దెయ్యాలు అంటే ఎవరు? బైబిల్ ఏం చెప్తుంది?

చాలామంది దెయ్యాలు అంటే చనిపోయిన మనుష్యుల ఆత్మలు తిరిగి ఈ లోకానికి వచ్చి తిరుగుతుంటాయని నమ్ముతారు. అయితే బైబిల్ బోధన ప్రకారం ఈ అభిప్రాయం సరైనది కాదు.

ఒక వ్యక్తి మరణించినప్పుడు ఏమి జరుగుతుందో బైబిల్ స్పష్టంగా చెప్తుంది. ప్రసంగి 12:7 ప్రకారం, “మన్నయినది వెనుకటి వలెనే మరల భూమికి చేరును, ఆత్మ దాని దయ చేసిన దేవుని యొద్దకు మరల పోవును” అంటే మరణ సమయంలో శరీరం మరియు ఆత్మ వేరవుతాయి. శరీరం భూమిలో కలిసిపోతుంది, ఆత్మ దేవుని సమక్షానికి వెళ్తుంది. అలాగే హెబ్రీయులు 9:27 ఇలా చెప్తుంది: “మనుష్యులకు ఒక్కసారే మృతి పొందవలెనని నియమింపబడెను; ఆ తరువాత తీర్పు జరుగును” అంటే మరణం తర్వాత మనిషి ఈ భూమిపై తిరుగుతూ ఉండడు. దేవుని తీర్పు ఎదుర్కొంటాడు.

యేసు చెప్పిన ధనవంతుడు మరియు లాజరు ఉపమానం (లూకా 16:19–31) కూడా ఇదే విషయాన్ని సూచిస్తుంది. మరణించిన తరువాత వారి స్థితి నిర్ణయించబడుతుంది. ఆ స్థితి నుండి తిరిగి వచ్చి భూమిపై సంచరించడం లేదా మనుష్యులతో సంబంధం పెట్టుకోవడం సాధ్యం కాదని ఆ ఉపమానం తెలియజేస్తుంది.

కాబట్టి బైబిల్ ప్రకారం, చనిపోయిన మనుష్యుల ఆత్మలు దెయ్యాలుగా తిరిగి రావు. మరణించిన వారు తమ కుటుంబ సభ్యుల దగ్గరకు లేదా ఇళ్లకు తిరిగి రారు. వారు ఈ ప్రపంచంలో తిరుగుతూ మనుష్యులను భయపెట్టరు.

అయితే బైబిల్ “దెయ్యాలు” లేదా “దుష్టాత్మలు” ఉన్నాయని బోధిస్తుంది. కానీ అవి చనిపోయిన మనుష్యుల ఆత్మలు కావు. బైబిల్ ప్రకారం దెయ్యాలు అంటే దేవునికి వ్యతిరేకంగా తిరుగుబాటు చేసిన పడిపోయిన దేవదూతలు (fallen angels). సాతాను నాయకత్వంలో దేవునికి విరోధంగా తిరిగిన ఆత్మిక జీవులు.

యేసు తన భూలోక పరిచర్యలో అనేక సందర్భాల్లో దుష్టాత్మలను వెళ్లగొట్టాడు (మార్కు 1:34; లూకా 8:26–39). వీటిని బట్టి దుష్టాత్మలు నిజంగా ఉన్నాయని తెలుస్తుంది. కానీ అవి మరణించిన మనుష్యుల ఆత్మలు కావు.

అందువల్ల బైబిల్ బోధన ప్రకారం, మనిషి మరణించినప్పుడు శరీరం మరియు ఆత్మ వేరవుతాయి. ఆత్మ దేవుని తీర్పు ఎదుటకు వెళ్తుంది. మరణించినవారు తిరిగి భూమికి దెయ్యాలుగా రారు. దుష్టాత్మలు ఉంటాయి, కానీ అవి చనిపోయిన మనుష్యుల ఆత్మలు కావు. దెయ్యాల గురించి ఉన్న అనేక ప్రజా కథలు, మూఢనమ్మకాలు, మరియు భయాలు బైబిల్ బోధనతో సరిపోవు.

క్రైస్తవునికి ఓదార్పు ఏమిటంటే, జీవించినా మరణించినా మనం ప్రభువుకే చెందినవారము (రోమా 14:8). దేవుని చేతిలో ఉన్న వ్యక్తిని ఏ దుష్టశక్తి కూడా ఆయన ప్రేమ నుండి వేరు చేయలదు. (రోమా 8:38–39).

చనిపోయినవారు తిరిగి దెయ్యాలుగా వస్తారని బైబిల్ బోధించదు. ఒక వ్యక్తి మరణించిన తరువాత అతని ఆత్మ దేవుని తీర్పు క్రిందికి వెళ్తుంది (హెబ్రీయులు 9:27; లూకా 16:19–31). కాబట్టి చనిపోయిన మనుష్యులు ఈ లోకంలో తిరుగుతూ మనలను భయపెడతారని బైబిల్ చెప్పటం లేదు.

అయితే, కొంతమందికి విచిత్రమైన అనుభవాలు కలుగుతాయి: ఎవరో తమను చూస్తున్నట్లు అనిపించడం. అకస్మాత్తుగా భయం వేయడం. మరణించిన బంధువులు కనిపించినట్లు అనిపించడం. నిద్రలో ఎవరో నొక్కిపెట్టినట్లు అనిపించడం. కేకలు వేయాలనుకున్నా లేదా కదలాలనుకున్నా కదలలేకపోవడం. ఈ అనుభవాలకు ఎప్పుడూ ఒకే కారణం ఉండదు.

1. శారీరక లేదా మానసిక కారణాలు
   చాలా సందర్భాలలో వీటికి సహజమైన వివరణలు ఉంటాయి: Sleep Paralysis (నిద్ర స్థంభన) – మనిషి మేల్కొన్నట్లు అనిపించినా శరీరం ఇంకా నిద్ర స్థితిలో ఉండటం వల్ల కదలలేక పోవడం, గదిలో ఎవరో ఉన్నట్లు అనిపించడం. తీవ్రమైన ఒత్తిడి, భయం, ఆందోళన. నిద్రలేమి. మానసిక ఆరోగ్య సమస్యలు. దుఃఖం వల్ల మరణించిన బంధువులు కనిపించినట్లు అనిపించడం.

ఇలాంటి అనుభవాలు నిజమైనవే అయినప్పటికీ, వాటి కారణం తప్పనిసరిగా ఆత్మలు లేదా దెయ్యాలే కావాల్సిన అవసరం లేదు.

2. ఆధ్యాత్మిక కారణాలు
   బైబిల్ ప్రకారం సాతాను మరియు దుష్టదూతలు (దెయ్యాలు) ఉన్నారు. యేసు తన పరిచర్యలో దుష్టాత్మల ప్రభావంలో ఉన్న వ్యక్తులను కలుసుకున్నాడు (మార్కు 5:1–20). 2 కొరింథీయులు 11:14 ప్రకారం సాతాను తాను వెలుగు దూతవలె కూడా కనిపించగలడు. అందువల్ల, కొన్ని సందర్భాలలో మనుష్యులను మోసగించడానికి లేదా భయపెట్టడానికి దుష్టాత్మల ప్రభావం ఉండవచ్చని బైబిల్ అంగీకరిస్తుంది.

ముఖ్యమైన విషయం, ఒక వ్యక్తికి ఏదైనా విచిత్రమైన అనుభవం ఎదురైతే, వెంటనే, “ఇది నా చనిపోయిన బంధువు ఆత్మ” అని నిర్ణయించకూడదు.
“ఇది ఖచ్చితంగా దెయ్యమే” అని కూడా వెంటనే నిర్ణయించకూడదు.

ముందుగా సహజమైన కారణాలను పరిశీలించాలి. అదే సమయంలో ఆధ్యాత్మిక విషయాలను కూడా బైబిల్ వెలుగులో పరీక్షించాలి.

క్రైస్తవునికి ఓదార్పు
బైబిల్ ప్రకారం విశ్వాసి భయంతో జీవించాల్సిన అవసరం లేదు. “నీవు భయపడకుము, నేను నీకు తోడైయున్నాను” (యెషయా 41:10). “మీ లోనున్నవాడు లోకములోనున్నవానికంటె గొప్పవాడు” (1 యోహాను 4:4).

కాబట్టి క్రైస్తవుని ఆశ దెయ్యాల భయం మీద కాదు, క్రీస్తు యొక్క విజయంపై నిలిచి ఉంటుంది. సాతాను మరియు దుష్టశక్తులు నిజమే అయినప్పటికీ, అవి దేవుని అధికారానికి లోబడినవే. చనిపోయినవారు దెయ్యాలుగా తిరిగి వస్తారని కాదు, కానీ ఈ లోకంలో మనకు ఎదురయ్యే కొన్ని ఆధ్యాత్మిక మోసాలు లేదా భయపెట్టే అనుభవాల వెనుక దుష్టశక్తుల ప్రభావం ఉండవచ్చని బైబిల్ బోధిస్తుంది.

దయ్యాల గురించి బైబిలు ఏమి చెబుతుంది? ముందుగా సాతాను (Devil) మరియు దయ్యాలు (Demons) ఒకటే కావని అర్థం చేసుకోవాలి. సాతాను (Devil) అనేది ఒక వ్యక్తి. గ్రీకు భాషలో డయాబోలోస్ (διάβολος) అనే పదం నుండి వచ్చింది. దీని అర్థం “అపవాది,” “నిందించేవాడు,” “తప్పుడు ఆరోపణలు చేసేవాడు”. దయ్యాలు (Demons) అనేవి సాతానుతో కలిసి దేవునికి వ్యతిరేకంగా తిరుగుబాటు చేసిన పడిపోయిన దేవదూతలు. అంటే, సాతాను వారి నాయకుడు, దయ్యాలు అతని అనుచరులు.

సాతాను మరియు అతని దూతలు
బైబిల్ ప్రకారం, సాతాను మొదట దేవునిచే సృష్టించబడిన ఒక దేవదూత. కానీ అతడు గర్వంతో దేవునికి వ్యతిరేకంగా తిరుగుబాటు చేశాడు. అతనితో పాటు అనేక మంది దేవదూతలు కూడా తిరుగుబాటులో చేరారు. వీరినే మనం దయ్యాలు లేదా దుష్టాత్మలు అంటాము. యేసు మత్తయి 25:41లో నరకాన్ని గురించి మాట్లాడుతూ, “అపవాదికిని వాని దూతలకును సిద్ధపరచబడిన నిత్యాగ్నిలోనికి వెళ్లుడి” అని చెప్పాడు. దీనివల్ల నరకం మొదట మనుష్యుల కోసం కాకుండా సాతాను మరియు అతని దూతల శిక్ష కోసం సిద్ధపరచబడిందని తెలుస్తుంది.

దయ్యాల శక్తి
దయ్యాలు సాధారణ మనుష్యుల కంటే ఎక్కువ శక్తి కలిగిన ఆధ్యాత్మిక జీవులు. అవి: మోసగించగలవు, భయపెట్టగలవు, అబద్ధాలను వ్యాప్తి చేయగలవు,
కొన్నిసార్లు అద్భుతాల్లా కనిపించే కార్యాలను కూడా చేయగలవు.

2 థెస్సలొనీకయులు 2:9–10 ప్రకారం, సాతాను “సమస్త శక్తితోను, కపట సూచకక్రియలతోను, అబద్ధపు అద్భుతాలతోను” ప్రజలను మోసగించడానికి ప్రయత్నిస్తాడు.

అబద్ధపు అద్భుతాలు
ప్రతి అద్భుతం దేవుని నుండి వచ్చినదే అని అనుకోవడం తప్పు. యేసు మత్తయి 24:24లో హెచ్చరిస్తూ, “అబద్ధపు క్రీస్తులు, అబద్ధపు ప్రవక్తలు గొప్ప సూచకక్రియలను, మహత్కార్యములను కనబరచెదరు” అని చెప్పాడు. అంటే, కొన్ని అద్భుతాలు నిజంగా జరిగేవిగా కనిపించినప్పటికీ, వాటి ఉద్దేశ్యం ప్రజలను సత్యం నుండి దూరం చేయడం కావచ్చు.

దయ్యాల ప్రధాన లక్ష్యం
దయ్యాల లక్ష్యం కేవలం భయపెట్టడం మాత్రమే కాదు. వారి ప్రధాన పని: దేవుని నుండి మనుష్యులను దూరం చేయడం, అబద్ధాలను నమ్మించడం, పాపంలో ఉంచడం, సువార్తను తిరస్కరించేలా చేయడం, క్రీస్తుపై విశ్వాసాన్ని బలహీనపరచడం.

యోహాను 8:44లో యేసు సాతానును “వాడు అబద్ధికుడును అబద్ధమునకు జనకుడునై యున్నాడు” అని పిలిచాడు.

క్రైస్తవునికి ఓదార్పు
బైబిల్ దయ్యాల ఉనికిని నిజమని బోధించినప్పటికీ, విశ్వాసులు భయంతో జీవించాల్సిన అవసరం లేదని కూడా చెబుతుంది. 1 యోహాను 4:4:”మీ లోనున్నవాడు లోకములోనున్నవానికంటె గొప్పవాడు.” అంటే, క్రీస్తు శక్తి సాతాను మరియు దయ్యాల శక్తికంటే గొప్పది.

కాబట్టి క్రైస్తవుని దృష్టి దయ్యాలపై కాకుండా, వాటిని జయించిన ప్రభువైన యేసుక్రీస్తుపై ఉండాలి. బైబిల్ దయ్యాల గురించి తెలుసుకోవాలని బోధిస్తుంది, కానీ వాటిని భయపడాలని కాదు. దేవుని వాక్యంలో నిలిచిన విశ్వాసికి క్రీస్తులో భద్రత మరియు విజయం ఉన్నాయి.

దేవుని అద్భుతాలను చూసినప్పుడు ఒక ముఖ్యమైన ప్రశ్న వస్తుంది: సాతాను లేదా దయ్యాలు కూడా అద్భుతాలు చేయగలవా? బైబిల్ ప్రకారం, కొన్ని సందర్భాలలో సాతాను మరియు అతని దూతలు ప్రజలను మోసగించడానికి నకిలీ సూచక క్రియలు, అద్భుతాలు చేయగలరు. అయితే అవి దేవుని శక్తితో చేసే నిజమైన అద్భుతాలకు సమానమైనవి కావు.

దీనికి ఉత్తమ ఉదాహరణ నిర్గమకాండము 7లో కనిపిస్తుంది. యెహోవా తన ప్రజలను ఐగుప్తు బానిసత్వం నుండి విడిపించడానికి మోషే మరియు అహరోనులను ఫరో దగ్గరకు పంపాడు. దేవుడు తన అధికారానికి గుర్తుగా అహరోనుకు అద్భుతం చేయమని ఆజ్ఞాపించాడు. అహరోను తన కఱ్ఱను నేలపై వేయగానే అది సర్పమైంది. అప్పుడు ఫరో తన జ్ఞానులను, మంత్రగాళ్లను, ఇంద్రజాలికులను పిలిపించాడు. ఆశ్చర్యకరంగా వారు కూడా తమ రహస్య కళల ద్వారా తమ కఱ్ఱలను సర్పాలుగా మార్చారు. కానీ అక్కడ ఒక ముఖ్యమైన విషయం జరిగింది: “అహరోను కఱ్ఱ వారి కఱ్ఱలను మ్రింగివేసెను” (నిర్గమకాండము 7:12) అంటే, ఫరో ఇంద్రజాలికులు ఏదో ఒక రకంగా ఆ అద్భుతాన్ని అనుకరించగలిగినప్పటికీ, దేవుని శక్తి వారికంటే ఎంతో గొప్పదని దేవుడు వెంటనే చూపించాడు.

దీని నుండి మనం నేర్చుకోవలసినది: సాతాను పూర్తిగా కొత్తదాన్ని సృష్టించలేడు. అతను సృష్టికర్త కాదు. అతను చేయగలిగింది: దేవుని పనులను అనుకరించడం, ప్రజలను మోసగించడం, అబద్ధాన్ని సత్యంలా చూపించడం, నకిలీ అద్భుతాల ద్వారా విశ్వాసాన్ని తప్పుదారి పట్టించడం. అందుకే కొందరు సాతానును “అనుకరణకారుడు” లేదా “నకిలీదారు” అని పిలుస్తారు.

అతను అసలైనదాన్ని సృష్టించలేడు; ఉన్నదాన్ని మాత్రమే వక్రీకరించగలడు. ఒక వ్యక్తి అద్భుతాలు చేస్తున్నాడని, సూచక క్రియలు చూపిస్తున్నాడని మాత్రమే అతడు దేవుని నుండి వచ్చాడని నిర్ణయించకూడదు. కాబట్టే “అబద్ధపు క్రీస్తులును అబద్ధపు ప్రవక్తలును వచ్చి గొప్ప సూచక క్రియలను మహత్కార్యములను కనబరచెదరని” యేసు హెచ్చరించాడు (మత్తయి 24:24)

అందువల్ల క్రైస్తవుడు ప్రతి బోధనను, ప్రతి అద్భుతాన్ని, ప్రతి ఆధ్యాత్మిక అనుభవాన్ని దేవుని వాక్యమైన బైబిల్ ద్వారా పరీక్షించాలి. విశ్వాసం కేవలం అద్భుతాల మీద ఆధారపడకూడదు కాబట్టే మత్తయి 16:4లో యేసు “వ్యభిచారులైన చెడ్డతరము వారు సూచక క్రియ నడుగుచున్నారు” అని చెప్పాడు.

నిజమైన విశ్వాసం: దేవుని వాక్యంపై, క్రీస్తు సిలువపై, ఆయన మరణం మరియు పునరుత్థానంపై, ఆధారపడి ఉండాలి.

ఫరో ఇంద్రజాలికుల సంఘటన సాతాను కొంతవరకు దేవుని కార్యాలను అనుకరించగలడని చూపిస్తుంది. అయితే అతని శక్తి పరిమితమైనది. అతను దేవునికి సమానుడు కాదు. దేవుడు చేసే అద్భుతాలు నిజమైనవి, రక్షణకరమైనవి; సాతాను చేసే నకిలీ అద్భుతాలు మోసపూరితమైనవి.

కాబట్టి క్రైస్తవులు అద్భుతాల వల్ల కాకుండా, దేవుని వాక్య సత్యం వల్ల నడిపించబడాలి. ఎందుకంటే ప్రతి అద్భుతం దేవుని నుండి రాదు, కానీ దేవుని వాక్యం మాత్రం ఎప్పుడూ సత్యమే.

దయ్యాలు మన ఆలోచనలను ప్రభావితం చేయగలవా?
బైబిల్ ప్రకారం, దయ్యాలు మరియు సాతాను మనుష్యుల మనస్సులపై ప్రభావం చూపడానికి ప్రయత్నిస్తాయి. అవి మన హృదయాలలో చెడు ఆలోచనలు, అబద్ధాలు, సందేహాలు లేదా దేవునికి వ్యతిరేకమైన భావాలను కలిగించేందుకు ప్రయత్నిస్తాయి.

ఉదాహరణకు, అననీయుడు దేవునికి అబద్ధం చెప్పినప్పుడు, పేతురు అతనిని ఇలా ప్రశ్నించాడు: “పరిశుద్ధాత్మను మోసపుచ్చుటకు సాతాను ఎందుకు నీ హృదయమును ప్రేరేపించెను?” (అపొస్తలుల కార్యములు 5:3) ఇది సాతాను మనుష్యులను చెడు పనుల వైపు ప్రేరేపించడానికి ప్రయత్నిస్తాడని చూపిస్తుంది.

అలాగే, 2 కొరింథీయులు 4:4లో పౌలు ఇలా చెప్తాడు: “ఈ యుగ సంబంధమైన దేవత (అపవాది) అవిశ్వాసుల మనోనేత్రములకు గ్రుడ్డితనము కలుగజేశాడు.”
అంటే, సాతాను ప్రజలు సువార్త సత్యాన్ని గ్రహించకుండా అడ్డుకోవడానికి ప్రయత్నిస్తాడు.

ఎఫెసీయులు 2:2లో పౌలు సాతానును: “వాయుమండల సంబంధమైన అధిపతి, అవిధేయులైన వారిని ఇప్పుడు ప్రేరేపించు శక్తికి అధిపతి” అని పిలుస్తాడు.

దయ్యాలు మనస్సులను చదవగలవా?
బైబిల్ స్పష్టంగా దయ్యాలు మనుష్యుల ఆలోచనలను పూర్తిగా చదవగలవని చెప్పదు. సర్వజ్ఞుడు దేవుడు మాత్రమే. మన హృదయాల లోతులను పూర్తిగా తెలిసినవాడు దేవుడు మాత్రమే.

అయితే దయ్యాలు చాలా కాలంగా మానవులను గమనిస్తూ ఉండటం వల్ల: మన ప్రవర్తనను, మాటలను, భయాలను, బలహీనతలను గుర్తించి వాటిని ఉపయోగించగలవు.

అందువల్ల కొన్నిసార్లు అవి మన ఆలోచనలను తెలిసినట్లుగా అనిపించవచ్చు. కానీ అది దేవునిలా సర్వజ్ఞానంతో మనస్సు చదవడం కాదు.

దయ్యాల ప్రభావం మరియు మానసిక వ్యాధి ఒకటే కావు
ఇక్కడ జాగ్రత్త అవసరం. ప్రతి మానసిక సమస్యను దయ్యాల ప్రభావంగా చూడకూడదు. ఉదాహరణకు: స్కిజోఫ్రెనియా, బైపోలార్ డిజార్డర్, తీవ్ర డిప్రెషన్, ఇతర మానసిక ఆరోగ్య సమస్యలు.

స్కిజోఫ్రెనియాతో బాధపడే కొందరికి: ఎవరో తమతో మాట్లాడుతున్నట్లు, లేని వ్యక్తులు కనిపిస్తున్నట్లు, శబ్దాలు వినిపిస్తున్నట్లు అనిపించవచ్చు. ఇది తప్పనిసరిగా దయ్యాల ప్రభావమని అర్థం కాదు. ఇది వైద్యపరంగా గుర్తించబడిన మానసిక రుగ్మత కావచ్చు.

క్రైస్తవుని దృక్పథం
బైబిల్ ప్రకారం సాతాను మరియు దయ్యాలు నిజంగా ఉన్నప్పటికీ, ప్రతి అసాధారణ అనుభవాన్ని దయ్యాలకు ఆపాదించడం సరైనది కాదు.

క్రైస్తవుడు: బైబిల్ బోధనను అనుసరించాలి, విషయాలను వివేకంతో పరిశీలించాలి, అవసరమైతే వైద్య సహాయం కూడా పొందాలి, దేవుని వాక్యంలో నిలిచి ప్రార్థించాలి.

ముఖ్యమైన విషయం
దయ్యాలు మనుష్యులను మోసగించడానికి, తప్పుదారి పట్టించడానికి, దేవుని నుండి దూరం చేయడానికి ప్రయత్నిస్తాయి. కానీ అవి సర్వశక్తిమంతులు కావు, సర్వజ్ఞులు కూడా కావు. దేవుడు మాత్రమే మన హృదయాలను పూర్తిగా ఎరుగుతాడు. “మీ లోనున్నవాడు లోకములోనున్నవానికంటె గొప్పవాడు” (1 యోహాను 4:4) అందువల్ల విశ్వాసి భయపడకుండా, క్రీస్తు మీద విశ్వాసంతో నిలబడవచ్చు.

బైబిల్ ప్రకారం, సాతాను మరియు అతనితో కలిసి తిరుగుబాటు చేసిన దూతలు (దయ్యాలు) దేవునికి మరియు మనుష్యులకు శత్రువులు.

1 పేతురు 5:8లో: “మీ విరోధియగు అపవాది గర్జించు సింహమువలె ఎవరిని మ్రింగుదునా అని వెదకుచు తిరుగుచున్నాడు” అని చెప్పబడింది. అంటే, సాతాను ఎవరిని దేవుని నుండి దూరం చేయగలడో, ఎవరిని మోసగించగలడో అని నిరంతరం ప్రయత్నిస్తూ ఉంటాడు.

యోహాను 8:44లో యేసు సాతానును గురించి: “వాడు అబద్ధికుడును అబద్ధమునకు జనకుడునై యున్నాడు” అని చెప్పాడు. అంటే, సాతాను ప్రధాన ఆయుధం అబద్ధం మరియు మోసం. అతడు ప్రజలను సత్యం నుండి దూరం చేసి, నిజమైన దేవునిని తెలుసుకోకుండా చేయాలని ప్రయత్నిస్తాడు.

అతని లక్ష్యం: దేవుని నుండి మనుష్యులను దూరం చేయడం, అబద్ధాలను నమ్మించడం, పాపంలో ఉంచడం, వారి ఆత్మీయ జీవితాన్ని నాశనం చేయడం.

అందుకే పౌలు ఎఫెసీయులు 6:12లో ఇలా చెప్పాడు: “మనము పోరాడునది శరీరులతో కాదుగాని… ఆకాశమండలమందున్న దురాత్మల సమూహములతోను పోరాడుచున్నాము.” అంటే, క్రైస్తవుని పోరాటం కేవలం మనుష్యులతో కాదు; దాని వెనుక ఉన్న ఆత్మీయ శక్తులతో కూడా ఉంటుంది.

పారానార్మల్ అనుభవాల గురించి
కొన్నిసార్లు ప్రజలు: ఎవరో ఉన్నట్లు అనిపించడం, భయంకరమైన దర్శనాలు చూడడం, విచిత్రమైన ఆధ్యాత్మిక అనుభవాలు పొందడం, వంటి సంఘటనలను చెబుతారు.

బైబిల్ ప్రకారం, ఇలాంటి కొన్ని అనుభవాలకు సాతాను మరియు దుష్టాత్మల ప్రభావం కారణం కావచ్చు. అయితే ప్రతి అసాధారణ సంఘటనను దయ్యాలకే ఆపాదించకూడదు; కొన్ని సందర్భాలలో సహజమైన లేదా వైద్యపరమైన కారణాలు కూడా ఉండవచ్చు.

క్రైస్తవునికి ఓదార్పు
సాతాను మరియు దయ్యాలు నిజమైనవే అయినప్పటికీ, అవి దేవునికంటే శక్తివంతమైనవి కావు. కాబట్టి విశ్వాసి భయంతో కాకుండా, దేవుని వాక్యంపై మరియు క్రీస్తు విజయంపై నమ్మకంతో జీవించాలి. సాతాను యొక్క శక్తి పరిమితమైనది, కానీ దేవుని శక్తి అనంతమైనది.

బైబిల్ ప్రకారం, దయ్యాలు ప్రజలను మోసగిస్తూ శోధిస్తూ హాని చేస్తూ వారిని ఆధ్యాత్మికంగా శారీరకంగా నాశనం చేయడానికి ప్రయత్నిస్తాయి. దేవుని సత్యం నుండి, యేసుక్రీస్తు సువార్త నుండి, ఆధ్యాత్మికమైన జీవితం నుండి ప్రజలను దూరం చేయడమే వాటి లక్ష్యం.

దయ్యాల కార్యకలాపాలు :
1. ప్రజలను మోసగించడం మరియు తప్పుడు బోధన (“దయ్యముల బోధ“) : దయ్యాలు అబద్ధాలు మరియు మోసాల ద్వారా ప్రజలను సత్యం నుండి దూరం చేస్తాయి. 1 తిమోతి 4:1 – అయితే కడవరి దినములలో కొందరు అబద్ధికుల వేషధారణ వలన మోసపరచు ఆత్మలయందును దయ్యముల బోధయందును లక్ష్యముంచి, విశ్వాస భ్రష్టులగుదురని ఆత్మ తేటగా చెప్పుచున్నాడు. వారు దేవుని వాక్యాన్ని వక్రీకరిస్తారు (ఆదికాండము 3:1–5) మరియు తప్పుడు సిద్ధాంతాలను, ఆరాధనలను లేదా వక్రీకరించబడిన వేదాంతశాస్త్రాన్ని ప్రోత్సహిస్తారు.

ఉదాహరణలు:
తప్పుడు మతాలను ప్రోత్సహించడం, విగ్రహారాధనను ప్రోత్సహించడం (1 కొరింథీయులు 10:20).
దేవుడు మీకు ఐశ్వర్యాన్ని ఇస్తాడు అనే బోధ లేదా బైబులు చెప్పని వాటిని ప్రోత్సహించడం. Prosperity theology and Legalism.
క్రీస్తు యొక్క సంపూర్ణతను తక్కువ చేసి చెప్పడం (Undermining the sufficiency of Christ).

2. పాపం చేయాలనే శోధన/ మనుష్యులను పాపం చేయమని ప్రలోభపెట్టటం : దయ్యాలు తరచుగా వ్యక్తులను దేవునికి అవిధేయత చూపేలా శోధిస్తాయి. (లూకా 22:3 – సాతాను యూదాలోకి ప్రవేశించాడు).

ఎఫెసీయులు 6:11–12 – మీరు అపవాది తంత్రములను ఎదిరించుటకు శక్తిమంతులగునట్లు దేవుడిచ్చు సర్వాంగ కవచమును ధరించుకొనుడి. ఏలయనగా మనము పోరాడునది శరీరులతో కాదు, గాని ప్రధానులతోను, అధికారులతోను, ప్రస్తుత అంధకారసంబంధులగు లోక నాథులతోను, ఆకాశమండల మందున్న దురాత్మల సమూహములతోను పోరాడుచున్నామని పౌలు చెప్పాడు. యాకోబు 3:15 – ఈ జ్ఞానము పైనుండి దిగివచ్చునదికాక భూసంబంధమైనదియు ప్రకృతి సంబంధమైనదియు దయ్యముల జ్ఞానము వంటిదియునై యున్నది.

సాధారణ లక్ష్యాలు:
గర్వం
లైంగిక అనైతికత
కోపం, భయం, అసూయ
వ్యసనాలు

3. అణచివేత మరియు బాధ : దయ్యాలు వ్యక్తులను, ముఖ్యంగా విశ్వాసులను, భయం, అపరాధం, గందరగోళం లేదా భావోద్వేగ హింస ద్వారా అణచివేయడానికి ప్రయత్నిస్తాయి. 2 కొరింథీయులు 12:7 – పౌలు “శరీరంలో ముల్లు, సాతాను దూత” అని సూచించాడు.

విశ్వాసులను స్వాధీనంలో ఉంచుకోడు కానీ వారిని నిరుత్సాహపరచడానికి బయటి నుండి ఒత్తిడి పెడతాడు, నిందలు మరియు భారం వేయడం ద్వారా కృంగిపోయేటట్లు చేస్తాడు.

4. అవిశ్వాసులను స్వాధీనం లేదా నియంత్రణలో ఉంచుకొంటాయి : (మార్కు 5:1–20 – లిజియన్). కొన్ని బైబిల్ వృత్తాంతాలలో, దయ్యాలు వ్యక్తులను స్వాధీనములో ఉంచుకొన్నాయి/ వారిని ఆవహించాయి – వారి ప్రవర్తన, మనస్సు లేదా శరీరాన్ని నియంత్రించాయి.

మార్కు 5:1–20, గెరాసేన్ దయ్యాలు పట్టిన వ్యక్తిలో దయ్యాల “సేన” ఉంది. లూకా 9:42 – ఆ దయ్యము వానిని పడద్రోసి, విలవిలలాడించెను.

విశ్వాసులు దయ్యాల బారిన పడలేరు, ఎందుకంటే పరిశుద్ధాత్మ వారిలో నివసిస్తుంది (1 కొరింథీయులు 6:19). కానీ అవిశ్వాసులు దయ్యాల బారిన పడతారు వాటి లోతైన ప్రభావానికి గురవుతారు.

5. వెలుగుగా వేషం వేయడం : దయ్యాలు మోసగించడానికి మంచిగా అనిపించే విధంగా కనిపించొచ్చు లేదా ప్రవర్తించొచ్చు. 2 కొరింథీయులు 11:14 – “సాతాను స్వయంగా వెలుగు దూతగా వేషం వేస్తాడు.”

వారు ఆధ్యాత్మికంగా ధ్వనించే భాషను ఉపయోగించొచ్చు లేదా తప్పుదారి పట్టించడానికి ఆధ్యాత్మిక అనుభవాలను ప్రచారం చెయ్యొచ్చు.

6. ప్రభుత్వాలు మరియు దేశాలను ప్రభావితం చేయడం
బైబిల్ వృత్తాంతాలు దయ్యాల శక్తులు పాలకులను లేదా ప్రాంతాలను ప్రభావితం చేస్తాయని సూచిస్తున్నాయి.

దానియేలు 10:13 – దేవుని దూతను వ్యతిరేకించే ఆధ్యాత్మిక జీవి అయిన “పారసీకుల రాజ్యాధిపతిని” సూచిస్తుంది. ప్రకటన 16:14 – అవి సూచనలు చేయునట్టి దయ్యముల ఆత్మలే; అవి సర్వాధికారియైన దేవుని మహాదినమున జరుగు యుద్ధమునకు లోకమంతట ఉన్న రాజులను పోగుచేయవలెనని వారియొద్దకు బయలు వెళ్తాయి.

7. క్షుద్ర విద్య మరియు మంత్రవిద్యల ప్రచారం
దేవుని వెలుపల శక్తి, జ్ఞానం లేదా నియంత్రణను కోరుకునే క్షుద్ర అభ్యాసాల వెనుక దయ్యాలు ఉన్నాయి.

లేఖనంలో నిషేధించబడింది:
మంత్రవిద్య (గలతీయులు 5:20)
సోదే చెప్పడం (అపొస్తలుల కార్యములు 16:16–18)
మంత్రవిద్య, మంత్రాలు, శకునాలు (ద్వితీయోపదేశకాండము 18:10–12)

8. అనారోగ్యం లేదా గాయాలు కలిగిస్తాయి (లూకా 13:11 – బలహీనపరచు దయ్యము చేత నడుము వంగిపోయిన స్త్రీ)

అపవాదికి మన గురించి, మన ఆలోచనల గురించి చాలా తెలిసి ఉండొచ్చు. కాని వాడికి అన్నీ తెలియవు. దేవునిలా వాడు సర్వాంతర్యామి కాదు. ఆధ్యాత్మిక జీవిగా, సాతాను ఒక నిర్దిష్ట సమయంలో ఒక నిర్దిష్ట ప్రదేశానికి పరిమితం అవుతాడు. కాని వాడి అనేక దయ్యాల ద్వారా వాడు ఒకే సమయంలో అనేక ప్రదేశాలలో ఉండి, మన జీవితాలపై బలమైన ప్రభావాన్ని చూపుతూ, పాపం చేయడానికి మనల్ని ప్రలోభపెట్టగలడు.

సాతాను శక్తి దేవుని శక్తి కంటే తక్కువ, అయినప్పటికీ అది మన మానవ సామర్థ్యాల కంటే గొప్పది. ఆదాము హవ్వలను మోసగించడంలో సాతాను యొక్క ఉన్నతమైన నైపుణ్యాలను చూడొచ్చు. దేవుని మంచితనాన్ని అనుమానించడానికి హవ్వను నడిపించడంలో ఆమెకు ఏమి చెప్పాలో వాడికి ఖచ్చితంగా తెలుసు (ఆదికాండము 3:1-7). సాతాను మనలను మోసగించగల సామర్ధ్యాన్ని కలిగి ఉన్నాడని పౌలు హెచ్చరించాడు (2 కొరింథీయులు 2:11). వాడు వెలుగు దూతగా కనిపించగలడు (2 కొరింథీయులు 11:14).

మనుష్యులలో ఉన్న జెనెటిక్స్, బ్రెయిన్ కెమిస్ట్రీ, ట్రామా, స్ట్రెస్ అనే వాటి ద్వారా ఒక వ్యక్తియొక్క ఆలోచనలు మరియు భావాలను సాతాను వాని దూతలు నియంత్రిస్తూ మనుష్యులను పారానార్మల్ అనుభవాల ద్వారా అబద్దాలను నమ్మేటట్లు చేస్తూ ఒకని నిత్యత్వపు స్థితిని (స్వర్గమా నరకమా) నిర్ణయించడానికి ప్రయత్నిస్తున్నాయి. నయానో భయానో వీటి తంత్రాలకు లోబడిన ప్రజలు దేవుని కృపను తృణీకరిస్తూ తమ స్వార్ధ ప్రయోజనాల నిమిత్తము తమ్మును తాము సంతృప్తి పరచుకొనే క్రమములో వీటిని నమ్ముతూ విభజింపబడ్డాం.

మనకు దాని గురించి పూర్తిగా తెలిసినా తెలియకపోయినా, సాతాను మన శత్రువు. వాడు దేవుణ్ణి మరియు దేవుని బిడ్డలను వ్యతిరేకిస్తున్నాడు. ఈ భూమ్మీద ఉన్న ప్రతి చెడు వెనుక వాడున్నాడు. ఆరాధించబడాలని వాడు తహతహలాడుతున్నాడు, పూజింపబడాలనే వాడి దురాశే దీనంతటికి కారణం. వాడు దేవుని రాజ్యాన్ని నాశనం చేయాలనుకుంటున్నాడు. అలాగే తన సమయం పరిమితం అనే సంగతి వాడికీ తెలుసు.

కాని సాతాను ఒక ఓడిపోయిన శత్రువు. ఆదికాండము 3:15లో దేవుడు చేసిన వాగ్దానము ప్రకారం యేసు తన విమోచన కార్యము ద్వారా, సాతానుని తలను నలుగగొట్టాడు. వానికి పరిధి నిర్ణయింపబడింది. వానికి వాని దూతలకు శిక్షావిధి సమీపించింది. ప్రకటన 20:7-10 ప్రకారము ప్రజలను మోసపరచిన అపవాది వాని దూతలు వాడి తంత్రములో చిక్కుబడి వానిని నమ్మి వానిని వెంబడించిన వాళ్ళు అగ్ని గంధకములు గల గుండములో చివరకు పడవేయబడతారని వారు యుగయుగములు రాత్రింబగళ్లు బాధింపబడతారని బైబులు చెబుతుంది.

కాబట్టే ఎఫెసీయులకు 6:16 ఆ క్షణం వరకు మనం సాతానుకు వ్యతిరేకంగా ఆయుధధారులమై పోరాడవలసి యున్నామని చెబుతుంది. సాతాను వాని దూతలతో పోరాటమా అని భయపడకండి, యేసుని శక్తి, వాగ్ధానాలను బట్టి మనమందరం అపవాదిపై పైచెయ్యిని కలిగియున్నామని యాకోబు 4:7లో బైబులు చెబుతుంది.

దయ్యాల కార్యకలాపాలు నిజమే, కానీ క్రీస్తు ఇప్పటికే సాతానును ఓడించాడు (కొలొస్సయులు 2:15). విశ్వాసులు దయ్యాలకు భయపడకూడదు, కానీ యేసుకు పరలోకంలో మరియు భూమిపై అన్ని అధికారాలు ఉన్నాయని తెలుసుకుని విశ్వాసంలో స్థిరంగా ఉండాలి (మత్తయి 28:18). ఆయన మరణం మరియు పునరుత్థానం ద్వారా, మనం విముక్తి పొందాము.

ఈ సమాచారంతో ఇప్పుడు మీరు మీ స్వంత ప్రశ్నలను మరియు ఇతరుల ప్రశ్నలను పరిష్కరించగలరని నేను ఆశిస్తున్నాను.

దేవుని వాక్యాన్ని దాని స్వచ్చతలో భవిషత్ తరాలకు అందించాలనే ఉద్దేశ్యంలో దానిని భద్రపర్చాలనే ఈ చిన్న ప్రయత్నాన్ని ప్రోత్సహించండి. ఇది శ్రమతో ఖర్చుతో కూడుకొన్నది కాబట్టి ఈ ప్రయత్నంలో భాగస్వాములు కండి, చేయూతనివ్వండి, దేవుడు మిమ్మును దీవించును గాక. – రెవ. కూరపాటి విజయ్ కుమార్. ఫోన్ పే యూపీఐ ఐడి – 9848365150-2@ybl

KURAPATI VIJAY KUMAR,
HDFC BANK, Account no 50200096563465,
IFSC code. HDFC0005872,
Swift code HDFCINBB,
JKC College Road Branch, GUNTUR 522006,
ANDHRA PRADESH, INDIA.
The phone pay UPI Id : 9848365150-2@ybl