాన్ని తెలియజేసింది. బేత్లెహేము గురించి స్పష్టమైన జవాబు మీకా ప్రవక్త లేఖనాల నుండే వచ్చింది.

యెరూషలేములోని ప్రజలు జ్ఞానులు చెప్పిన నక్షత్రాన్ని చూసి ఉండకపోవచ్చు. వారు ఆకాశంలో అలాంటి ప్రత్యేకమైన సూచనను చూడలేదు. అందుకే ఇప్పుడు ఒక ప్రశ్న వచ్చింది: ఈ జ్ఞానుల మాటలను నమ్మాలా? దేవుడు ఎందుకు వారిని యెరూషలేముకు నడిపించాడు?

దీనిలో దేవుని గొప్ప ఉద్దేశం కనిపిస్తుంది. దేవుడు జ్ఞానులను యూదుల దగ్గరకు తీసుకువచ్చాడు, తద్వారా అన్యులు మరియు యూదులు మెస్సీయ గురించి ఒకరితో ఒకరు సమాచారాన్ని పంచుకునేలా చేశాడు. జ్ఞానులకు నక్షత్రం ద్వారా మెస్సీయ జననం గురించి తెలియజేయబడింది. యూదులకు అయితే లేఖనాల ద్వారా మెస్సీయ గురించి ముందుగానే తెలియజేయబడింది. ఇప్పుడు ఈ రెండు సాక్ష్యాలు — నక్షత్రం మరియు లేఖనాలు — యెరూషలేములో కలిశాయి.

ఇది దేవుని రక్షణ ప్రణాళిక ఎంత విశాలమైనదో చూపిస్తుంది. రక్షకుడు కేవలం యూదుల కొరకు మాత్రమే కాదు; అన్యజనుల కొరకు కూడా వచ్చాడు. అందుకే దేవుడు దూర ప్రాంతాల నుండి జ్ఞానులను నడిపించి యెరూషలేముకు తీసుకువచ్చాడు.

ఇంకా ఒక ముఖ్యమైన విషయం ఇక్కడ కనిపిస్తుంది: దేవుడు చాల దూరంలో ఉన్న జ్ఞానులకు తన కుమారుని జననం గురించి తెలియజేశాడు. కానీ మెస్సీయ కోసం ఎదురు చూస్తున్న యెరూషలేము ప్రజలు మాత్రం సిద్ధంగా లేరు. ఇది వారి ఆత్మీయ నిర్లక్ష్యాన్ని చూపిస్తుంది. లేఖనాలు వారి చేతుల్లో ఉన్నప్పటికీ, వారి హృదయాలు సిద్ధంగా లేవు.

జ్ఞానులు యెరూషలేముకు వచ్చినప్పుడు, అక్కడి ప్రజలందరికీ ఇప్పటికే ఈ వార్త తెలిసి ఉంటుందని అనుకున్నారు. కానీ ఎవరూ మెస్సీయ జననం గురించి తెలియనట్లుగా కనిపించారు. ఇది జ్ఞానులకు ఆశ్చర్యంగా అనిపించి ఉండొచ్చు.

వారు “యూదుల రాజుగా పుట్టిన వాడెక్కడ?” అని విచారించగా, ఆ వార్త త్వరగా యెరూషలేమంతటా వ్యాపించింది. ప్రధానయాజకులు, శాస్త్రులు, పరిసయ్యులు, సద్దూకయ్యులు, ప్రజలు — అందరూ ఈ వార్త విన్నారు. చివరకు ఈ విషయం హేరోదు రాజు చెవిలో కూడా పడింది.

హేరోదు ఎప్పుడూ అనుమానంతో జీవించే రాజు. తన అధికారానికి ప్రమాదం కలిగించే ఏ వార్తనైనా అతడు భయంతో స్వీకరించేవాడు. అందుకే “యూదుల రాజు పుట్టాడు” అనే వార్త అతడిని కలవరపరిచింది. అతనితో పాటు యెరూషలేము కూడా కలవరపడింది.

ఇక్కడ అన్యజనులైన జ్ఞానులు — దూరం నుండి వచ్చి క్రీస్తును వెదికారు. యెరూషలేములో లేఖనాలు కలిగిన ప్రజలు — మెస్సీయ సమీపంలో ఉన్నప్పటికీ ఆయనను వెదకలేదు.

ఇది మనకు ఒక ఆత్మీయ హెచ్చరిక కూడా: దేవుని వాక్యం తెలుసుకోవడం మాత్రమే సరిపోదు; విశ్వాసంతో క్రీస్తును వెదకాలి. జ్ఞానులలాగా నిజంగా వెదికే వారిని దేవుడు క్రీస్తు వద్దకు నడిపిస్తాడు.

హేరోదు ఎందుకు కలవరపడ్డాడు?
హేరోదు చాలా క్రూరమైన రక్తపాత పాలన చేసిన రాజు. అతడు యూదుడు కాకపోయినా, యూదులు ఎన్నాళ్లుగానో మెస్సీయ కోసం ఎదురుచూస్తున్నారని అతనికి తెలుసు. ఇప్పుడు తూర్పుదేశపు జ్ఞానులు వచ్చి, “యూదుల రాజుగా పుట్టిన వాడెక్కడ?” అని అడిగారు. వారు సాధారణ వ్యక్తులు కాదు — గౌరవనీయులైన జ్ఞానులు. వారు ఒక ప్రత్యేకమైన నక్షత్రాన్ని చూసి వచ్చామని చెప్పారు.

ఇది హేరోదుకు భయంకరమైన వార్తగా అనిపించింది. ఎందుకంటే, ఒక కొత్త “యూదుల రాజు” పుట్టాడని వార్త వ్యాపిస్తోంది. ప్రజలు ఆ రాజుకు మద్దతు ఇవ్వొచ్చు. తన సింహాసనం ప్రమాదంలో పడొచ్చు. తన వంశపారంపర్య పాలన ముగిసిపోతుందేమో అని అతడు భయపడ్డాడు.

హేరోదు అధికారాన్ని కోల్పోవడాన్ని అస్సలు సహించలేని వాడు. అందుకే ఈ వార్త అతని మనశ్శాంతిని చెదరగొట్టింది. ప్రజలు తిరుగుబాటు చేసి కొత్త రాజును నిలబెట్టవచ్చనే భయం అతడిని కలవరపరిచింది.

అయితే యెరూషలేము ప్రజలు ఎందుకు కలవరపడ్డారు? వారికీ ఇది ఇబ్బందికరమైన పరిస్థితే. ఒకవైపు, మెస్సీయ పుట్టాడని అన్యజనులైన జ్ఞానులు వచ్చి చెప్తున్నారు.

కానీ దేవుని వాక్యం చేతిలో ఉన్న యూదులకు ఈ విషయం తెలియదు. ఇది వారికి అవమానంగా అనిపించి ఉండొచ్చు. తమ ఆత్మీయ అజ్ఞానం బయటపడింది.

దేవుని మందిరం దగ్గర నివసిస్తున్న ప్రజలకే దేవుని కుమారుని జననం తెలియకపోవడం విచారకరం. లేఖనాలు ఉన్నా, వారు సిద్ధంగా లేరు.

మరొకవైపు, హేరోదు ఎంత క్రూరుడో ప్రజలకు తెలుసు. అతడు తన అధికారానికి ప్రమాదం కనిపిస్తే రక్తపాతం చేయడానికి కూడా వెనుకాడడు. కాబట్టి “కొత్త రాజు” గురించి వార్త విన్నప్పుడు, తరువాత ఏ హింస జరుగుతుందో అని ప్రజలు భయపడ్డారు. అందుకే యెరూషలేము ప్రజలు సంతోషపడకుండా కలవరపడ్డారు.

ఇక్కడ ఒక ముఖ్యమైన ఆత్మీయ సత్యం కనిపిస్తుంది: అన్యులైన జ్ఞానులు క్రీస్తును వెదికారు. కానీ దేవుని ప్రజలమని చెప్పుకున్న యెరూషలేము ప్రజలు భయంతో, అయోమయంతో ఉన్నారు.

దేవునికి దగ్గరగా ఉన్నామని అనుకోవడం మాత్రమే సరిపోదు. నిజమైన విశ్వాసం లేకపోతే, మనిషి దేవుని కృపకు దూరంగా ఉండొచ్చు. యెరూషలేము పరిస్థితి అదే చూపిస్తుంది.

మత్తయి 2:4-8_ ⁴కాబట్టి రాజు ప్రధానయాజకులను ప్రజలలోడు శాస్త్రులను అందరిని సమకూర్చి – క్రీస్తు ఎక్కడ పుట్టునని వారినడిగెను. ⁵అందుకు వారు – యూదయ బేత్లెహేములోనే; ఏలయనగా యూదయ దేశపు బేత్లెహేమా నీవు యూదా ప్రధానులలో ఎంతమాత్రమును అల్పమైనదానవు కావు; ఇశ్రాయేలను నా ప్రజలను పరిపాలించు అధిపతి నీలో నుండి వచ్చును అని ప్రవక్త ద్వారా వ్రాయబడియున్నదనిరి. ^6-7అంతట హేరోదు ఆ జ్ఞానులను రహస్యముగా పిలిపించి, ఆ నక్షత్రము కనబడిన కాలము వారి చేత పరిష్కారముగా తెలిసికొని ⁸– మీరు వెళ్లి, ఆ శిశువు విషయమై జాగ్రత్తగా విచారించి తెలిసికొనగానే, నేనును వచ్చి, ఆయనను పూజించునట్లు నాకు వర్తమానము తెండని చెప్పి వారిని బేత్లెహేమునకు పంపెను.

యేసు జన్మించిన వెంటనే కాదు, చాలా నెలల తరువాత జ్ఞానులు యెరూషలేముకు వచ్చారు. అప్పటికి, యేసుకు సున్నతి చేయబడింది. మరియ, యోసేపులు ఇక పశువుల పాకలో కాకుండా బేత్లెహేములో ఒక ఇంటిలో నివసిస్తున్నారు. చరిత్ర ప్రకారం హేరోదు రాజు క్రీ.పూ. 4లో మరణించాడు. అందువల్ల యేసు క్రీ.పూ. 5 లేదా 6 ప్రాంతంలో జన్మించి ఉండవచ్చని అర్థమవుతుంది.

జ్ఞానులు హేరోదు సభకు వచ్చి, “యూదుల రాజుగా పుట్టిన వాడు ఎక్కడ ఉన్నాడు?” అని అడిగారు. వీరు సాధారణ ప్రయాణికులు కాదు. తూర్పు దేశాల నుండి వచ్చిన గౌరవనీయులైన జ్ఞానులు. వారు వందలాది మైళ్ళు ప్రయాణించి వచ్చారు. కాబట్టి వారి మాటలను తేలికగా తీసుకోవడం సాధ్యం కాదు.

హేరోదుకు, “యూదుల రాజు” ఎవరో తెలియదు, ఆయన ఎక్కడ పుట్టాడో తెలియదు, కానీ జ్ఞానుల మాటలను బట్టి మెస్సీయ జన్మించాడని మాత్రం అర్థమైంది.

అప్పుడు హేరోదు తనకు ఏమీ తెలియనట్లు నటించాడు. కానీ లోపల అతడు చాలా కలవరపడ్డాడు. అందుకే మెస్సీయ ఎక్కడ పుట్టబోతాడో ఖచ్చితంగా తెలుసుకోవాలని నిర్ణయించుకున్నాడు. అతడు, ప్రధాన యాజకులను, శాస్త్రులను, ధర్మశాస్త్ర నిపుణులను, పాత నిబంధన ప్రవచనాలను తెలిసిన పెద్దలను సమకూర్చి క్రీస్తు ఎక్కడ పుట్టునని వారిని అడిగాడు.

ఇది సాధారణ ప్రశ్న కాదు. ఇక్కడ సమకూర్చుట అనే మాటకు అర్ధం హేరోదు ప్రధానయాజకులను, శాస్త్రులును, ఇశ్రాయేలు పెద్దలను ఉద్దేశిస్తూ, క్రీస్తుని గూర్చి “వెతకండి, దర్యాప్తు చేయండి, ఖచ్చితమైన సమాచారాన్ని నాకు తెలియజేయండి” అని ఆజ్ఞాపించడం. కానీ హేరోదు ఉద్దేశ్యం మంచిది కాదు. అతడు మెస్సీయను ఆరాధించాలనుకోలేదు. జ్ఞానులకు సహాయం చేయాలనుకోలేదు. తన అధికారానికి ప్రమాదముగా కనిపించిన ఆ శిశువును కనుగొని నాశనం చేయడానికి ఒక మోసపూరిత పథకాన్ని సిద్ధం చేస్తున్నాడు.

జ్ఞానులు హేరోదు మధ్యనున్న వ్యత్యాసం ఏమిటంటే, జ్ఞానులు క్రీస్తును ఆరాధించడానికి వెతికారు. హేరోదు క్రీస్తును చంపడానికి వెతికాడు. క్రీస్తు పట్ల మనుష్యుల హృదయాలు భిన్నంగా స్పందిస్తాయి. కొందరు విశ్వాసంతో ఆయనను వెదుకుతారు; మరికొందరు తమ స్వార్థం మరియు గర్వం వల్ల ఆయనను తిరస్కరిస్తారు.

అప్పుడు ప్రధానయాజకులు, శాస్త్రులు, ధర్మశాస్త్ర నిపుణులు అందరూ ఏకాభిప్రాయముతో, హేరోదుకు సమాధానం ఇచ్చారు. వారు పాత నిబంధన ప్రవచనాలను ఆధారంగా చూపిస్తూ, మెస్సీయ ఎక్కడ జన్మిస్తాడో స్పష్టంగా తెలియజేశారు. వారు, “యూదయ దేశపు బేత్లెహేములోనే” అని చెప్పారు. దీనికి ఆధారంగా మీకా 5:2 ప్రవచనాన్ని చూపించారు, “యూదయ దేశపు బేత్లెహేమా, నీవు యూదా ప్రధానులలో ఎంత మాత్రమును అల్పమైన దానవు కావు; ఇశ్రాయేలును పరిపాలించు అధిపతి నీలో నుండి వచ్చును.” ఈ ప్రవచనం యేసు జననానికి సుమారు 700 సంవత్సరాల ముందే చెప్పబడింది. అంటే దేవుడు ముందుగానే మెస్సీయ జన్మస్థలాన్ని నిర్ణయించి ప్రకటించాడు.

ఆ కాలంలో “బేత్లెహేము” అనే పేరు కలిగిన రెండు ప్రాంతాలు ఉన్నాయి: ఒకటి యూదయలో, మరొకటి జెబులోను గోత్ర ప్రాంతంలో (యెహోషువ 19:15). కాబట్టి ఎలాంటి గందరగోళం లేకుండా, వారు స్పష్టంగా, “యూదయ బేత్లెహేములోనే మెస్సీయ పుడతాడు” అని చెప్పారు.

ఇప్పుడు హేరోదుకు ఒక ముఖ్యమైన విషయం తెలిసిపోయింది: తనకు భయంగా ఉన్న “ప్రత్యర్థి రాజు” ఎక్కడ జన్మించాడో తెలిసింది. కానీ ఆ శిశువు ఖచ్చితంగా ఎప్పుడు జన్మించాడు? ఇప్పుడు ఆయన వయస్సెంత? అనే విషయం ఇంకా అతనికి తెలియదు. ఈ సమాచారాన్ని తెలుసుకోవడానికి హేరోదుకు ఉన్న ఒకే మార్గం — జ్ఞానులు. ఎందుకంటే, నక్షత్రాన్ని సాధారణ ప్రజలు చూడలేదు. హేరోదు కూడా చూడలేదు. జ్ఞానులకే ఆ ప్రత్యేక సూచన తెలియజేయబడింది. హేరోదుకు నక్షత్రం కనబడినట్లయితే, అతడు వెంటనే తన సైనికులను బేత్లెహేముకు పంపించి ఉండేవాడు. కానీ ఇప్పుడు అతడు జ్ఞానుల సమాచారంపైనే ఆధారపడాల్సి వచ్చింది. అందుకే హేరోదు జ్ఞానులను రహస్యంగా తన దగ్గరకు పిలిపించాడు. రహస్యముగా పిలిపించుకోవడానికి, కారణాలు ఏమై ఉండొచ్చు?

అతడు ఇది బహిరంగంగా చేయలేదు. ఎందుకంటే, అతడు తన భయాన్ని బయటపెట్టుకోవాలనుకోలేదు, ప్రజలు తన ఉద్దేశ్యాన్ని గ్రహించకూడదనుకున్నాడు, ముఖ్యంగా, తన హత్యా ప్రణాళికను గోప్యంగా ఉంచుకోవాలనుకున్నాడు. బయటకు అతడు ప్రశాంతంగా, ఆసక్తిగా నటిస్తున్నాడు. కానీ లోపల మాత్రం: భయం, అసూయ, అధికారదాహం, హింసాత్మక ఆలోచనలు పెరుగుతున్నాయి.

ఇక్కడ మనం ఒక ఆత్మీయ సత్యాన్ని చూస్తాం: దేవుని కుమారుడు లోకానికి రాగానే, కొందరు ఆయనను ఆరాధించడానికి వచ్చారు; మరికొందరు ఆయనను నాశనం చేయడానికి ప్రయత్నించారు. మనుష్యుల హృదయాలు వారి నిజ స్వభావాన్ని బయటపెడతాయి.

హేరోదు జ్ఞానులను “రహస్యంగా” పిలిపించుకోవడం వెనుక అనేక కారణాలు ఉండొచ్చు. బైబిలు వాటిని స్పష్టంగా చెప్పకపోయినా, పరిస్థితిని బట్టి కొన్ని విషయాలు అర్థమవుతున్నాయి. హేరోదు చాలా వంచకుడు, అనుమాన స్వభావం గల రాజు, క్రూరుడు, రక్తపాతానికి వెనుకాడని వాడు. అతని నిజమైన ఉద్దేశ్యం మెస్సీయను ఆరాధించడం కాదు; ఆయనను చంపడం. అందుకే తన ఆలోచనలు, తన ప్రణాళికలు ఇతరులకు తెలియకుండా జాగ్రత్తపడ్డాడు. యూదుల పెద్దలు హేరోదు స్వభావం తెలిసినవారు కాబట్టి వాళ్లు, జ్ఞానులకు ఏమైనా హెచ్చరికలు ఇచ్చారా? “హేరోదును జాగ్రత్తగా గమనించండి” అని చెప్పారా? లేదా యేసు కుటుంబాన్ని రక్షించేలా ఏమైనా సూచనలు చేశారా? అనే విషయాలను తెలుసుకోవాలని హేరోదు అనుకుని ఉండొచ్చు. అలాగే, జ్ఞానులు యేసేపు, మరియలకు ముందుగానే ఏమైనా సమాచారం అందిస్తారేమోనని కూడా అతడు అనుమానించి ఉండొచ్చు. అందుకే వారితో ఒంటరిగా మాట్లాడి. వారు ఎంత తెలుసుకున్నారు? ఎవరి మాటలు విన్నారు? ఎవరి సలహాలు పొందారు? అనే విషయాలు తెలుసుకోవాలని ప్రయత్నించి ఉండొచ్చు. బయటకు మాత్రం హేరోదు భక్తిగల యూదునిలా నటించాడు. “నేనూ వచ్చి ఆ శిశువును ఆరాధిస్తాను” అని చెప్పడం కూడా మోసమే. జ్ఞానులు తనను నమ్మాలని, తనపై అనుమానపడ కూడదని అతడు కోరుకున్నాడు. మరొక కారణం, హేరోదు చాలా తెలివైన రాజకీయ నాయకుడు మరియు దౌత్యవేత్త. తూర్పు దేశాల నుండి వచ్చిన గౌరవనీయులైన జ్ఞానులతో బహిరంగంగా కాకుండా, ప్రత్యేకంగా మాట్లాడటం ఒక రాజకీయ ప్రోటోకాల్‌లా కూడా కనిపించి ఉండొచ్చు. తద్వారా, తన ప్రతిష్ట కాపాడుకోవడం, విదేశీయుల ముందు మంచి రాజుగా కనిపించడం, తన భయాన్ని దాచిపెట్టడం అతని ఉద్దేశ్యాల్లో భాగంగా ఉండొచ్చు.

అత్యంత ముఖ్యంగా, హేరోదు ఒక ఖచ్చితమైన సమాచారాన్ని తెలుసుకోవాలని చూశాడు: ఆ నక్షత్రం ఎప్పుడు కనిపించింది? ఆ శిశువు ఇప్పుడు ఎంత వయస్సులో ఉండవచ్చు? ఈ సమాచారం అతనికి చాలా అవసరం. ఎందుకంటే తన హత్యా ప్రణాళికను అమలు చేయడానికి శిశువు వయస్సు తెలుసుకోవాలి. తరువాత బేత్లెహేములో రెండేళ్ల లోపు పిల్లలను చంపించినప్పుడు, అతడు ఈ సమాచారంపైనే ఆధారపడ్డాడు. అందుకే జ్ఞానులను రహస్యంగా పిలిపించి, ఆ నక్షత్రం కనిపించిన కాలాన్ని “పరిష్కారముగా” విచారించాడు. ఇక్కడ హేరోదు హృదయం పూర్తిగా బయటపడుతుంది: బయటకు భక్తి నటన, లోపల అసూయ, భయం, హత్యా ఆలోచనలు. ఇది పాపమయ హృదయపు స్వభావం. దేవుని రాజ్యాన్ని స్వీకరించడానికి బదులు, మనిషి తన స్వంత అధికారాన్ని కాపాడుకోవాలని ప్రయత్నిస్తాడు. కానీ దేవుని ప్రణాళికను ఎవరూ అడ్డుకోలేరు. హేరోదు కుట్రలు ఉన్నప్పటికీ, దేవుడు తన కుమారుని కాపాడి తన రక్షణ కార్యాన్ని కొనసాగించాడు.

ఆ నక్షత్రము కనబడిన కాలము వారిచేత పరిష్కారముగా తెలుసుకొనిన తరువాత  హేరోదు జ్ఞానులతో, మీరు వెళ్లి, ఆ శిశువు విషయమై జాగ్రత్తగా విచారించి తెలిసికొనగానే నేనును వచ్చి, ఆయనను పూజించునట్లు నాకు వర్తమానము తెండని చెప్పి _ హేరోదు జ్ఞానులను ఉపయోగించుకొని క్రీస్తును కనుగొని, తన అధికారానికి ముప్పుగా కనిపించిన ఆ శిశువును సులభంగా నాశనం చేయాలని భావించి బయటకు మాత్రం భక్తి నటనతో “నేనును వచ్చి ఆయనను పూజించునట్లు నాకు వర్తమానము తెండని చెప్పి జ్ఞానులను బేత్లెహేమునకు పంపాడు. కానీ అతని హృదయంలో ఉన్నది ఆరాధన కాదు — హత్యా సంకల్పం.

ఇక్కడ హేరోదు ఒక పని చేసి ఉండొచ్చు. బేత్లెహేము యెరూషలేముకు 8 మైళ్ల దూరంలో ఉంది. జ్ఞానులకు గౌరవం ఇస్తున్నాననే నెపంతో హేరోదు సైనికుల రక్షణతో జ్ఞానులను బేత్లెహేముకు పంపించి ఉండొచ్చు, వాళ్ళ వెనుక హేరోదు ఈజీగా గూఢచారులను పంపించి ఆ శిశువుని జ్ఞానుల సహాయముతో కనుగొని పిల్లవాడిని అతని తల్లిదండ్రులను ఏ కష్టం లేకుండా చంపేసి ఉండొచ్చు. ఇంత ఈజీ ప్లాన్ ని హేరోదు ఎలా మిస్ అయ్యాడు? అయితే అలా జరగలేదు. దీనికి కొన్ని కారణాలు ఉండొచ్చు: విదేశీయులైన జ్ఞానుల సమక్షంలో తన క్రూరత్వం బయటపడకూడదని హేరోదు భావించి ఉండొచ్చు. రాజకీయంగా తన ప్రతిష్ట దెబ్బతినకూడదనుకున్నాడేమో లేదా దేవుడే అతని పథకాన్ని అడ్డుకున్నాడు.

ఇక్కడ ముఖ్యమైన సత్యం: దేవుడు తన కుమారుని రక్షించడంలో హేరోదు వంటి రాజుల యుక్తులను కూడా నిరర్థకముగా చేయగలడు. మానవ జ్ఞానం, కుట్రలు, అధికార బలం — ఇవన్నీ దేవుని చిత్తానికి ఎదురు నిలవలేవు. కాని నేనైతే, ఒక విషయాన్ని నమ్ముతాను_ తన బిడ్డలను ఈజీగా నాశనం చేసే పద్దతులను శత్రువుల కళ్ళకు కనబడకుండా దేవుడు చెయ్యగలడు. దేవుడు రాజుల జ్ఞానమును నిరర్థకము చెయ్యగల వాడు, నమ్మండి.

జ్ఞానులు యెరూషలేము నుండి బేత్లెహేముకు బయలుదేరినప్పుడు ఒక ఆశ్చర్యకరమైన విషయం కనిపిస్తుంది: వాళ్ళతో ఒక్క యూదుడూ వెళ్లలేదు. హేరోదు సభ నుండి కాదు, ప్రధానయాజకుల నుండి కాదు, శాస్త్రుల నుండి కాదు, యెరూషలేము ప్రజలలో నుండి కూడా కాదు. ఇది చాలా విచారకరమైన విషయం. వారు, మెస్సీయ జన్మస్థలం తెలుసుకున్నారు, ప్రవచనాలు తెలుసుకున్నారు, జ్ఞానుల సాక్ష్యం విన్నారు, బేత్లెహేము దగ్గరలోనే ఉందని కూడా తెలుసు. అయినా వారు వెళ్లలేదు. కనీసం “మా రాజు” అనే భావనతోనైనా, ఆసక్తితోనైనా, విదేశీయులకు తోడుగా వెళ్లే మర్యాదతోనైనా, ఎవరైనా జ్ఞానులతో బయలుదేరి ఉండొచ్చు. కానీ ఎవరూ వెళ్లలేదు.

ఇక్కడ యూదుల ఆత్మీయ స్థితి బయటపడుతోంది: వారికి లేఖన జ్ఞానం ఉంది, కానీ విశ్వాసపు తపన లేదు. వారు ప్రవచనాలను చెప్పగలిగారు, కానీ క్రీస్తును వెదకడానికి లేవలేదు.

దీనికి విరుద్ధంగా, అన్యులైన జ్ఞానులు వందలాది మైళ్ళు ప్రయాణించి క్రీస్తును వెతికారు. యూదులు కొన్ని మైళ్ళ దూరంలో ఉన్న క్రీస్తును వెతకలేదు.

ఇది మనకు ఒక గంభీరమైన హెచ్చరిక: దేవుని వాక్యాన్ని తెలుసుకోవడం మాత్రమే సరిపోదు. నిజమైన విశ్వాసం క్రీస్తును వెదుకుతుంది, ఆయనను పొందాలని కోరుకుంటుంది, ఆయనవద్దకు నడుస్తుంది.

జ్ఞానులు తక్కువ వెలుగు కలిగినా క్రీస్తును వెతికారు. యూదులు ఎక్కువ వెలుగు కలిగినా నిర్లక్ష్యంగా ఉండిపోయారు.

జ్ఞానులు యెరూషలేము నుండి బెత్లెహేముకు బయలుదేరారు. జ్ఞానులు మాత్రమే ఒంటరిగా బేత్లెహేముకు వెళ్తుండటం మీకు విచిత్రంగా అనిపించడం లేదా? హేరోదు సభ నుండి కాని, యూదుల పెద్దలలో నుండి కాని లేదా యెరూషలేమువాసులలో నుండి కాని ఒక్కరు కూడా వారితో కలిసి క్రీస్తును చూడడానికి వెళ్లినట్లు బైబిలు చెప్పటంలేదు. మెస్సయ్య జన్మించాడనే వార్త విన్న తరువాత కూడా ఎవరూ ఆసక్తి చూపకపోవడం ఆశ్చర్యకరంగా అనిపిస్తుంది. కనీసం ఉత్సుకతతోనైనా, “మా రాజు” అనే భావంతోనైనా, లేదా విదేశీయులకు గౌరవం చూపే ఆచారం ప్రకారమైనా కొందరు వారితో వెళ్లి ఉండవచ్చని మనకు అనిపిస్తుంది.

ఎందుకు ఎవరూ వెళ్లలేదు? కారణాలు ఏమై ఉండొచ్చు? అందుకు కొందరు కొన్ని కారణాలను చెప్తూ, హేరోదు జ్ఞానులను రహస్యంగా బేత్లెహేముకు పంపించి ఉండవచ్చని భావిస్తారు. అతను తన కుట్ర బయటపడకుండా ఉండాలని, శిశువు తల్లిదండ్రులకు అనుమానం రాకూడదని, అలాగే యూదులు మెస్సయ్యను గుర్తించి రాజకీయ ఆశలు పెంచుకోకుండా చూడాలని భావించి ఉండవచ్చు. అందువల్ల జ్ఞానులతో ఎవరినీ పంపకుండా వారిని ఒంటరిగా పంపించి ఉండవచ్చని వారు సూచిస్తారు. యూదులకు జ్ఞానులతో వెళ్లాలని ఉన్నా హేరోదును బట్టి జ్ఞానులతో వెళ్లే అవకాశం వాళ్ళకి దొరికి ఉండకపోవచ్చు అని చెప్తారు. యూదులు హేరోదు కుట్రను అనుమానించకుండా హేరోదు జ్ఞానులతో ఎవరినీ పంపలేదని చెప్తారు. మెస్సయ్య ఎవరో తెలిస్తేనే కదా తిరుగుబాటుకు అవకాశం ఉంటుంది, ఆ అవకాశం యూదులకు హేరోదు ఇవ్వకుండా హేరోదు జ్ఞానులను ఒంటరిగా పంపించి ఉండొచ్చని చెప్తుంటారు.

మరికొందరు యూదులు హేరోదుకు భయపడి ఉండొచ్చు అని చెప్తారు. హేరోదు క్రూర స్వభావం అందరికీ తెలిసినదే. అందువల్ల చాలామంది ఈ విషయానికి దూరంగా ఉండాలని నిర్ణయించుకొని ఉండవచ్చు. యూదుల అమర్యాద పూర్వకమైన ప్రవర్తన, చూపిన నిర్లక్ష్యం దేవుని పట్ల వారి అవిధేయతకు కారణమని, ఆధ్యాత్మికంగా ఇది యెరూషలేము వారి భ్రష్టస్థితిని తెలియజేస్తూ మెస్సయ్య రాకడకు సిద్ధంగా వాళ్ళు లేరనే విషయాన్ని తెలియజేస్తుందని చెప్తారు. వారు మెస్సయ్య రాకడ కోసం నిజంగా ఎదురు చూడలేదు; దేవుని వాగ్దానాల పట్ల ఆసక్తి కోల్పోయారు.

కొంతమంది చరిత్రకారుల అభిప్రాయం ప్రకారం, యెరూషలేము ప్రజలు తమ సౌకర్యవంతమైన జీవితాల్లో మునిగిపోయి ఉండవచ్చు. అందువల్ల దేవుడు చేస్తున్న గొప్ప కార్యాన్ని గుర్తించలేకపోయారు. ఈ సందర్భం యోహాను 1:11 లోని మాటలను గుర్తుకు తెస్తుంది: “ఆయన తన స్వకీయుల యొద్దకు వచ్చెను; ఆయన స్వకీయులు ఆయనను అంగీకరింపలేదు.” ఈ మాటలు యేసును తిరస్కరించిన యూదుల వైఖరికి ముందస్తు సూచనగా ఉన్నాయి.

కారణం ఏదైనా కావచ్చు, యూదుల స్పందన జ్ఞానులను నిరుత్సాహపరచి ఉండవచ్చు. “మేము ఎంతో దూరం నుండి మీ రాజును ఆరాధించడానికి వచ్చాము, కానీ ఆయన స్వంత ప్రజలకు మాత్రం ఆసక్తి కనిపించడం లేదు” అని వారు ఆశ్చర్యపడి ఉండవచ్చు. అయినప్పటికీ వారు ఇతరుల స్పందనను చూసి వెనక్కి తగ్గలేదు. ఎవరూ తమతో రాకపోయినా, తమ మాటలను ఎవరూ నమ్మకపోయినా, వారు క్రీస్తును వెదకడం ఆపలేదు. క్రీస్తును కనుగొనే వరకు వెతకాలనే సంకల్పంతో వారు ఒంటరిగానే బేత్లెహేముకు బయలుదేరారు. వారి విశ్వాసం, పట్టుదల, మరియు క్రీస్తును కనుగొనాలనే తపన ఈ సంఘటనలో స్పష్టంగా కనిపిస్తాయి.

ఆ శిశువు విషయమై జాగ్రత్తగా విచారించి తెలుసుకొండి అని జ్ఞానులు ఆజ్ఞాపింపబడ్డారు. జాగ్రత్తగా విచారించి తెలుసుకొండి అనే మాటలకు, బేత్లెహేములో ఉన్న ప్రతి ఇంటిలో ప్రతి కుటుంబంలో విచారించండి, వెతకండి, మీరు అతన్ని కనుగొనే వరకు ఎవరినీ వదిలిపెట్టవద్దు అనే ఆజ్ఞ హేరోదు మాటలలో ధ్వనిస్తుంది. ఆయన ఏ ఇంట్లో పుట్టాడు, ఇప్పుడు ఏ ఇంట్లో ఉన్నాడు, ఆయన తలితండ్రులు ఎవరు? యేసుని ఇంటి ప్రక్కన వాళ్ళు ఎవరు? ఆ ఇంటి ఆనవాళ్లు, గుర్తులు. ఆయన జన్మములో ఎలాంటి సంఘటనలు జరిగాయి? ఆయనను గురించి బేత్లెహేమువాసులకు తెలుసా? బేత్లెహేమువాసులు ఈ విషయాన్ని కప్పిపెడుతున్నారా? ఎంక్వయిరీకి సహకరిస్తున్నారా? యేసుని తల్లితండ్రులు ఈ విషయాన్ని దాచిపెడుతున్నారా? అనుమానమే రాకుండా చాల జాగ్రత్తగా క్రీస్తుని గూర్చి విచారించి ఆయన్ను గురించి ఫుల్ డీటెయిల్స్ కలెక్ట్ చెయ్యమనే ఆదేశము కూడా హేరోదు మాటలలో ధ్వనిస్తుంది. వాళ్ళు ఆ శిశువును గురించి ఎంత తెలుసుకొంటే హేరోదుకు ఆయనను చంపడం అంత సులభమవుతుంది.

మత్తయి 2:9-12_ ⁹వారు రాజు మాట విని బయలుదేరి పోవుచుండగా, ఇదిగో తూర్పు దేశమున వారు చూచిన నక్షత్రము ఆ శిశువు ఉండిన చోటికి మీదుగా వచ్చి నిలుచు వరకు వారికి ముందుగా నడిచెను. ^10-11వారు ఆ నక్షత్రమును చూచి, అత్యానందభరితులై యింటి లోనికి వచ్చి, తల్లియైన మరియను ఆ శిశువును చూచి, సాగిలపడి, ఆయనను పూజించి, తమ పెట్టెలు విప్పి, బంగారమును సాంబ్రాణిని బోళమును కానుకలుగా ఆయనకు సమర్పించిరి. ¹²తరువాత హేరోదు నొద్దకు వెళ్లవద్దని స్వప్నమందు దేవుని చేత బోధింపబడిన వారై వారు మరియొక మార్గమున తమ దేశమునకు తిరిగి వెళ్లిరి.

ఇప్పుడు జ్ఞానులు బేత్లెహేముకు వెళ్లి యేసును యెక్కడని వెదకాలి? తెలియదు. యెరూషలేము నుండి బేత్లెహేముకు 8 మైళ్ళు అంటే సుమారు రెండు గంటల ప్రయాణం. యెరూషలేము నుండి బేత్లెహేముకు రోడ్ ఉంది కాబట్టి జ్ఞానులు ఆ రోడ్డుని ఫాలో అయ్యి ఉంటారు. కొందరేమో (హేరోదు ప్లాన్ లో భాగముగా రాత్రి బసలో పగలు బస/ఎంక్వయిరీ లో అనేక విషయాలు తెలుసుకొనే ఉద్దేశ్యములో) జ్ఞానులు యెరూషలేము నుండి బేత్లెహేముకు సాయంత్రం బయలుదేరి ఉండొచ్చు అని అంటారు. నిరుత్సాహముతో వాళ్ళు బేత్లెహేముకు ప్రయాణం మొదలుపెట్టారు. వారికి నక్షత్రం మళ్ళి కనబడిన వెంటనే వారి ఆత్మలు పునరుజ్జీవనం పొందాయి, వారి హృదయాలలో ఆనందం నిండింది, వారి ముఖాలలో ఉల్లాసం కనిపించింది; చెప్పలేని ఆనందంతో తమ ప్రయాణాన్ని కొనసాగించారు. ఇదిగో తూర్పు దేశమున వారు చూచిన నక్షత్రము ఆ శిశువు ఉండిన చోటికి మీదుగా వచ్చి నిలుచు వరకు వారికి ముందుగా నడిచింది. నక్షత్రం తిరిగి కనిపించడానికి కారణం ఏమంటారు? జ్ఞానులను వారి నిరుత్సాహములో వారిని ప్రోత్సహించడం దేవుని ఉద్దేశ్యము కావొచ్చు. వేరొక్కరి ప్రమేయమేమి లేకుండా ఖచ్చితమైన లొకేషన్కి వారిని నడిపించడానికి దేవుని ప్రణాళికలో భాగముగా నక్షత్రము కనబడి ఉండొచ్చు.

ఈ నక్షత్రం వారితో పాటు యెరూషలేము నుండి బెత్లెహేమ్ దిశగా వారితో పాటు నడిచింది అంటే ఇది ఉత్తరం నుండి దక్షిణానికి నడిచింది. దీని కక్షను బట్టి ఇది ఆకాశంలోని ఇతర నక్షత్రాల కంటే భిన్నమైనదని చెప్పొచ్చు. ఆ నక్షత్రము ఆ శిశువు ఉన్న ఇంటిపైన నిలిచింది అంటే, అర్ధమేమిటంటే, నిస్సందేహముగా, ఈ నక్షత్రం బేత్లెహేము మీద కాకుండా మెస్సయ్య ఉన్న ఇంటి మీద ఆగిపోయింది అని అర్ధం. నక్షత్రం జ్ఞానులను క్రీస్తు ఉన్న ఇంటి దగ్గరికి నడిపి అంటే ఇంటి పైన నిలచిపోవడాన్ని బట్టి అంటే నక్షత్రం కదలక పోవడాన్ని బట్టి ఈ నక్షత్రం బహుశా చాలా ఎత్తులో ఉండి ఉండక పోవచ్చని అంతరిక్ష ప్రపంచానికి చెందినది కాదని అనిపిస్తుంది. ఎందుకంటే అంతరిక్షం నుండి ఏ నక్షత్రం కూడా ఒక నిర్దిష్ట ఇంటిని ఖచ్చితముగా సూచించ లేదు. ఈ నక్షత్రం చేసినట్లుగా ఏ నక్షత్రము గాని గ్రహము గాని ఇలా చెయ్యడం అసాధ్యం. అలాగే నక్షత్రం నుండి ఖచ్చితముగా క్రీస్తువున్న ఇంటిపైన పడిన వెలుగు కిరణం గురించి ఇక్కడ ఏమీ చెప్పబడలేదు కూడా.

కాబట్టే లూకా 2:8లో యేసు జన్మములో గొఱ్ఱెల కాపరులకు ప్రభువు దూత ప్రత్యక్షమైనప్పుడు “ప్రభువు మహిమ వారి చుట్టు ప్రకాశించెను“. ఇక్కడ దేవుడు తన కుమారుని వద్దకు జ్ఞానులను నడిపిస్తున్న క్రమములో ప్రస్తావించబడిన నక్షత్రము ప్రభువు మహిమ కావొచ్చు. దానిని జ్ఞానులు చూశారు. అది జ్ఞానులను బేత్లెహేముకు బేత్లెహేములో ఉన్న క్రీస్తుని ఇంటికి నడిపి ఉండొచ్చు, సందేహమే లేదు.

నక్షత్రం క్రీస్తు ఉన్న ఇంటిపైన నిలిచిపోవడానికి కారణమేమంటారు? బేత్లెహేములో క్రీస్తు ఏ ఇంట్లో ఉన్నాడో జ్ఞానులకు తెలియదు. ఒకవేళ జ్ఞానులు ఇంటింటికి తిరుగుతూ క్రీస్తు గురించి ఎంక్వయిరీ చేస్తే, ఎవరో ఒకరు ఆ విషయాన్ని హేరోదుకు తెలియజేసే అవకాశం ఉంది. అప్పుడు క్రీస్తుని తలితండ్రులను గురించి, క్రీస్తుని గురించి హేరోదుకు తెలిసిపోయే అవకాశం ఉంది. ఇప్పుడు జ్ఞానులు ఆయన కోసం ఏ వ్యక్తిని విచారించాల్సిన అవసరం లేదు. ఎవరికి కూడా తెలియాల్సిన అవసరం లేదు.

జ్ఞానులు ఆ నక్షత్రాన్ని చూచి, అత్యానందభరితులైయ్యారు. వారి ఆనందానికి అవధులు లేకుండా పోయాయి. వారి సుదీర్ఘ ప్రయాణం విజయవంతమైంది. క్రీస్తుని జన్మమును బట్టి వారు ధృవీకరించబడ్డారు. దైవికమైన నిర్దేశకత్వములో (దేవుడే నేరుగా ఏ పొరపాటు లేకుండా వారిని గమ్యానికి నడిపించుటను బట్టి), తమకివ్వబడిన ధన్యతను బట్టి ఆనందపడ్డారు, నిశ్చయతతో ఉబ్బితబ్బిబయ్యారు అని ఈ మాటలు తెలియజేస్తున్నాయి. వారి కష్టమైన అన్వేషణ ముగిసింది.

తర్వాత జ్ఞానులు యింటి లోనికి వచ్చి, తల్లియైన మరియను ఆ శిశువును చూచి, ఆ శిశువు ఎదుట సాగిలపడి, ఆయనను పూజించి, జ్ఞానులు ఎవరినైతే చూడాలని కోరుకున్నారో ఆయనను వారు తమ కళ్లతో ప్రత్యేకముగా చూసారు. ఆయన జన్మ స్థలము ఆయన దీనస్థితి అక్కడి పేదరికము ఇవి ఏమి కూడా క్రీస్తును ఆరాధించకుండా జ్ఞానులను అడ్డుకోలేక పోయాయి. జ్ఞానులు కలత చెందలేదు. వారు కేవలం ప్రవక్త యొక్క ప్రవచనాన్ని బట్టి మరియు నక్షత్రం యొక్క సాక్ష్యాన్ని అనుసరించి వచ్చారు. ఆయనను రాజుగా నమ్మారు. వారి తూర్పు దేశపు సంప్రదాయాలను అనుసరించి సంపూర్ణ సమర్పణతో యూదుల రాజైన ఆ శిశువు ఎదుట సాగిలపడ్డారు.

తమ పెట్టెలు విప్పి, బంగారమును సాంబ్రాణిని బోళమును కానుకలుగా ఆయనకు సమర్పించారు. ఈ విషయాన్నే కీర్తనలు 72:10,15 చెప్తూ_ రాజులు “రాజును” సేవించడం ఆయన ముందు సాగిలపడటం మరియు బహుమతులు అందించడం గురించి మాట్లాడుతూ_తర్షీషు రాజులు ద్వీపముల రాజులు కప్పము చెల్లించెదరు. షేబ రాజులును సెబా రాజులును కానుకలు తీసికొని వచ్చెదరు. షేబ బంగారము అతనికి ఇయ్యబడును అని ముందుగానే ప్రవచింపబడింది. అలాగే యెషయా 60:1-6 వచనాలలో బంగారము ధూపద్రవ్యములు యెహోవా స్తోత్రములను గూర్చి ప్రస్తావించబడింది. ఈ రెండు ప్రవచనాలు ఇక్కడ నెరవేరాయి. కొందరేమో ఈ రెఫరెన్సులను బట్టి  క్రీస్తును చూడటానికి వచ్చిన జ్ఞానులు తూర్పు దేశపు రాజులై ఉండొచ్చని అంటూ ఉంటారు.

బంగారమును సాంబ్రాణిని బోళమును కానుకలుగా శిశువుకు ఇవ్వడం వింతగా అనిపించొచ్చు. ఇవి ఖరీదైన బహుమతులు. మూడు బహుమతులలోనూ గొప్ప సింబాలిజంను మనం చూడవచ్చు. బంగారం అనేది రాజుకి ఇచ్చే బహుమతి. దేవాలయ ఆరాధనలో సాంబ్రాణి ఉపయోగించబడుతుంది. నిర్గమ 30:34 ప్రకారము యాజకునికి తగిన బహుమతి. సాంబ్రాణి క్రీస్తు దేవుడని గుర్తుచేస్తుంది. యూదులు ప్రతిరోజు దేవాలయములో జరిగే ఆరాధనలలో సాంబ్రాణిని విరివిగా ఉపయోగించే వాళ్ళు. పైకి లేచే సుగంధ ధూపం దేవునికి ఇష్టమైన ప్రజల ప్రార్థనలను సూచిస్తుంది. బోళమును యాజకులు అభిషేక తైలముగా ఉపయోగిస్తారు, ఈ విషయం నిర్గమ 30:23 లో తెలియజేయబడింది. బోళము యేసు మానవత్వాన్ని ఆయన శ్రమలు మరణాన్ని సూచిస్తుంది. అట్లే దీనిని పెర్ఫ్యూమ్ గాను మరియు ఎంబాలింగ్ ప్రక్రియలో అంటే మృతదేహాలను ఖననం చేయడానికి, సిద్ధం చేయడానికి అవసరమైన సుగంధ రెసిన్ గా కూడా ఉపయోగించే వాళ్ళు. నీకొదేము యేసు శరీరాన్ని ఖననానికి సిద్ధం చెయ్యడానికి కలబంద, బోళము కలిసిన మిశ్రమాన్ని తెచ్చినట్లుగా యోహాను 19:39-40 వచనాలు తెలియజేస్తున్నాయి. ఇది వైన్తో కలిపినప్పుడు ఒక రకమైన మత్తుమందుగా కూడా ఉపయోగపడింది. అందుకే రోమన్ సైనికులు యేసు సిలువపై వేలాడుతున్నప్పుడు ఆయనకు బోళముతో కలిపిన వైన్ ఇచ్చారు (మార్క్ 15:23), కాని ఆయన దానిని త్రాగడానికి నిరాకరించాడని బైబులు తెలియజేస్తుంది.

క్రీస్తుకు వారు ఇచ్చిన బహుమతులలో, ఆ టైంలో, మనకు ఇప్పుడు చాలా స్పష్టంగా ఉన్న సింబాలిజంను వారు ఎంత వరకు అర్థం చేసుకున్నారో మనం చెప్పలేము. బహుశా వారు తమ మాతృభూమి నుండి అత్యంత ప్రత్యేకమైన బహుమతులను శిశువైన యేసుకు ఇవ్వాలనుకున్నారు, తెచ్చి ఇచ్చారు అంతే.  కొద్ది గంటలలో యేసేపు తన భార్య అయిన మరియను క్రీస్తును తీసుకొని ఐగుప్తుకు వెళ్లిపోవలసి ఉన్నాడు. బంగారము, సాంబ్రాణి, బోళము చాల ఖరీదైన బహుమతులు మాత్రమే కాదు, అవి సులభముగా తీసుకుపోగలిగినవి కూడా. తనతో యేసేపు ఈ బంగారంను, సాంబ్రాణి, బోళములను తీసుకెళ్లొచ్చు. ఐగుప్తు ప్రయాణ ఖర్చులకు అక్కడ వారి జీవనానికి ఆసరాగా కొద్ది రోజులు ఇవి యేసేపు మరియలకు సహాయపడతాయి అంటే ఇవి వారి ముందున్న ప్రయాణము కొరకు దేవుడు ఏర్పాటు చేసిన బహుమతులు కావొచ్చు.

తరువాత జ్ఞానులు హేరోదు నొద్దకు వెళ్లవద్దని స్వప్నమందు దేవుని చేత బోధింపబడిన వారై వారు మరియొక మార్గమున తమ దేశమునకు తిరిగి వెళ్లిరి. హేరోదునొద్దకు తిరిగి వెళ్లవద్దని కలలో దేవుడు వారిని హెచ్చరించడంతో, వారు మరొక మార్గంలో తమ స్వదేశానికి బయలుదేరారు. రక్షకుని పట్ల హేరోదు కున్న ప్లాన్ లను భగ్నం చేయడానికి దైవిక జోక్యం యొక్క మరొక ఉదాహరణ ఇక్కడ ఉంది. జ్ఞానులు ఖచ్చితంగా హేరోదు యొక్క క్రూరత్వంను గురించి మరియు అతడు చేయించిన అనేకమైన హత్యలను గురించి వినే ఉంటారు. ఇప్పుడు జ్ఞానులు హేరోదు దగ్గరకు తిరిగి వెళ్లి మెస్సయ్యకు సంబంధించిన డీటెయిల్స్ ఇస్తే ఏమి జరుగుతుందో జ్ఞానులకు తెలియదా, వాళ్ళు ఆ మాత్రం ఊహించి ఉండరా? కాబట్టే దేవా, మమ్మల్ని ఏమి చెయ్యమంటారు అని వాళ్ళు దేవునిని ప్రార్దించి ఉండొచ్చు. ఆ రాత్రంతా వాళ్ళు బేత్లెహేములో గడపాలని అనుకోవడం లేదు. జవాబు కొరకు ఎదురుచూస్తూ ఉండగా వాళ్ళకి చిన్న నిద్రపట్టి ఉండొచ్చు. ఆ నిద్రలో దేవుడు వారి ప్రశ్నకు వారి స్వప్నమందు జవాబునిచ్చాడు. ఈ విషయాన్నే ఈ మాటలు తెలియజేస్తూ, వాళ్ళు హేరోదు నొద్దకు వెళ్లవద్దని స్వప్నమందు దేవుని చేత బోధింపబడిన వారైరి అని చెప్తుంది. ఇక్కడ వాడిన బోధింపబడిన వారై అను గ్రీకు మాటను, ఒక ప్రశ్న అడిగిన వ్యక్తికి జవాబు చెప్పేందుకు వాడే వాళ్లు. అంటే జ్ఞానులు దేవునిని ఒక ప్రశ్న అడిగారు, దేవుడు వారి ప్రశ్నకు స్వప్నమందు జవాబు చెప్పాడని ఈ మాటలు చెప్తున్నాయి. వారు జవాబును అందుకున్నారు, హేరోదు వద్దకు వెళ్లకుండా మరొక మార్గమున తమ దేశానికి బయలుదేరారు.

ఆయన నక్షత్రమును జ్ఞానులు యూదయ భూభాగముపై చూచినప్పుడు వాళ్ళు ఇప్పుడు జవాబు కొరకు ప్రార్దించినట్లుగానే దేవా, ఈ నక్షత్రము యూదుల రాజుకు చెందినదా? అని ప్రశ్నించి ఉండొచ్చుగా. అప్పుడు దేవుడు అవును అను జవాబుతో ఆ విషయాన్ని వాళ్లకు నిర్ధారించి ఉండొచ్చుగా.

ఈ ప్రపంచంలో ఎందరు హేరోదులు ఉన్నా దేవునికి లేదా దేవుని ప్రజలకు సరిపోరు. హేరోదు ఉద్దేశ్యాలలో చిక్కుబడకుండా దేవుడు జ్ఞానులను హెచ్చరించాడు. కాబట్టే హేరోదును తప్పించుకోగలిగారు. ఇరుకైన మరొక మార్గం ద్వారా తమ సొంత దేశానికి తిరిగి వెళ్లారు.

ఈ కథ రెండు ఉదేశ్యాలను తెలియజేస్తూ ఉంది: ఒకటి, క్రీస్తుకు సంబంధించిన ప్రవచన నెరవేర్పును చూపించడానికి, ఆయనే నిజమైన మెస్సీయ అని కాన్స్టిట్యూట్ చేయడం. మరొకటి, దేవుడు ఎలా ఏవిధముగా ఎటువంటి నిర్ధారణ నిశ్చయత ద్వారా అన్యజనులను క్రీస్తు వద్దకు నడిపించియున్నాడో తెలియజేయటమే. యేసు అందరి రక్షకుడై యున్నాడు.

అన్వయింపులో కొన్ని హెచ్చరికలను మంచిని మన కొరకు తీసుకొందాం:

జ్ఞానులులాగే ప్రభువు మిమ్మల్ని కూడా తానే రక్షకుని వద్దకు తెచ్చాడు. ఆ సంఘటనలు మీకు సాధారణమైనవిగా అనిపించి ఉండొచ్చు, అసలు మీకవి గుర్తేలేక పోవొచ్చు. కాని అవి యేసు సన్నిధిలోకి జ్ఞానులను నడిపించడానికి దేవుడు ఉపయోగించిన సంఘటనలవలె అద్భుతమైనవని మాత్రం మరచి పోకండి. జ్ఞానులు దేవునిని నమ్మారు, వారి నమ్మిక వ్యర్ధము కాలేదు. నమ్మకంతో ముందుకు వెళ్ళితే దేవుడే నిర్దేశిస్తాడు. ఆయనే తోడుగా ఉంటాడు. క్రియాశీలకంగా ఉన్న విశ్వాసానికి తప్పకుండ సహాయము దొరుకుతుంది. తమతో ఎవ్వరు రాకపోయినా క్రీస్తు నొద్దకు జ్ఞానులు ఒంటరిగానే వెళ్లారు. ఒకవేళ ఎవరు మీతో పాటు పరలోకానికి రావడానికి ఇష్టపడకపోతే, దయచేసి వాళ్ళతో మాత్రం నరకానికి వెళ్ళకండి.

హేరోదు అప్పటికే ముసలివాడు, యూదయను ముప్పై ఐదు సంవత్సరాలు పాలించాడు. జన్మించిన రాజు క్రొత్తగా అప్పుడే జన్మించాడు. అతను ఎదిగి పెద్దవాడవటానికి చాల కాలం పడుతుంది. కాని హేరోదు అతనిపై అసూయపడ్డాడు. ఎంతలా అంటే ఆ శిశువైన యేసు రక్తం మాత్రమే అతని అసూయను సంతృప్తిపరచగలిగే అంతగా. ఆ శిశువు మెస్సయ్య అంటే దేవుని కుమారుడు, దేవుడే. ఆయనను వ్యతిరేకించడం లేదా ఆయనపై ఏవైనా ప్రయత్నాలు చేస్తే, హేరోదు దేవునికి వ్యతిరేకంగా పోరాడుతున్నట్లు, దానికంటే వ్యర్ధమైన పని మరొకటి లేదు, అది ప్రమాదకరం. మరి తెలిసి తెలిసి ఎందుకని హేరోదు యేసును అడ్డు తొలగించుకోవాలను కొన్నాడు? దీనికి ఒకటే కారణం, హేరోదు యొక్క కాంక్ష అతని మనసును మనసాక్షిని లోపరచుకొని దానిపై అధికారాన్ని చెలాయించడమే అని చెప్పొచ్చు. అతడు తన కాంక్షలకు ఎంత వ్యసనపరుడై యున్నాడో చూడండి. రెండవదిగా, దీని వెనుక మనకు ఆగర్భ శత్రువైన సాతానుడు కూడా ఉన్నాడు. మెస్సయ్యను మట్టుపెట్టి తద్వారా మానవాళికి విముక్తిని రక్షణను దూరం చేయాలన్నదే వాడి సంకల్పం. హేరోదు ఎంత ప్రయత్నించినా, ప్రపంచ రక్షణ కోసమైన దేవుని ప్రణాళికను భగ్నం చేయలేడు.

యూదుల సౌకర్యవంతమైన జీవితము వారి జీవితాలను తన స్వాధీనములో ఉంచుకొంది మరి మన విషయములో?

ఐగుప్తుకు తప్పించుకోవడం 13-18

మత్తయి 2:13-18_ ¹³వారు వెళ్లిన తరువాత ఇదిగో ప్రభువు దూత స్వప్నమందు యోసేపునకు ప్రత్యక్షమై–హేరోదు ఆ శిశువును సంహరింపవలెనని ఆయనను వెదకబోవుచున్నాడు గనుక నీవు లేచి ఆ శిశువును ఆయన తల్లిని వెంటబెట్టుకొని ఐగుప్తునకు పారిపోయి, నేను నీతో తెలియజెప్పు వరకు అక్కడనే యుండుమని అతనితో చెప్పెను. ^14-15అప్పుడతడు లేచి, రాత్రివేళ శిశువును తల్లిని తోడుకొని, ఐగుప్తునకు వెళ్లి, ఐగుప్తులో నుండి నా కుమారుని పిలిచితిని అని ప్రవక్త ద్వారా ప్రభువు సెలవిచ్చిన మాట నెరవేర్చబడునట్లు హేరోదు మరణము వరకు అక్కడనుండెను. ¹⁶ఆ జ్ఞానులు తన్ను అపహసించిరని హేరోదు గ్రహించి బహు ఆగ్రహము తెచ్చుకొని, తాను జ్ఞానుల వలన వివరముగా తెలిసికొనిన కాలమును బట్టి, బేత్లెహేములోను దాని సకల ప్రాంతములలోను, రెండు సంవత్సరములు మొదలుకొని తక్కువ వయస్సుగల మగపిల్లల నందరిని వధించెను. ¹⁷అందువలన –రామాలో అంగలార్పు వినబడెను ఏడ్పును మహా రోదనధ్వనియు కలిగెను ¹⁸రాహేలు తన పిల్లల విషయమై యేడ్చుచు వారు లేనందున ఓదార్పు పొందనొల్లక యుండెను అని ప్రవక్తయైన యిర్మీయా ద్వారా చెప్పబడిన వాక్యము నెరవేరెను.

యెరూషలేము నుండి బేత్లెహేముకు రెండు గంటల ప్రయాణం. జ్ఞానులు హేరోదుతో మాట్లాడిన రోజునే వాళ్ళు బేత్లెహేముకు చేరుకున్నారు, క్రీస్తును కనుగొన్నారు, ఆయనను సేవించారు. దేవుని చేత భోధింపబడి మరొక దారిన తిరిగి వాళ్ళ ఊరికి వాళ్ళు వెళ్లిపోయారు. యేసేపు, మరియ, శిశువైన క్రీస్తు కూడా అదే రాత్రి బేత్లెహేము నుండి బయలుదేరి ఐగుప్తునకు పారిపోయారు. ఉదయానికి జ్ఞానులు గాని యేసేపు చిన్న కుటుంబంగాని కనబడకుండ పోయారు. క్రీస్తు ఏ ఇంట్లో ఉన్నాడో ఎవరికీ తెలియదు కాబట్టి బెత్లెహేమ్‌లో ఎవ్వరికి యేసేపు కుటుంబాన్ని గురించి గాని వాళ్ళు ఎక్కడకు వెళ్లారో, ఎక్కడున్నారో చెప్పలేని పరిస్థితి.

సాతాను, సాతానుచే చెడగొట్టబడిన మనిషి తమ వికృతమైన దుర్మార్గమైన చిత్తాన్ని నెరవేర్చుకోవడానికి ఎలా ప్రయత్నిస్తారో దేవునికి ముందుగానే తెలుసు. వారి దుర్మార్గమైన చర్యలు, పనులలో కూడా దేవుని ముందస్తు జ్ఞానం పనిచేస్తూనే ఉంటుంది. దేవుడు చెడును ఇష్టపడడు కాబట్టి ఆ చెడుకు ఒక పరిమితి కొలత time ఉంది. ఆయన ఎప్పుడు, ఎలా దానితో జోక్యం చేసుకొంటాడో శిక్షిస్తాడో అనే విషయాలు దేవుని చేతిలోనే ఉంటాయి. దేవుని కృపా మహిమకు కీర్తి కలుగునట్లు ఆయన ప్రతిదీ నియంత్రిస్తూనే ఉన్నాడని, సమస్తమును ఆయన స్వాధీనములోనే ఉన్నవనే విషయాన్ని మరచిపోకండి.

శిశువును ఆయన తల్లిని వెంటబెట్టుకొని ఐగుప్తునకు పారిపోయి, నేను నీతో తెలియజెప్పు వరకు అక్కడనే యుండుమని ప్రభువు దూత స్వప్నమందు యోసేపునకు చెప్పింది. ఆయన తల్లిని అనే మాటలలో కన్యక గర్భవతియై కుమారుని కనును అనే వాగ్ధానాన్ని ఈ మాటలు వక్కాణిస్తున్నాయి. హేరోదు నుండి తప్పించుకోవడానికి క్రీస్తును యేసేపును, మరియలను దేవుడు ఐగుప్తుకే ఎందుకని వెళ్ళమన్నాడు? ఎందుకంటే, దేవుని ప్రవచనాలు దీనితో ముడిపడి ఉన్నాయి కాబట్టి ఆయన వారిని అక్కడికి వెళ్ళమన్నాడు. యేసు నెరవేర్చిన ఆ ప్రవచనాలేంటో తెలుసుకొందాం: మొదటి ప్రవచనము: హోషేయ 11:1_ ఇశ్రాయేలు బాలుడైయుండగా నేను అతని యెడల ప్రేమగలిగి నా కుమారుని ఐగుప్తు దేశములో నుండి పిలిచితిని.

1. ఈ మాటలు “ఇశ్రాయేలు” విషయములో నెరవేరాయని పాత నిబంధన చెప్తుంది. యాకోబు కుమారుడైన యేసేపు టైంలో యెహోవా ఐగుప్తు నుండి తన బిడ్డ అయిన ఇశ్రాయేలును పిలుచుట ద్వారా వారిని కరువు నుండి మరణం నుండి కాపాడాడు.
2. ఈ మాటలు యేసు జీవితములో కూడా నెరవేరాయని కొత్త నిబంధన చెప్తుంది. క్రీస్తు ఇశ్రాయేలుకు ప్రతి రూపం. తన ఏకైక కుమారుణ్ణి హేరోదు రాజు చేతిలో నుండి రక్షించడానికి యెహోవా తన బిడ్డ అయిన ఇశ్రాయేలును యేసేపు మరియలను ఐగుప్తు నుండి పిలిచాడు.

మనం గుర్తుంచుకోవలసిన మరొక విషయం, ఐగుప్తు నుండి ఇశ్రాయేలు యొక్క నిర్గమము అంటే, దేవుడు తాను ఏర్పరచు కొనిన వారిని దాస్యము నుండి విడిపించడం. ఈ చర్యలో, దేవుని చిత్తము నెరవేరింది కాని అది పాక్షికంగా మాత్రమే. దేవుడు తన సొంత కుమారుడిని ఐగుప్తు నుండి పిలిచి తిరిగి ఆయనను వాగ్ధాన దేశమునకు నడిపించడంలో ఆయన చిత్తము పూర్తిగా నెరవేరింది.

ఐగుప్తులో వీళ్లు ఎక్కడికి వెళ్లారు? ఎక్కడ ఉండేవాళ్ళు? అనే ప్రశ్నలకు బైబులు జవాబు ఇవ్వడం లేదు. అయితే ఆ రోజులలో యూదులు ఎక్కువగా ఆశ్రయించిన ప్రదేశం, వారి జీవనోపాధి కోసం ఏర్పాటు చేయబడిన పట్టణము ఐగుప్తులోని అలెగ్జాండ్రియా. కాబట్టి యేసేపు మరియ యేసులు అలెగ్జాండ్రియాకు వెళ్లారని యూదులలో కొందరు చెప్తారు. Tradition యేమని చెప్తుందంటే, యేసేపు మరియ, యేసు నైలు డెల్టా ప్రాంత మధ్య భాగంలో ఉన్న ఒక ఈజిప్షియన్ నగరమైన లియోంటోపాలిస్ సమీపంలోని మాతారెయాకు వెళ్లారని అక్కడ నివసించారని తెలియజేస్తుంది. వాళ్ళు బహుశా తమ ప్రయాణానికి, ఐగుప్తులో బస చేయడానికి జ్ఞానుల నుండి స్వీకరించిన ఖరీదైన బహుమతులను ఉపయోగించి ఉండొచ్చు.

ఐగుప్తుకు వెళ్లడంలో ఉన్న advantages చూధ్ధాం. మొదటిది, పాత నిబంధన కాలములో ఐగుప్తు ఒక సాంప్రదాయ ఆశ్రయ ప్రదేశం అని మనం గ్రహించాలి. అబ్రాహాము కరువు కాలంలో ఐగుప్తుకు వెళ్లినట్లుగా ఆదికాండము 12:10 చెప్తుంది. అట్లే యాకోబు అతని 70 మంది కుటుంబ సభ్యులు కరువు కారణంగానే ఐగుప్తులో ఆశ్రయం పొందారనే విషయాన్ని ఆదికాండము 46 చెప్తుంది. వాళ్ళు అక్కడ శక్తివంతమైన దేశంగా మారారు. దాదాపు నాలుగు వందల సంవత్సరాల తరువాత దేవుడు మోషే క్రింద వారిని వాగ్దాన దేశానికి నడిపించే వరకు వారు ఐగుప్తులో ఉన్నారనే విషయం మనకందరికి తెలుసు. సొలొమోను యరొబామును చంపచూడగా యరొబాము లేచి ఐగుప్తు దేశానికి పారిపోయి ఐగుప్తు రాజైన షీషకునొద్ద చేరి సొలొమోను మరణమగు వరకు ఐగుప్తులోనే యుండెనని 1 రాజులు 11:40 చెప్తుంది. ఉరియా అను ప్రవక్తను రాజైన యెహోయాకీమును అతని శూరులందరును ప్రధానులందరును చంపచూడగా అతడు ఐగుప్తుకు పారిపోయాడనే విషయం యిర్మీయా 26: 21-23 తెలియజేస్తుంది. ఈ లేఖనభాగాల ఆధారంగా ఐగుప్తు అనేది ఒక సంప్రదాయమైన ఆశ్రయ ప్రదేశమని చెప్పొచ్చు.

రెండవదిగా, సుదీర్ఘమైన దుర్భరమైన ప్రయాణం మరియకు ఆమె చిన్న బిడ్డకు తగినది కాదు. ఐగుప్తు యూదయకు నైరుతి దిశలో బెత్లెహేము నుండి దాదాపు 60మైళ్ల దూరంలో మాత్రమే ఉంది. అక్కడ చాలామంది యూదులు ఉన్నారు, వారికి అక్కడ దేవాలయం సమాజమందిరాలు కూడా ఉన్నాయనే విషయాన్ని యెషయా 19:18,19 తెలియజేస్తున్నాయి. కాబట్టి యేసేపు మరియలు తమ సొంత దేశస్థుల మధ్య సౌఖ్యముగా ఎలాంటి ఇబ్బంది లేకుండా ఐగుప్తులో ఉండొచ్చు. అది ఒక అడ్వాంటేజ్. అట్లే శిశువైన యేసు కాలములో ఇది రోమన్ ప్రావిన్స్. హేరోదు యొక్క అధికార పరిధి సిహోన్ నది వరకు మాత్రమే కాబట్టి హేరోదు వారిని చేరుకోలేడు. ఇది మరొక అడ్వాంటేజ్.

శిశువును ఆయన తల్లిని వెంటబెట్టుకొని ఐగుప్తునకు పారిపోయి, నేను నీతో తెలియజెప్పు వరకు అక్కడనే యుండుమని ప్రభువు దూత స్వప్నమందు యోసేపునకు చెప్పింది. ఈ మాటలలో మనలను ఇబ్బందిపెట్టే ఒక మాట ఉంది, “పారిపోయి” అనే మాట. ఆ శిశువు “శరీరధారియైయున్న నిజదేవుడు”. ఆయన భూసంబంధమైన ఒక రాజు నుంచి పారిపోవడం అవమానకరంగా లేదా అని ఎవరన్నా ప్రశ్నించారనుకోండి ఎలా జవాబిస్తాం?

జవాబుగా, ఇక్కడ యేసేపు విశ్వాసము త్రీవంగా పరీక్షింపబడినదని మనం తప్పకుండ ఒప్పుకొని తీరాలి. నిశ్చయముగా ఈ శిశువేవరో యేసేపుకు తెలుసు. అతడు గొర్రెలకాపరుల అనుభవాన్ని విన్నాడు. సుమెయోను హన్నా చెప్పిన మాటలను విన్నాడు. జ్ఞానుల అనుభవాన్ని గురించి కూడా విన్నాడు. ఇప్పుడు ఆ శిశువు విషయములో దేవుని ఈ మాటలు. ఈ మాటలు యేసేపులో సందేహాలను రేకెత్తించి ఉండొచ్చా. ఇది నిజమా? ఇది సాధ్యమా? తన పక్షమున కోట్లకొలదిగా దేవదూతలను కలిగియున్న ఈ శిశువును తీసుకొని నేను ఐగుప్తుకు పారిపోవాలా? ఈ చీకట్లోనా?

అయితే, ఇశ్రాయేలు యొక్క ఓదార్పు కోసం ఎదురుచూస్తున్న వాళ్ళు లోకము యొక్క ద్వేషాన్నికూడా తప్పకుండా అనుభవించాల్సి ఉంటుందనే విషయం నీతిమంతుడైన యేసేపుకు అనుభవమే. ఈ శిశువు విషయములో ఈ విషయాన్ని గురించే సిమియోను ప్రవచిస్తూ, లూకా 2:34-35లో, ఇదిగో అనేక హృదయాలోచనలు బయలుపడునట్లు ఇశ్రాయేలులో అనేకులు పడుటకును తిరిగి లేచుటకును వివాదాస్పదమైన గురుతుగా ఈయన నియమింపబడి యున్నాడు; మరియు నీ హృదయము లోనికి ఒక ఖడ్గము దూసికొని పోవునని ఆయన తల్లియైన మరియతో చెప్పటం యేసేపు విన్నాడు కూడా. కాబట్టి ప్రభువు యొక్క అభిషిక్తునికి లోకము విరోధమనే సంగతి యేసుపుకు ఆశ్చర్యాన్నేమి కలిగించి ఉండక పోవొచ్చు. అతడు సంతోషముతో ఆ భాధ్యతను తీసుకొన్నాడు. వెంటనే యేసేపు నిద్ర నుండి లేచి తడవు చేయక, తక్షణమే ఆ బాధ్యతకు విధేయుడయ్యాడు. అదే రాత్రి అతడు నిశ్శబ్దంగా తన సంరక్షణకు అప్పగించబడిన వారితో తప్పించుకున్నాడు.

రక్షణ కోసం దేవదూతల మహా సైన్యాన్ని తన కోసం తన తండ్రిని అడగగలిగిన యేసు ఒక వ్యక్తి నుండి బలవంతముగా పారిపోవలసి రావటం, అవమానకరం కాదు, అది ఆయన దీనత్వములో ఒక భాగము. యేసు నిజదేవుడు నిజమానవుడు. సర్వశక్తిమంతుడైన దేవుడు చాల మాములు మనిషి అయిన యేసేపు (రక్షకభటుని) చేతిలో “ప్రశాంతముగా” ఉన్నాడనే విషయాన్ని మరచిపోకండి. ఆయన ఘడియ ఇంకను రాలేదు. కాబట్టి ఆయనకు జరిగే ప్రమాదమేమీ లేదు, ఆయన ఘడియ వచ్చే వరకు అది దేవుని చిత్తము. ఈ విషయం దేవునికి తన ముందస్తు జ్ఞానములో జగత్తు పునాది వేయబడక ముందే అంటే హేరోదు ఆ శిశువును సంహరింపవలెనని ఆయనను వెదకుననే విషయం ఆయనకు తెలుసు అనే విషయాన్ని మరచిపోకండి.   

కాని కొంతమంది యేసు ఈ ఐగుప్తు ప్రయాణాన్ని ఆయన దీనత్వములో భాగముగా చూడక ఈ విషయాన్ని అవమానకరంగా చూడటం మూలన్నా ఐగుప్తులో యేసు చేరవలసిన స్థలాన్ని చేరే వరకు యేసును హైలైట్ చేస్తూ కొన్ని కధలను వాడుక లోనికి తెచ్చారు. అంతేనా మరికొందరు ఐగుప్తులో యేసు ఉన్న కాలములో, ఉదేశ్యపూర్వకంగా, యేసును తక్కువ చెయ్యాలని, ఆయన అంతటి కీర్తిని మా మతము నుండి మా మనుష్యుల నుండి నేర్చుకున్నాడని చెప్పేందుకు మరిన్ని కధలను వాడుక లోనికి తెచ్చారు. బైబులు వాటిని గురించి ఏమి చెప్పటం లేదు. బైబులు మాట్లాడని వాటిని గురించి మనకెందుకు చెప్పండి.

జ్ఞానులు తన్ను అపహసించిరని హేరోదు గ్రహించి బహు ఆగ్రహము తెచ్చుకొని, అనే మాటలలో, అపహసించుట అనే మాటకు అర్ధం, “తప్పు త్రోవ పట్టించుట, మోసగించుట, నాతోనే ఆటలా అని అర్ధం.” పిల్లవాడి యొక్క ఖచ్చితమైన ఆచూకీతో జ్ఞానులు తిరిగి వస్తారని హేరోదు వారి కొరకు ఎదురుచూసి ఉండొచ్చు. జ్ఞానులు తిరిగి రాలేదు. హేరోదు ప్రణాళికలో ఒక భాగం ఫలించలేదు. వాళ్ళు రాకపోవడంతో అతడు మోసపోయానని నిర్ధారించుకొన్నాడు. హేరోదులో ఆగ్రహము కట్టలు తెంచుకొంది. నిజానికి జ్ఞానులు హేరోదును మోసగించలేదు. దేవుడు చెప్పినట్లుగా వాళ్ళు చేసారు. హేరోదు మాటకంటె దేవుని మాటకే విలువనిచ్చారు. హేరోదు ఆ శిశువును సంహరింపవలెనని ఆయనను వెదక బోవుచున్నాడు, అనే మాటలలో హేరోదు ఏ నిర్ణయాన్ని ఆ శిశువుపట్ల తీసుకోబోతున్నాడో దేవుడు తన ముందస్తు జ్ఞానములో ముందుగానే యేసేపుకు తెలియజేశాడు. ప్రమాదాన్ని ముందుగానే చెప్పించిన దేవునికి ఆ ప్రమాదపు సరిహద్దు తెలియదంటారా? ఆ ప్రమాదము ఏరీతిగా ఉంటుందో తెలియదంటారా? ఆ ప్రమాదపు సరిహద్దు నుండి తన కుమారుని యేరీతిగా, ఎక్కడ, ఏ టైములో దాటించాలో జగత్తు పునాది వేయబడక మునుపే నిర్ణయింపబడింది అనే విషయాన్ని మర్చిపోకండి.

తన పధకం విచ్చిన్నమవ్వటం బట్టి హేరోదు భయపడి ఉండొచ్చు. మెస్సయ్య తన చేతుల నుండి తప్పించుకుంటాడనే ఆలోచన అతనిలో అసహనాన్ని కోపాన్ని ఎంతగానో పెంచింది. కాబట్టే న్యాయా న్యాయాలు పట్టించుకోకుండా నిరంకుశ రాజుగా వ్యవహరిస్తూ, తాను జ్ఞానుల వలన వివరముగా తెలిసికొనిన కాలాన్ని బట్టి, (అంటే మెస్సయ్య వయ్యస్సును ఊహిస్తూ, ఆ మెస్సయ్య తన చేతులలో నుండి తప్పించుకోకుండా) బేత్లెహేములోను దాని సకల ప్రాంతములలోను, రెండు సంవత్సరములు మొదలుకొని తక్కువ వయస్సుగల మగపిల్లలనందరిని వధించమని ఆజ్ఞాపించి ఉండొచ్చు.

బేత్లెహేములోనే కాకుండా దాని చుట్టూ ఉన్న గ్రామాలలోని పిల్లలను హేరోదు ఎందుకని చంపించాడు? అనే ప్రశ్నకు, మెస్సయ్య తప్పించుకోకూడదు, తప్పకుండా మరణించాడు అనే నిశ్చయత కోసం చంపించాడు. ఎంతమంది పిల్లలు మరణించి ఉండొచ్చు? అనే ప్రశ్నకు, బేత్లెహేము ఒక చిన్నగ్రామము కాబట్టి, చంపబడిన పిల్లల సంఖ్య దాదాపు 15 లేదా 20మంది మధ్య ఉండొచ్చు, ఖచ్చితముగా తెలియదు.

అయితే ఇక్కడ ఈ పిల్లలు ఖచ్చితంగా మరణానికి తగిన నేరం చేయలేదు మరి ఈ పిల్లలు చంపబడుటకు దేవుడు ఎందుకని హేరోదును అనుమతించాడు? అని కొందరు ప్రశ్నించొచ్చు. ఈ ప్రశ్నకు మార్టిన్ లూథర్ గారు జవాబు చెప్తూ, సున్నతి ద్వారా ఆ చిన్నపిల్లలు దేవుని ద్వారా దేవునితో నిబంధన కృపలోనికి ప్రవేశించి ఉన్నారనే విషయాన్ని గుర్తుచేసుకోమని చెప్పాడు. అలాగే ఆ చిన్నపిల్లలు వాళ్ళ నిర్దోషత్వములో వాళ్ళు మరణించడంలో ఈ పిల్లలకు రెండు ప్రయోజనాలు ఉన్నాయనే విషయాన్ని మనం మరచిపోకూడదు అని చెప్పాడు. మొదటి ప్రయోజనమేమిటంటే, ఆ పిల్లలు జీవించి ఉంటే వాళ్ళు అసలు (actual) పాపాలు చేసేవాళ్ళు, కాని ఇప్పుడు వారి మరణం వారికి దేవునితో దీవెనకరమైన జీవితాన్ని అందించింది. రెండవ ప్రయోజనమేమిటంటే, వారు క్రీస్తు కొరకు చనిపోయారు, వారి మరణం పాపానికి శిక్ష కాదు, అత్యంత ఆశీర్వదకరం అని చెప్పాడు. కాబట్టే చంపబడిన ఈ పిల్లలు “ఫ్లవర్ అఫ్ martyrdom” అని పిలువబడుతూ ఉన్నారు. క్రైస్తవ సంఘము యొక్క మొట్ట మొదటి హత సాక్షులు వీళ్ళు. వీళ్ళు క్రీస్తు కొరకు చంపబడ్డారు.

హేరోదు చేసినది ఘోరమైన నేరం. మన రోజుల్లో ఖచ్చితంగా మరణానికి తగిన నేరం చేయని పిల్లలను అబార్షన్ చేయడం ద్వారా వేలాది మంది పుట్టబోయే పిల్లలను ఉద్దేశపూర్వకంగా నాశనం చేయడాన్ని ఇది మనకు గుర్తు చెయ్యడం లేదా? ఇది నేరం కాదా? హేరోదు నేరానికి పాల్పడినప్పుడు తన స్వంత అధికారానికి  ముప్పు ఉందని అనుకొని “మెస్సయ్యను” చంపడానికి ప్రయత్నించాడు. రక్తపాత విప్లవం జరగడానికి అనుమతించడం కంటే 15 లేదా 20 మంది పిల్లలను బలి ఇవ్వడం మంచిదని అతడు వాదించొచ్చు. నేడు మనం మన సౌలభ్యం కోసం పుట్టబోయే పిల్లలను హత్య చేస్తున్నాం. మన దేశ చట్టాలు దానిని అనుమతిస్తాయి. స్వార్థం హత్యను మంచి పనిలా చేస్తుంది.       

కొందరు హేరోదు ఆదేశాల మేరకు పిల్లలను దారుణంగా చంపేసిన వ్యక్తుల సంగతేంటి? అని ప్రశ్నిస్తుంటారు. ఈ ప్రశ్నకు 2 రకాలుగా జవాబులు చెప్పొచ్చు:

1. ఇటువంటి హంతక చర్యకు సహాయపడే వాళ్లు ఖండింపబడిన వాళ్ళై ఉంటారు. ఇది వాళ్ళ స్వభావముపై ఆధారపడి ఉంటుంది అనే విషయాన్ని మనం మరచిపోకూడదు.
2. అలాగే పబ్లిక్ సర్వెంట్స్ మంచి చెయ్యడం కంటే చెడ్డపనులు చెయ్యడానికే ఎల్లప్పుడు సిద్ధముగా ఉండాలి అనే విషయం మనకందరికి తెలుసు. ఇక్కడ హేరోదు ఆజ్ఞ చెడు చెయ్యమని, కాని ఈ చెడ్డ పనిలో involveయైన వాళ్ళకి మంచి ఉదేశ్యం ఉండొచ్చు.

పిల్లలను చంపడంలో వాళ్ళకి మంచి ఉదేశ్యము ఏమై ఉంటుంది? మెస్సయ్యను గూర్చిన వార్తను బహిరంగంగా నిర్ధారిస్తే, ప్రకటిస్తే ఆ వార్త సెన్సేషనల్ వార్త అవుతుంది. దేవుని రక్షణ ప్రణాళికకు దేవుని చిత్తానికి విరోధముగా ప్రజలు ఈ లోక సంబంధమైన రాజుకు ప్రాధాన్యతను ఇచ్చి తిరుగుబాటు చేస్తారు. వేలాదిమంది చంపబడతారు. యేసు చుట్టూ కోటరి ఏర్పడుతుంది. యేసును ఈ లోక సంబంధమైన రాజుగా పెంచుతారు, దేవుని చిత్తములో మనుష్యులు జోక్యం చేసుకొని రక్షణ ప్రణాళికను జరగకుండా చూస్తారు. ఆ బిడ్డ పెరిగి పెద్దవాడైన తరువాత మళ్ళి సింహాసనము కొరకు తిరుగుబాటు చేసేలా ప్రజలను ప్రేరేపిస్తారు. మళ్ళి వేలాదిమందిగా మరణిస్తారు. ఇంత మారణకాండకు బదులుగా ఒక 20మంది చిన్న పిల్లలను త్యాగం చేయడం ఇప్పుడు మంచిది అని వాళ్ళు అనుకొని ఉండొచ్చు. అట్లే హేరోదు ఆదేశాల మేరకు పిల్లలను దారుణంగా చంపేసిన వ్యక్తులు హేరోదు ఆదేశాల మేరకు చేస్తున్నట్లుగా నటిస్తూ ఒక మంచి కార్యం చేస్తున్నట్లుగా భావించి ఉండొచ్చు కదా.

బేత్లెహేములో శిశువుల వధ కూడా పాత నిబంధన ప్రవచన నెరవేర్పు. ఈ విభాగములో నెరవేర్చబడిన రెండవ ప్రవచనము: యిర్మీయా 31:15_ యెహోవా ఈలాగు సెలవిచ్చుచున్నాడు– ఆలకించుడి, రామాలో అంగలార్పును మహా రోదన ధ్వనియు వినబడుచున్నవి; రాహేలు తన పిల్లలను గూర్చి యేడ్చుచున్నది; ఆమె పిల్లలు లేకపోయినందున ఆమె వారిని గూర్చి ఓదార్పు పొందనొల్లకున్నది.

రామా అనేది బెంజమిన్ గోత్రానికి చెందిన భూభాగములో ఒక పట్టణం. ఈ విషయం యెహోషువ 18:23-26 లో చెప్పబడింది. రామా యూదా గోత్రములోని బేత్లెహేమునకు చాల దగ్గరలో ఉండెడిది. ఈ రెండిటికి మధ్యలో రెండిటికి దగ్గరగా రాహేలు సమాధి ఉందనే విషయాన్ని ఆదికాండము 35: 19 తెలియజేస్తూ, రాహేలు మృతి బొంది బేత్లెహేమను ఎఫ్రాతా మార్గమున పాతిపెట్టబడెను అని చెప్తుంది. బెంజమిన్ రాహేలు కుమారుడు, రామా బెంజామిన్కు చెందిన భూభాగము. యూదా బేత్లెహేము దాని చుట్టూ ఉన్న గ్రామాలలో రామా కూడా ఒక్కటి. పాత నిబంధన కాలములో, నెబుకద్నెజరు యెరూషలేము నుండి ఉత్తరాన ఐదు మైళ్ల దూరంలో ఉన్న రామాలో తాను బందీలుగా పట్టుకొన్న యూదా ప్రజలందరిని అక్కడ ఉంచి అక్కడి నుండి వాళ్ళని ప్రవాసానికి తరలించాడు. బందీలుగా మారిన ఇశ్రాయేలీయులు చివరిసారిగా తమ పవిత్ర పట్టణాన్ని చూస్తూ అంగలారుస్తూ రోదిస్తూ ప్రవాసానికి తరలింపబడ్డారు. అక్కడ రామా వద్ద తన పిల్లలకు కలిగిన శ్రమ దుస్థితిని బట్టి ఆ జాతికి తల్లి అయిన రాహేలు తన పిల్లల విషయమై యేడ్చుచు వారు లేనందున ఓదార్పు పొందనొల్లకున్నదని ప్రవక్త ప్రవచించినట్లుగానే జరిగింది.

కొత్త నిబంధన కాలములో బేత్లెహేము దానిచుట్టూ ఉన్న గ్రామాలలో మారణకాండ జరిగింది. చాలామంది పిల్లలు చంపబడ్డారు. బేత్లెహేము దానిచుట్టూ ఉన్న గ్రామాలలో పిల్లలు చంపబడిన తల్లులకు రాహేలు ప్రతినిధ్యము వహిస్తూ, తన పిల్లల విషయమై యేడ్చుచు వారు లేనందున ఓదార్పు పొందనొల్లకున్నది అనే ప్రవచనము క్రీస్తును నాశనంచేయడానికి సాతాను చేసిన ప్రయత్నంలో బెత్లెహేంలోని చిన్నపిల్లలు క్రూరముగా చంపబడటం వారి తల్లుల అంగలార్పు, రోదన యిర్మీయా ప్రవచనం మరొకసారి నెరవేర్చబడటం గురించి తెలియజేస్తుంది.

నజరేత్‌కు తిరిగి రావడం 19-23

మత్తయి 2:19-23_ ¹⁹హేరోదు చనిపోయిన తరువాత ఇదిగో ప్రభువు దూత ఐగుప్తులో యోసేపునకు స్వప్నమందు ప్రత్యక్షమై ²⁰–నీవు లేచి, శిశువును తల్లిని తోడుకొని, ఇశ్రాయేలు దేశమునకు వెళ్లుము; ²¹శిశువు ప్రాణము తీయజూచుచుండిన వారు చనిపోయిరని చెప్పెను. అప్పుడతడు లేచి, శిశువును తల్లిని తోడుకొని ఇశ్రాయేలు దేశమునకు వచ్చెను. ^22-23అయితే అర్కెలాయు తన తండ్రియైన హేరోదునకు ప్రతిగా యూదయ దేశమును ఏలుచున్నాడని విని, అక్కడికి వెళ్ల వెరచి, స్వప్నమందు దేవునిచేత బోధింపబడినవాడై గలిలయ ప్రాంతములకు వెళ్లి, నజరేతను ఊరికి వచ్చి అక్కడ కాపురముండెను. ఆయన నజరేయుడనబడునని ప్రవక్తలు చెప్పిన మాట నెరవేరునట్లు (ఈలాగు జరిగెను.)

హేరోదు చనిపోయిన తరువాత ఇదిగో ప్రభువు దూత ఐగుప్తులో యోసేపునకు స్వప్నమందు ప్రత్యక్షమై -నీవు లేచి, శిశువును తల్లిని తోడుకొని, ఇశ్రాయేలు దేశమునకు వెళ్లుము; శిశువు ప్రాణము తీయజూచుచుండిన వారు చనిపోయిరని చెప్పెను_ శిశువు ప్రాణము తీయజూచుచుండిన వారు_ అంటే బహువచనము. హేరోదు కాకుండా శిశువు ప్రాణము తీయజూచుచుండిన వారు ఇంకా ఎవరై ఉంటారు? ఈ మాటలు హేరోదు అతని కుమారుడైన ఆంటిపేటర్ని గూర్చి అయ్యి ఉండొచ్చు.

ఆంటిపేటర్ హేరోదు మొదటి భార్య కుమారుడు, తన వారసునిగా హేరోదు ది గ్రేట్ చేత ప్రకటింపబడినవాడు. దేశములో హేరోదు తరువాత అంతటి పొజిషన్లో అధికారంలో ఉన్నవాడు. ఆంటిపేటర్ తన తండ్రి లాగానే క్రూరమైన స్వభావం కలిగిన వాడు. హేరోదు ది గ్రేట్ మరణానికి అయిదురోజుల ముందు ఆంటిపేటర్ తన తండ్రి అయిన హేరోదు ది గ్రేట్ ను ఉదేశ్యపూర్వకముగా చంపడానికి ప్రయత్నించాడనే నేరారోపణతో హేరోదు ఆజ్ఞతో చంపబడ్డాడు.

హేరోదు ది గ్రేట్, తీవ్ర అనారోగ్యంతో తన 71వ సంవత్సరంలో యెరికోలో మరణించాడు. చరిత్రకారుడైన జోసెఫస్ హేరోదు దుర్భరమైన మరణం గురించి తెలియజేస్తూ_ చివరి రోజులలో హేరోదు విపరీతమైన ఏమాత్రమును తగ్గని జ్వరంతో భాదపడ్డాడని, శరీరమంతా తట్టుకోలేని దురదతో విపరీతమైన కడుపు నొప్పితో ఇబ్బందిపడ్డాడని, అతని పాదాలు బాగా ఉబ్బిపోయాయని, బొడ్డు యొక్క దిగువభాగంలో విపరీతమైన మంటను కలిగి ఉన్నాడని, అతని ప్రైవేట్ భాగాలు కుళ్లిపోయి పురుగులు పట్టాయని, శ్వాస తీసుకోవడంలో చాలా ఇబ్బందిపడ్డాడని, తరచుగా మూర్ఛ వచ్చేదని, విపరీతమైన ఆకలి, దుర్వాసనతో నిండిన శ్వాస, అతని పేగులు అల్సర్‌తో నిండిపోయాయని, నరకయాతన అనుభవించాడని, దగ్గరకు వెళ్లలేనంత దుర్గంధముతో ఉండేవాడని, వాడిన మందులు పనిచేయ లేదని, అతను చాలా ఉద్రేకంతో అసహనంతో ఉండేవాడని, తనను తాను హింసించుకొనేవాడని, అతని దగ్గరకు వెళ్ళడానికే జనాలు భయపడేవారని, అతని సహజమైన క్రూరత్వం, ఆవేశంతో, అతన్ని గతంలో కంటే మరింత అనాగరికంగా చేసిందని, తన ఈ దుస్థితికి తన పెద్ద కుమారుడు కారణమేమోనని అనుమానించి చంపాలని ఆదేశించిన తరువాత, తన దుస్థితిని బట్టి ప్రజలు సంతోషించకుండా చాలామంది ప్రభువులను మరియు పెద్దమనుషులను జైలులో పెట్టించాడని, చివరికి దయనీయమైన స్థితిలో మరణించాడని వ్రాసాడు.

హేరోదు ది గ్రేట్ తన వీలునామాలో నుండి ఆంటిపేటర్ పేరును తొలగించి ఆర్కెలాస్ పేరును చేర్చి తన తరువాత తన వారసునిగా అతనికి ఆధిక్యతను ఇచ్చాడు. హేరోదు రాజ్యములో సగభాగము ఆర్కెలాస్ కు మిగతా రాజ్యము మిగిలిన ఇద్దరు కుమారులకు హేరోదు చనిపోయిన తరువాత ఇవ్వబడింది. హేరోదు ఆర్కెలాస్‌కు యూదయ, ఇడుమియా మరియు సమారియా, హేరోదు ఫిలిప్పుకు బటానియా మరియు ట్రాకోనిటిస్, హేరోదు అంటిపాస్ కు గలిలయ, పెరియా అను భూభాగాలు ఇవ్వబడ్డాయి. యేసు, అపొస్తలుల కాలములో ఉన్న హేరోదులు వీళ్ళే. 

యేసేపు మరియ శిశువైన క్రీస్తు ఐగుప్తులో కొన్ని నెలలు మాత్రమే ఉండి ఉండొచ్చు. హేరోదు చనిపోయిన తరువాత ఇదిగో ప్రభువు దూత ఐగుప్తులో యోసేపునకు స్వప్నమందు ప్రత్యక్షమై -నీవు లేచి, శిశువును తల్లిని తోడుకొని, ఇశ్రాయేలు దేశమునకు వెళ్లుము; శిశువు ప్రాణము తీయజూచుచుండిన వారు చనిపోయిరని చెప్పగా అప్పుడు యేసేపు బయలుదేరి, శిశువును తల్లిని తోడుకొని ఇశ్రాయేలు దేశమునకు వచ్చాడు. అయితే హేరోదు ఆర్కెలాస్‌ తన తండ్రియైన హేరోదునకు ప్రతిగా యూదయదేశము ఏలుచున్నాడని విని, అక్కడికి వెళ్ల వెరచెను అని బైబులు చెప్తుంది.

యేసేపు అక్కడికి వెళ్ళడానికి ఎందుకని భయపడ్డాడు? బెత్లెహేమ్‌లో జన్మించిన యేసును అక్కడే పెంచాలేమో అనుకోని యేసేపు భయపడి ఉండొచ్చు. అక్కడికి వెళ్తే ఏమి జరుగుతుందో? ఎందుకంటే హేరోదు స్థానంలో అర్కెలాస్ పరిపాలిస్తున్నాడని విన్నాడు. ఆర్కెలాస్ తన తండ్రిలాగే క్రూరమైన నిరంకుశ స్వభావాన్ని కలిగిన వాడు. అతడు పట్టాభిషిక్తుడు కాకముందే, పస్కా పండుగకు ముందు ఆలయంలో, యెరూషలేము నగరంలో 3,000 మందిని చంపించిన వాడు. అతని స్వభావం తెలుసుకొని, తాము సురక్షితంగా ఉండలేమని భయపడి, యేసేపు అక్కడికి వెళ్లడానికి సంకోచించాడు, భయపడ్డాడు. స్వప్నమందు దేవుని చేత బోధింపబడిన వాడై తద్వారా సురక్షిత ప్రదేశమైన గలిలయకు వెళ్లమని దేవుని చేత ఆదేశింపబడ్డాడు. అతడు గలిలయ ప్రాంతములకు వెళ్లి, నజరేతను ఊరికి వచ్చి అక్కడ కాపురముండెను అని బైబులు చెప్తుంది. అప్పుడు గలిలయ ప్రాంతాలు నజరేతను ఊరు హేరోదు అంటిపాస్ పాలన క్రింద ఉన్నాయి. హేరోదు ఆర్కెలాస్‌తో పోల్చుకొంటే ఇతడు చాల నెమ్మదిపరుడు.

నజరేతు గలిలయ సముద్రానికి నైరుతి దిశలో కానాకు సమీపములో ఉండే ఒక చిన్న గ్రామము. దీనికి పశ్చిమాన సమీపాన తాబోర్ పర్వత శ్రేణిని కలిగి ఇది ఒక కొండ వాలుపై ఉండెడిది. దాని చుట్టూ అందమైన గొప్ప దృశ్యాలు ఉండెడివి. యేసు తన పరిచర్యలో ప్రవేశించే వరకు ఇక్కడే జీవించాడు, లూకా 2:51; 4:16; మత్తయి 3:13. నజరేతు యెరూషలేము నుండి ౩ రోజుల ప్రయాణమంతా దూరములో ఉండెడిది. యూదుల గ్రంధమైన తాల్ముద్ లోగాని, చరిత్రకారుడైన జొసీఫస్ చేత గాని ఈ గ్రామము పేర్కొనబడలేదు కాబట్టి ఈ గ్రామము చాల చాల చిన్నగ్రామము అని చరిత్రకారుల అభిప్రాయము. యేసేపు నజరేతులోనే ఎందుకు స్థిరపడ్డాడు అనే ప్రశ్నకు, మత్తయి ఎటువంటి జవాబును ఇవ్వలేదు. యేసు పుట్టుకకు ముందు మరియ (లూకా 1:26) మరియు యేసేపులు (లూకా 2: 4) అక్కడ నివసించినట్లుగా లూకా చెప్తున్నది ఒక  కారణం కావొచ్చు.

ప్రజలు చిన్నచూపుచూసే నజరేతును గలలీ ఊళ్ళు, నగరాల జాబితాలో చేర్చబడని చాల తక్కువస్థాయి ఉన్న ఈ గ్రామాన్నిదేవుడు ఎందుకని తన బిడ్డకు హోమ్ టౌన్ గా ఎన్నుకున్నాడు? యేసయ్య తాను పరిచర్య లోనికి వచ్చే ముందు వరకు ఇక్కడే ఉన్నాడు. ఎంతో ఔన్నత్యములో ఉండే దేవుడు ఎంతగా తనను తాను తగ్గించుకొన్నాడో ఇది తెలియజేస్తుంది. ఇది యేసుని దీనత్వాన్ని తగ్గింపును సూచిస్తుంది.

యోహాను 1:45,46_ ఫిలిప్పు నతనయేలును కనుగొని – ధర్మశాస్త్రములో మోషేయు ప్రవక్తలును ఎవరిని గూర్చి వ్రాసిరో ఆయనను కనుగొంటిమి; ఆయన యోసేపు కుమారుడైన నజరేయుడగు యేసు అని అతనితో చెప్పగా అందుకు నతనయేలు– నజరేతులో నుండి మంచిదేదైన రాగలదా అని నతనయేలు ఫిలిప్పును ప్రశ్నించలేదా? నజరేతులో నుండి మంచిదేదైన రాగలదా అనే మాటలలో ఈ గ్రామము యొక్క అప్రాముఖ్యమైన సాంఘిక సామాజిక స్థితిని నతనయేలు తెలియజేస్తూ ఉండటమే కాకుండా, మెస్సయ్యను నజరేత్‌తో అనుసంధానించే ప్రవచనాలేమి లేవు కదా, ఇదెలా సాధ్యం? అని అడుగుతున్నాడు.

మత్తయి ఏమో ఆయన నజరేయుడనబడునని ప్రవక్తలు చెప్పిన మాట నెరవేరునట్లు (ఈలాగు జరిగెను) అని చెప్తున్నాడు. ఆయన నజరేయుడనబడుననే నిర్దిష్టమైన ప్రవచనము బైబిలులో ఎక్కడా లేదు. కాని కొందరు పాత నిబంధన ప్రవక్తలు ఈ విషయాన్ని గురించి తెలియజేశారని మత్తయి చెప్తున్నాడు. చాలా సహజమైన వివరణ ఏమిటంటే, ఒకటి కంటే ఎక్కువ మంది ప్రవక్తలు అటువంటి ప్రకటన చేశారని మరియు ఇది పాత నిబంధన గ్రంథాలలో ఎక్కడా నేరుగా నమోదు చేయబడనప్పటికి, యూదులలో ఇది అందరికి తెలిసిన విషయం అని మత్తయి చెప్తున్నాడు. ఎక్కడ, ఎలా అనే ప్రశ్న మనకు రావొచ్చు.

నజరేతు అనే పేరు మనకొక చిన్న క్లూ ఇస్తూ ఉంది. నజరేతు అనే పదం హీబ్రూ పదమైన “నెట్‌జర్” అనే మాట నుండి వచ్చింది, “నెట్‌జర్” అనేమాటకు “అంకురం” అని అర్ధం. కొన్నిసార్లు చెట్టును నరికివేసినప్పుడు, దాని మొధ్ధు నుండి ఒక చిన్న “అంకురం” పుడుతుంది. రెమ్మ పెరుగుతుంది, పాత చెట్టు చనిపోయిన చోట ఒక కొత్త చెట్టు పుట్టుకొస్తుంది. ఆ షూట్‌ను హీబ్రూలో, “నెట్‌జర్” అంటారు. ఈ ప్రవచనము యెషయా 11:1లో ఉంది.

ఇశ్రాయేలీయులు చెట్టులా నరికివేయబడినప్పటికి, బాబిలోనియన్లు యూదాను నాశనం చేసినప్పటికి యూదా అంకురంలాగా పైకి లేస్తుందని యెషయా ప్రవచించాడు. యిర్మీయా జెకర్యాలు కూడా ఇశ్రాయేలీయుల యొక్క నాశనము మరియు తిరిగి ఆవిర్భవించడం గురించి ప్రవచిస్తూ, ఇశ్రాయేలీయులు నరికివేసిన చెట్టులాగా ఉన్నప్పటికిని, అది మరోసారి మొలకెత్తుతుందని ప్రవచించారు, అయితే వాళ్ళు “నెట్‌జర్” అనే మాటను కాకుండా “బ్రాంచ్” “చిగురు” అనే వేరే పదాన్ని ఉపయోగించారు, అందుకు యిర్మీయా 23:5; జెకర్యా 3:8, 6:12 చూడండి.

ఆయన దీనునిగా ఉండాలి, తృణీకరించబడాలి మరియు తిరస్కరించబడాలి. నజరేత్ నుండి రావడం, లేదా నజరేన్ అవ్వడం, అంటే తృణీకరించబడటం, తిరస్కరించబడటం. ఎండిన మొద్దునుండి అంకురం సురూపమైనను సొగసైనను లేకుండా, తృణీకరించబడిన తిరస్కరించబడిన దాని మొద్దునుండి ఎంత కామ్ గా బయటకు వస్తుందో యేసు కూడా అలానే ఉన్నాడని, బయటకు వచ్చాడని ప్రవక్తలు ప్రవచించినట్లుగానే ఆయన దీనునిగా తృకరింపబడిన స్థితిని తిరస్కరింపబడుటను నజరేయునిగా ఉండటంలో నెరవేర్చబడ్డాయని మత్తయి చెప్తున్నాడు. యేసు సిలువ వేయబడినప్పుడు, పిలాతు–యూదుల రాజైన నజరేయుడగు యేసు అను పైవిలాసము వ్రాయించి వ్యంగ్యముగా సిలువమీద పెట్టించుట అందుకు మంచి ఉదాహరణగా మనం చెప్పొచ్చు.

అయితే, లూకా 2: 39_అంతట వారు ప్రభువు ధర్మశాస్త్రము చొప్పున సమస్తము తీర్చిన పిమ్మట గలిలయలోని నజరేతను తమ ఊరికి తిరిగి వెళ్లిరి అని చెప్తుంది, ఇదేంటి అనే ప్రశ్న మనకు రావొచ్చు?

చాలా సింపుల్. లూకా జ్ఞానుల రాకను, యేసేపు మరియ యేసులు ఐగుప్తుకు వెళ్లడం అక్కడినుండి తిరిగి రావడం దాటవేస్తూ, ప్రభువు ధర్మశాస్త్రం ప్రకారం అవసరమైన ప్రతి దాన్ని చేసిన తర్వాత, మరియ యేసేపులు గలిలయకు, వారి స్వంత ఊరు అయిన నజరేతుకు తిరిగి వచ్చారని నివేదిస్తున్నాడు అంతే. ఇక్కడే యేసు పెరిగాడు, రోజు రోజుకు జ్ఞానముతో నిండుకొనుచు, ఎదిగి బలము పొందుకొన్నాడు, దేవుని దయ ఆయన మీద ఉండెను.

శిశువైన యేసు తన పరలోకపు తండ్రి సంరక్షణలో ఉన్నాడు. తండ్రి ఆయనను సురక్షితంగా నజరేత్‌కు తీసుకొచ్చాడు.

1 కొరింథీయులకు 1:27_ జ్ఞానులను సిగ్గుపరచుటకు లోకములో నుండు వెఱ్ఱివారిని దేవుడు ఏర్పరచుకొని యున్నాడు. బలవంతులైన వారిని సిగ్గుపరచుటకు లోకములో బలహీనులైన వారిని దేవుడు ఏర్పరచుకొని యున్నాడు. ఎన్నికైన వారిని వ్యర్థము చేయుటకు లోకములో నీచులైన వారిని, తృణీకరింపబడిన వారిని, ఎన్నికలేని వారిని దేవుడు ఏర్పరచుకొనియున్నాడు. యాకోబు 4:6 దేవుడు అహంకారులను ఎదిరించి దీనులకు కృప అనుగ్రహించును అను మాటలు ఎంతటి నిజమో కదా.

దేవుని వాక్యాన్ని దాని స్వచ్చతలో భవిషత్ తరాలకు అందించాలనే ఉద్దేశ్యంలో దానిని భద్రపర్చాలనే ఈ చిన్న ప్రయత్నాన్ని ప్రోత్సహించండి. ఇది శ్రమతో ఖర్చుతో కూడుకొన్నది కాబట్టి ఈ ప్రయత్నంలో భాగస్వాములు కండి, చేయూతనివ్వండి, దేవుడు మిమ్మును దీవించును గాక. – రెవ. కూరపాటి విజయ్ కుమార్. ఫోన్ పే యూపీఐ ఐడి – 9848365150-2@ybl

KURAPATI VIJAY KUMAR,
HDFC BANK, Account no 50200096563465,
IFSC code. HDFC0005872,
Swift code HDFCINBB,
JKC College Road Branch, GUNTUR 522006,
ANDHRA PRADESH, INDIA.
The phone pay UPI Id : 9848365150-2@ybl